Igishanga cya Nyandungu kigiye kubakwamo ibikorwa nyaburanga by’asaga miliyari 2, 4 Frw

Yanditswe na Ishimwe Israel
Kuya 7 Ukuboza 2016 saa 12:57
Yasuwe :
0 0

Leta y’u Rwanda yatangiye umushinga wo guhindura igishanga cya Nyandungu giherereye mu mirenge ya Ndera ho mu Karere ka Gasabo na Nyarugunga muri Kicukiro, ahantu nyaburanga (eco-tourism park), abantu bashobora kuruhukira, gukorera imyidagaduro ndetse bakanahavoma amwe mu mateka yo mu Rwanda rwo hambere.

Uyu mushinga uri muri gahunda za Leta zo kubungabunga ibidukikije hagamijwe gukumira iyangizwa ry’ibikorwa bifitiye igihugu akamaro, kongera urusobe rw’ibinyabuzima, kugabanya imyuzure, ubukangurambaga bwo kubungabunga ibishanga no guhanga imirimo ishingiye ku bidukikije n’ubukerarugendo, uzuzura utwaye amafaranga y’u Rwanda asaga miliyari ebyiri na miliyoni 400 (2,413,699,149).

Umuyobozi Mukuru w’Ikigo cy’Igihugu cyo Kubungabunga Ibidukikije (REMA), Colette Ruhamya yatangarije IGIHE ko uyu mushinga uri mu nyigo ndetse bitarenze umwaka utaha wa 2017, uzaba watangiye gushyirwa mu bikorwa.

Yagize ati “Ibikorwa byo kubaka ahantu nyaburanga muri iki gishanga ni uburyo bwo kukibungabunga kuko bigaragara ko cyangiritse, kigomba kuvugururwa, tugasubiranya aho ibimera byagiye bicyendera, ahandi hakubakwa ku buryo bugezweho buzatuma abantu bahasura, bakabona aho kuruhukira. Haracyanozwa inyigo y’aho kugira ngo buri wese cyane ba mukerarugendo bakunda kuza mu Rwanda bajye babona aho batemberera no mu Mujyi wa Kigali kuko urebye nta hantu hari hahari ba bashoboraga gusohokera.”

Yakomeje agira ati “Ni byo koko uyu mushinga uzafasha kuzamura ubukungu bw’igihugu ndetse no kugarurira ubuzima bw’ibinyabuzima birimo ibiti, inyoni, byahahoze ariko bikaza kuburirwa irengero. Hari itsinda rishinzwe kugenzura uyu mushinga ryahawe kuwukurikirana no kuwunoza kuko ikigenderewe atari amafaranga ahubwo ari uburyo bwo kubungabunga ibidukikije.”

Ruhamya atangaza ko ku nkengero z’iki gishanga bateganya kuzahashyira ibikorwa bitandukanye birimo ahantu ho kwifotoreza, gufatira ifunguro, no gusukura amazi aturuka mu misozi ihakikije, ibikorwa byo kuhasukura bikazatangira mu minsi ya vuba.

Ibikorwa nyaburanga bizashyirwa mu gishanga cya Nyandungu ku buso bwa hegitari 130 biri mu bya mbere byo ku rwego rwisumbuye bigiye kubakwa mu gihugu habungwabungwa urusobe rw’ibinyabuzima.

Uyu mushinga biteganyijwe ko uzuzura mu gihe cy’imyaka itanu uzarangira mu 2020, ushobora kuzinjiza miliyari y’amafaranga y’u Rwanda y’inyungu mu myaka 12, angana na miliyoni zisaga 83 buri mwaka.

Uzakorwa ku bufatanye n’Ubuyobozi bw’Akarere ka Gasabo mu Murenge wa Ndera n’aka Kicukiro muri Nyarugunga, Umujyi wa Kigali ndetse n’Ikigo cy’Igihugu cy’Iterambere, RDB.

Uyu mushinga watewe inkunga n’Ikigega cy’Igihugu cy’Ibidukikije n’Imihindagurikire y’Ibihe, FONERWA biteganyijwe ko uzahanga imirimo 70 muri gahunda y’imbaturabukungu ya kabiri (EDPRS II).

Umuyobozi Mukuru w’Ikigo cy’Igihugu cyo Kubungabunga ibidukikije (REMA), Colette Ruhamya atangaza ko ibi bikorwa bizafasha Leta kubungabunga ibidukikije

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza