Ikigo cyubatse Bisate Lodge kigiye gufungura indi nyubako muri Pariki y’Akagera

Yanditswe na Rabbi Malo Umucunguzi
Kuya 3 Kamena 2018 saa 09:49
Yasuwe :
0 0

Ikigo Wilderness Safaris cyubatse Bisate Eco Lodge mu gace k’ibirunga iheruka no kuza ku rutonde rwa hoteli 56 nshya nziza ku Isi, kigiye kwagurira ibikorwa mu Pariki y’Igihugu y’Akagera, aho mu Ukuboza kizafungura inyubako yo gukambikamo yahawe izina rya Magashi Camp.

Wilderness ivuga ko iyo nyubako izaba igizwe n’amahema atandatu izaba iherereye mu Majyaruguru ashyira Uburasirazuba bwa Pariki y’Igihugu y’Akagera, ahitegeye ikiyaga cya Rwanyakazinga.

Itangazo yashyize ahagaragara rivuga ko ishoramari umuryango wa Howard G. Buffett umaze iminsi ishyira mu bikorwa byo kubungabunga Pariki yIgihugu y’Akagera binyuze mu kigo African Parks mu kurinda no kubungabunga Pariki y’igihugu y’Akagera, ari ryo ritumye ibi bikorwa bibera muri pariki bishoboka.

Umuyobozi ushinzwe ibikorwa muri Wilderness Safaris, Grant Woodrow, yavuze ko mu gihe muri uyu mwaka aribwo bizihiza imyaka 35 ikigo kimaze, banejejwe no gutangaza ubufatanye bushimishije n’Ikigo cy’Igihugu cy’Iterambere (RDB na African Parks), mu gushimangira ubukerarugendo burambye kandi bw’umwimerere mu Rwanda.

Yakomeje agira ati “Aha hantu hagezweho ho gukambika ntabwo hazatanga amahirwe ku bakiriya bacu ngo bitegereze imirambi gusa, ahubwo iri no muri gahunda yo kurushaho kubungabunga iki gice n’inyamaswa zikirimo nk’inyoni za Shoebill n’Inkura z’umukara.”

Magashi Camp izaba yitegeye inkombe z’ikiyaga cya Rwanyakazinga, intaho y’umubare munini w’imvubu, ingona ndende n’izindi nyamaswa zinyuranye zikunda kwibera muri ako gace.

Ubu Pariki y’Iguhugu y’Akagera ni imwe mu ziri kureshya ba mukerarugendo benshi mu Rwanda kuko irimo inyamaswa z’amoko atandukanye, nyuma y’uko mu 2015 African Parks yasubijemo Intare nyuma y’imyaka 20 zihacitse, mu 2017 hakongerwamo Inkura.

Ubu iyi Pariki ifite inyamaswa eshanu zikomeye kuri uyu mugabane zirimo Intare, Imbogo, Inzovu, Inkura n’Ingwe.

Kugira inyubako mu Birunga no mu Akagera, ngo bizajya bituma abagenzi baryoherwa n’ahantu heza muri ibyo bice byombi, bakarara muri Bisate Lodge basuye Ingagi, no muri Magashi basuye inyamaswa nyinshi ziba mu Akagera n’inyoni z’amoko arenga 500 zaharitse.

Umuyobozi wa Pariki y’Akagera, Jes Gruner, yavuze ko bashimishijwe n’ubufatanye na Wilderness Safaris “ku gufungura Magashi Camp, ikintu kitari gushoboka iyo hatabaho inkunga Howard G. Buffett Foundation yahaye African Parks mu kurinda no kubyaza umusaruro Akagera”,

Yavuze ko mu myaka umunani ishize, Pariki y’Akagera igeze hafi kuri 75% yishakamo ingengo y’imari kubera ubukerarugendo buhakorerwa, bunagira uruhare mu guteza imbere abaturage bayituriye.

Yavuze ko mu mwaka ushize wa 2017 ba mukerarugendo barenga 36 000 basuye Pariki y’Igihugu y’Akagera, kandi kimwe cya kabiri bari Abanyarwanda.

Magashi Camp izaba ibereye ba mukerarugendo bashaka gukambika muri Pariki y'Igihugu y'Akagera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza