Kwamamaza

Nsanzumuhire w’imyaka 13, umwe mu bana bazobereye amateka y’urutare rwa Ndaba

Yanditswe kuya 8-08-2016 saa 10:49' na Emma-Marie Umurerwa


Bisanzwe bimenyerewe ko amateka y’igihugu, abantu babaye ibirangirire ndetse n’ahantu runaka asobanurwa n’abasheshe akanguhe cyangwa ababyize mu mashuri.

Ku rutare rwa Ndaba siko bimeze kuko usanga abahisi n’abagenzi ndetse na ba mukerarugendo basobanurirwa amateka yaho n’abana bakiri bato.

Uru rutare rwitiriwe umugabo witwa ‘Ndaba’ nyuma yuko we na bagenzi be barugezeho (akahatunga urutoki) bakahabona ubuki.

Ubwo bahageraga, kubera ko hahanamye cyane Ndaba yabagiriye inama yo kumuzirika umugozi ku nda kugirango amanuke ajye guhakura, nabo ntibazuyaza baramuzirika aramanuka bizeye ko ari buzane ubuki bagasangira.

Ageze mu rutare yahakuye amira, ntiyibuka ko ari kumwe na bagenzi be.

Baramubazaga bati ’ese Ndaba hari icyo waronse?’(ubuki wabubonye) nawe ati ’Mbirimo ndabazanira’. Bagenzi be bageze aho barananirwa, barungurutse babona Ndaba ari kurigata intoki, icyanga cyamurenze. Bahita bagira umujinya barekura wa mugozi Ndaba ahanuka yibarangura ku rutare ahita apfa. Nguko uko uru rutare rwitiriwe uwo mugabo wazize inda nini.

Nsanzumuhire Gideon w’imyaka 13 y’amavuko, asobanurira abahisi n’abagenzi ndetse na ba mukerarugendo amateka y’urutare rwitiriwe Ndaba ruherereye mu Murenge wa Rubengera.

Uyu mwana hamwe na bagenzi be, basobanura aya mateka mu Kinyarwanda ndetse no mu ndimi z’amahanga mu bumenyi bwabo buciriritse, abantu babateze amatwi ubona ko banyuzwe nibyo bari kubabwira, ntawuhakana cyangwa ngo agire icyo yongeraho.

Amatsiko aba ari menshi kuri ba mukerarugendo

Bamwe muri ba mukerarugendo baba bagiye gusura ibice nyaburanga byo mu Karere ka Karongi, barahagarara bakamanuka aho bita muri ‘Mana mfasha’ bajya kureba ubwiza bw’isumo ry’amazi amanuka ku rutare, bakagera hasi mu kabande.

Iyo uganiriye na bamwe muri ba mukerarugendo ndetse n’abagenzi baba bagiye mu bice bitandukanye bya Karongi, bakubwira ko kuri uru rutare rwa Ndaba hagizwe agace nyaburanga hagashyirwa n’umukozi usobanura amateka byaba ari akarusho.

Marcello Langella ukomoka muri Espagne yagize ati "Hafite ubwiza bwihariye wasanga mu bihugu bike ku Isi. Hatunganyijwe neza, hagashyirwa n’umuntu usobanura amateka byadufasha twe ba mukerarugendo."

Amakuru agera kuri IGIHE ni uko urutare rwa Ndaba rutari mu hantu nyaburanga RDB yashyize ahagaragara.

Twifuje kumenya icyo Akarere ka Karongi gateganyiriza aha hantu ntibyadukundira kuko umuyobozi wako atitabaga telefone ye igendanwa.

Urutare rwa Ndaba ruri ahantu hahanamye cyane
Urutare rwa Ndaba rufite amateka akomeye mu Rwanda rwo hambere
Akarere ka Karongi gafata urutare rwa Ndaba nk'ahantu nyaburanga

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved