Ibikorwa ushobora gukora uri wenyine ukaryoherwa n’umunsi wawe muri Kigali

Yanditswe na Mukaneza M.Ange
Kuya 25 Gicurasi 2018 saa 08:52
Yasuwe :
2 1

Abo waba ubana nabo bose, inshuti nziza waba ufite uko zaba zingana kose, burya buri wese aba akeneye gufata umwanya akajya ahantu ha wenyine kugira ngo yongere kwitekerezaho no gushyira ibitekerezo ku murongo nta kirogoya.

By’umwihariko ku bari mu Mujyi wa Kigali, ahahora urujya n’uruza rw’abantu ndetse utibagiwe n’urusaku rw’ibinyabiziga, ni ngombwa ko ufata umwanya ugakora bya bikorwa bikumara amavunane.

Aha ushobora kwibaza uti’ ukuntu Kigali iteye’ n’iki nakora cyamvura umunaniro, cyangwa nihe najya hamfasha gusubiza ibitekerezo ku murongo?’

Ibyo gukora byo ni byinshi kandi bitagusaba amafaranga y’umurengera nko kugana inzu zifasha kuruhura umubiri, gusura ibikorwa by’ubugeni n’ubukorikori n’ibindi.

Dore bimwe mu byo IGIHE yaguhitiyemo, ushobora gukora kandi uri wenyine umunsi wawe ukakubera mwiza.

Ruhura umubiri ujya muri ‘Spa’

Nubwo nta bushakashatsi bwigeze bukorwa mu Rwanda, ubwakorewe muri Leta Zunze Ubumwe za Amerika mu 2016 bwagaragaje ko umwe mu bantu 20 apfa azize gucika k’udutsi tw’ubwonko ahanini bituruka ku munaniro ukabije.

Nta mpamvu n’imwe ariko yo kuba muri abo bantu bahitanwa no kunanirwa k’umubiri kandi hari uburyo bwinshi bwo kubirwanya, bumwe muri bwo akaba ari ukuruhura umubiri ukoresheje uburyo butandukanye burimo no kwiyuhagira amazi arimo imiti itandukanye (Spa).

Kigali nk’umujyi ukomeje gutera imbere uko bwije n’uko bukeye hagaragara ahantu henshi wakorera ibikorwa nk’ibi bikuruhura, hamwe muri aho ni Saray Spa ya Marriot Hotel, aho uretse abakozi beza bakwakirana urugwiro unafashwa kunanura iminsi, ndetse nyuma ugahabwa aho kurukira.

Mu byo ukorerwa hari ukunanura umubiri hakoreshejwe uburyo bumenyerewe muri Suède (Swedish Massage), kuruhura iminsi y’umutwe bimenyerewe mu Buhinde, kwifashisha amabuye mu kuruhura umubiri (Jade hot stone therapy) ndetse no kuzibura utwengeruhu two mu maso bakoresheje ibimera birimo indimu.

Kuruhura umubiri ukoresheje uburyo butandukanye burimo no kwiyuhagira amazi arimo imiti itandukanye (Spa) ni bimwe mu bifasha umuntu kumererwa neza

‘Yoga’ nayo burya ntiyakugwa nabi

Nyuma y’akazi kenshi n’izindi gahunda zinaniza ubwonko n’umubiri uba ukeneye kuruhuka no kongera gusubiza ibitekerezo ku murongo.

Ibi rero nta kindi cyabigufashamo uretse ‘Yoga’, uburyo buzwiho kuba kuva mu myaka ya kera bwaragiye bwifashishwa mu kunanura ingingo zitandukanye z’umubiri, kwitekerezaho no guhanagura muri wowe ibitekerezo byose bituma utagera ku ntego wihaye.

Yego Yoga Rwanda ni bamwe bagufasha, batanga amasomo ahantu hatandukanye mu Mujyi wa Kigali harimo nka Soho Fitness ku Kicukiro.

Uretse kuba Yoga igufasha kuruhuka mu mutwe no ku mubiri, ni na nziza ku mugore utwite kuko ituma ashira ubwoba, ndetse bikanamwongerera imbaraga, kwirekura no kwihangana biba bikenewe mu gihe cyo kubyara.

Nyuma y’akazi kenshi n’izindi gahunda zinaniza ubwonko n’umubiri uba ukeneye kuruhuka no kongera gusubiza ibitekerezo ku murongo

Sura ibikorwa by’ubugeni bitatse Inema Arts Center

Ku bakunda ubugeni n’ubukorikori, Inema Arts Center ni ahantu heza twaguhitiramo gusura igihe wafashe umwanya wo kuruhuka. Iyi nzu iherereye Kacyiru uyisangamo abanyabugeni bagera kuri 11 baba bakora ibishushyanyo byiza kandi bitanga ubuhamya.

Uretse kuhasanga ibihangano bifite umwihariko, ubasha no kubona abanyabugeni bashushanya ako kanya ku buryo n’igihangano cyawe bashobora kugikora ukagitahana. Haba kandi abagore bakora imitako n’imirimbo bya Kinyarwanda na Kinyafurika.

Ku bakunzi b’imbyino Nyarwanda kandi kuri Inema Arts Center uhasanga abakobwa babyina amaraba, n’abahungu bahamiriza, imyitozo yabo iba iminsi itatu mu cyumweru.

Ku bakunda ubugeni n’ubukorikori, Inema Arts Center ni ahantu heza twaguhitiramo gusura igihe wafashe umwanya wo kuruhuka

Rangiza umunsi wawe wifatira ‘Cocktail’

Nyuma yo kuruhura umubiri, gusura ibikorwa by’ubugeni ni ngombwa ko ugira ahantu hatuje unyura, kugira ngo ubanze gusubiza amaso inyuma ureba uko umunsi wawe wagenze, ndetse ari nako witegura gusubira mu kazi kawe ka buri munsi.

Nk’umuntu n’ubundi wari wihaye umwanya wo kuruhuka, birumvikana ko uba ukeneye gufatira icyo kunywa ahantu hatuje ku buryo ugumana ibyiyumviro wirirwanye. Mu byo kunywa ushobora gufata harimo nk’uruvange rw’ibinyobwa ruzwi nka ‘Cocktail’, Trophy’s Sports Lounge iherereye hafi y’icyicaro cya RDB ku Gishushu akaba ari hamwe mu ho ushobora gusanga umwihariko.

Ukinjiramo umukozi w’aho akwakirana urugwiro ndetse akakubaza ubwoko bwa ‘Cocktail’ wifuza, uhereye kuzo basanzwe bakora cyangwa se wowe ukababwira ibyo wifuza ko bakuvangira. Uramenye utazaha ariko utabanje kumva uburyohe bw’iyahawe izina rya ‘The Cowboy Kiss’.

Cocktail yagufasha gusoza umunsi wawe umerewe neza...

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza