2017: U Rwanda mu ntsinzi ifite insibo mu bukerarugendo

Yanditswe na Rabbi Malo Umucunguzi
Kuya 13 Ukuboza 2017 saa 05:58
Yasuwe :
0 0

Uko umwaka ushira undi ugataha, niko u Rwanda ruca indi mivuno yo kwinjiza amadevize azuzuzanya no kohereza ibicuruzwa mu mahanga, dore ko gahunda ya Made in Rwanda imaze guhabwa umwihariko n’inganda zikaba zikomeje gushyigikirwa.

Ubukerarugendo ni imwe mu nzira u Rwanda rwanyuze, cyane ko rufite ikirere cyihariye n’imisozi yuje ahantu nyaburanga, rurakunda rugira ibirunga byibarutse imisozi miremire iturwa n’ingagi zitaba ahandi ku Isi.

Mu gihe iminsi isigaye ngo umwaka wa 2017 wihirike ibarirwa ku ntoki, hari byinshi u Rwanda rwawukozemo bitazibagirana, bigiye gusigira uru rwego imbaraga zidasanzwe, ku buryo inyungu yabwo izagera kuri miliyoni $ 800 mu myaka irindwi iri imbere, zivuye kuri miliyoni $440.

U Rwanda rwujuje ‘Big Five’

Uyu mwaka nibwo Pariki y’Igihugu y’Akagera yagize inyamaswa eshanu zitisukirwa n’izibonetse zose kuri uyu mugabane, ‘Big Five’. Nyuma yo kuzana Inkura muri Gicurasi, zaje zisanga Intare zahageze mu 2015, ubu Pariki y’Akagera irimo Inkura 18 n’Intare 19.

Ahagana mu 1970, mu Akagera habagamo Inkura z’Umukara zigera kuri 50, ariko uwo mubare waje kugabanyuka cyane bitewe na ba rushimusi kugeza ubwo iya nyuma yaherukaga kugaragara mu 2007.

RwandAir yujuje ibyerekezo 24

Ikigo cy’Igihugu cy’Indege, RwandAir, ni imwe mu nkingi mwikorezi z’ubukerarugendo bw’u Rwanda, kuko nubwo rufite ibyiza nyaburanga, urebye nka Pariki z’igihugu zisurwa cyane, mu Akagera na Nyungwe usanga Abanyarwanda bajyayo barenga 50%, byagera kuri Pariki y’Ibirunga ntibanagere kuri 3%.

Ni ukuvuga ko igice kinini ari abanyamahanga, baba bakeneye kugera mu Rwanda mu buryo bubabereye cyane ko abenshi bafite agatubutse. Niho RwandAir yinjiriyemo igura indege nshya yagura n’ingendo. Mu 2010 yari ifite indege eshatu gusa, ubu uyu mwaka urarangira ari 12 kandi nini zirimo izifite WiFi imbere.

Ni mu gihe n’abasura u Rwanda biyongera uko bwije n’uko bukeye, kuko Ikigo cy’Igihugu Gishinzwe Iterambere, mu mwaka ushize cyatangaje ko abanyamahanga baza mu Rwanda mu mwaka bikubye inshuro 30 mu myaka icumi ishize, bava ku bihumbi 40 bagera kuri miliyoni imwe n’ibihumbi 200.

Uyu mwaka usize RwandAir irushijeho kurambura amababa yayo iyerekeza ku yindi migabane, kuko muri Mata 2017 yatangije ingendo zigana Mumbai mu Buhinde muri Aziya y’Amajyepfo, muri Gicurasi yerekeza i Burayi ihereye mu Bwongereza, muri Nyakanga ikomereza mu Bubiligi.

Mu Ukwakira yatangiye kwekeza muri Afurika y’Iburengerazuba mu mijyi ya Dakar (Senegal), yiyongera kuri Libreville (Gabon), Brazzaville (Congo) na Abidjan (Côte d’Ivoire), ku buryo uyu mwaka ugiye gufunikwa RwandAir igana mu byerekezo 24.

Kwinjira mu Rwanda byorohejwe kurushaho

Ikigo cy’Igihugu gishinzwe Abinjira n’Abasohoka, mu kwezi gushize cyatangaje ko guhera muri Mutarama 2018, abagenzi baturutse mu bihugu byose byo ku Isi bazajya bahabwa viza y’iminsi 30 bageze aho binjirira mu Rwanda, batagombye kubanza kuyisaba nkuko byari bisanzwe ku bihugu bimwe na bimwe.

Uwo ubundi wari umwihariko w’abaturage b’ibihugu bya Afurika n’ibindi bike. Ni uburyo buzorohereza ba mukerarugendo n’abashaka kwitabira inama zitandukanye zidahwema kubera mu rwa Gasabo, zifatwa nk’ishyiga ry’urwego rw’ubukerarugendo mu gihugu.

Biniyongera ku buryo busanzwe kuri viza y’ubukerarugendo, umuntu aherwa mu gihugu kimwe akemererwa gusura bitatu byo muri Afurika y’Iburasirazuba mu gihe cy’iminsi 90, hagati ya Kenya, u Rwanda na Uganda.

Tembera u Rwanda yongerewe imbaraga

Mu mwaka ushize nibwo hongereye imbaraga mu gushishikariza Abanyarwanda kurushaho kumenya no gusura ibyiza by’igihugu muri gahunda ya Tembera u Rwanda, aho kugira ngo abanyamahanga baryohe bonyine mu byiza igihugu gifite, kandi atari uko abenegihugu babuze ubushobozi.

Imibare yerekana ko Pariki y’Ibirunga iza inyuma y’izindi mu gusurwa mu Rwanda, ariko muri uyu mwaka, ku nshuro ya mbere, abanyamahirwe bemerewe gusura ingagi ku buntu, mu gihe harimo bamwe batari kubasha kwishyura $1500 ku gusura ingagi, igiciro gishya cyashyizweho muri Gicurasi kivuye kuri $750.

Gusa kuzamura icyo giciro byagendanye no kuzamura inyungu ishyirwa mu mishinga y’iterambere ry’abaturiye pariki, yavuye kuri 5% igera ku 10%, izasanga indi mishinga imaze gushorwamo miliyari 2.8 Frw mu myaka icumi ishize.

U Rwanda runakomeza kongera ibyiza bisurwa, ndetse na Pariki y’Ibirunga ibamo ingagi zikurura benshi basura u Rwanda, ubu yanganaga na kilometero kare 160, ariko biteganywa ko izagurwa ikongerwaho ¼ cyayo bitarenze imyaka itanu.

Hari ibikorwa byinshi byateganyirijwe kwakira ba mukerarugendo, harimo ibifite umwihariko umuntu atarenza ingohe, harimo nka ‘Bisate Lodge’ iherereye mu Majyepfo ya Pariki y’Iburunga, imwe mu nyubako zihenze zigenewe ba mukerarugendo.

Hoteli "Bisate Lodge" yubatse ahantu uba witegeye udusongero tw’ibirunga bya Bisoke, Karisimbi na Mikeno
Muri Nzeri nibwo byatangajwe ko Ineza, inkura ya mbere mu zazanywe mu Rwanda yabyaye
Airbus 330-300 yiswe ‘Umurage’ niyo yakoze urugendo rwa mbere rwa RwandAir rujya i Londres mu Bwongereza
Intare zirindwi zirimo ingore eshanu zazanywe mu Rwanda zikuwe muri Afurika y'Epfo
Uyu mwaka usize gusura ingagi ari $1500

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza