Dutemberane i Dakar, Umujyi ubumbatiye amateka y’abakurambere ba Afurika (Amafoto)

Yanditswe na Philbert Girinema
Kuya 8 Gicurasi 2018 saa 10:15
Yasuwe :
1 0

Dakar ni Umurwa Mukuru wa Sénégal, kimwe mu bihugu by’ibihangange mu Burengerazuba bwa Afurika. Ubusanzwe ni Umujyi bakunda kwita ‘Paris d’Afrique’ bitewe ahanini n’iterambere rikataje umaze kugeraho bigakubitana no kuba u Bufaransa ari bwo bwahakolonije.

Uvuye i Kigali, ni urugendo rworoshye muri iki gihe dore ko Ikompanyi ya RwandAir isigaye igera muri uyu murwa uri ku nkengero z’Inyanja ya Atlantique.

Ku Munyarwanda biba ari agahebuzo gukora urugendo nk’uru cyangwa urundi rurerure uri mu ndege y’iwanyu. Impamvu ni imwe, biba bisa n’aho uri mu rugo rw’umuturanyi wawe kuko usibye kuba abakozi bo mu ndege muba mutamenyerana, naho ibindi byose aba ari nk’iby’iwawe.

Bihera ku cyayi baguha, warebaho ugasanga cyakozwe n’uruganda nyarwanda, amazi ukabona ni Inyange yayatunganyije, isukari ngo yafungiwe hariya ku Kicukiro; icyo ntarabasha kumenya ni inkomoko y’amafi bagabura ariko nayo agomba kuba ava i Rubavu!

RwandAir igera i Dakar inyuze i Cotonou muri Bénin, i Douala muri Cameroon n’i Abidjan muri Côte d’Ivoire. Ni urugendo rumara nibura amasaha 13 ariko aba make mu buryo utazi kubera serivisi ntagereranwa usangana abasore n’inkumi b’Abanyarwanda bakora muri iyi ndege.

Kuri njye ni ubwa mbere nari mbonye umuseriveri mwiza [simvuga isura] ahubwo w’umutima mwiza nka Joseph na bagenzi be twakoranye uru rugendo. Amashyi kuri RwandAir!

Mu rugendo rwanjye rwatangiye mu masaha ya kare y’igitondo, nanyuzwe no kubona umwe mu bakozi bo mu ndege yicaranye n’abana batatu, b’abagenzi, baganira baseka; muri make bamwisanzuyeho na we akabitaho kugira ngo barusheho kunyurwa. Ibi ni ibintu by’i Rwanda rwose!

Iby’ibanze wamenya kuri Sénégal

Ni igihugu kiyoborwa na Macky Sall, umugabo udaca ibintu ku ruhande muri Sénégal kuko ashimirwa no kuba ari gushyira igihugu ku murongo nyuma y’ibihe bikomeye cyanyuzemo mu myaka yashize.

Mu gihe nari muri iki gihugu, hari imyigaragambyo ikaze abaturage bamagana itegeko rijyanye n’amatora ryari rimaze kwemezwa n’Inteko Ishinga Amategeko. Abamaze igihe muri iki gihugu bazakubwira ko kuba haba imyigaragambyo inshuro nyinshi biterwa no kuba abaturage bayobowe mu buryo batari bamenyereye kuko ngo mbere amategeko atakurikizwaga uko bikwiye.

Ingero zitangwa kuri iyi ngingo zo ni nyinshi. Benshi bibuka Minisitiri w’Isi n’Ijuru [Ministre du Ciel et de la Terre], Karim Wade, umuhungu wa Abdoulaye Wade wari Perezida, wayoboraga minisiteri eshanu zifite agatubutse mu gihugu zirimo nk’iy’ibikorwaremezo, imari, uburobyi n’izindi.

Kuva mu 2016, Sénégal ituwe na miliyoni 15.6 biganjemo abayoboke b’idini ya Islam. Ihana imbibi na Mauritania, Mali, Guinea na Guinea Bisau.

Ururimi rukoreshwa muri iki gihugu rwitwa ‘Wolof’, ku Munyarwanda kurwumva uba utazi iyo biva n’iyo bijya [ibyo byo birumvikana]. Nko kuvuga ngo ‘meze neza’ muri uru rurimi uravuga uti ‘Maa ngi fi’ [Soma: Mangifi], washaka kuvuga uti Yego, ni ‘waaw’ [wawu] naho kuvuga uti ‘nitwa/izina ryanjye ni Philbert’ ni Maa ngi tudd Philbert’ [Soma: Mangitudu].

Ikindi kandi umubare munini w’abaturage bo muri Sénégal, bavuga neza Igifaransa nk’uririmi rwabo rwa kabiri, Icyongereza cyo ni kure kubi kiba kizwi n’umugabo kigasiba undi.

Umujyi wa Dakar uri mu nkengero z’Inyanja ya Atlantique, ukaba ugira ubushyuhe bukabije aho nko muri ibi bihe twakwita ko hakonje buri muri dogere 25. Naho nko muri Nzeri, biba ari ibindi bindi. Ku masaha, iki gihugu kiri inyuma ho abiri ku isaha y’i Kigali.

Sénégal kandi iri mu bihugu bya mbere muri Afurika mu kugemura hanze ubunyobwa kuko urebye nk’agaciro k’ubwagemuwe, bungana nibura na 1/3 cy’amafaranga y’ingengo y’imari y’u Rwanda.

Ni Umujyi w’abakurambere

Ibyo wabona muri Dakar bigendanye n’amateka ya Afurika byo ni byinshi, ariko ku muntu uzagira amahirwe yo kuyisura hari iby’ingenzi utacikwa, nawe utarajyayo, ibi kubimenya ntacyo bitwaye.

Duhereye mu Burengerazuba bwayo, hari Ikirwa cyitwa Gorée kibumbatiye amateka y’ubucakara bwakorewe Abanyafurika batwarwaga mu bwato bakajya gukoreshwa imirimo y’uburetwa mu bihugu by’u Burayi.

Ku kirwa cya Gorée giherereye rwagati mu nyanja, hari inzu yakorerwagamo ubucuruzi bw'abanyafurika bajyanwaga mu Burayi mu bikorwa by'ubucakara

Kuri iki kirwa hari inzu ndangamateka igaragaza neza inzira abirabura b’Abanyafurika banyuzwagamo. Yubatswe mu myaka ya 1776, ikaba yarayoborwaga n’umugore w’Umunyafurika wari ufite inkomoko mu Bufaransa.

Aha muri iyo nzu iri ku kirwa kiri mu Nyanja, niho Abanyafurika bafungirwaga mu mwijima musa aho batashoboraga kumva ikindi kintu na kimwe. Babaga bahambiriye iminyururu ku bikuta, imigongo yabo isa n’ifatanye n’urukuta ku buryo badashobora kwinyeganyeza.

Babaga baratatanyijwe [abana, abagore n’abagabo] buri cyiciro kiri ukwacyo. Uwo mugore rero ni nawe wari ufite ubwato bwabakuraga aho bubajyanye mu bihugu by’u Burayi kandi nabwo bagendaga baboshye.

Mu 1962 nibwo Boubacar Joseph Ndiaye wavukiye i Gorée, wanabaye no mu Gisirikare cy’u Bufaransa yagize uruhare rukomeye mu gutunganya iyi nzu igirwa ingoro ndamateka. Kugira ngo ugere kuri iyi ngoro, bigusaba gutega ubwato buhaguruka buri minota 30.

Ikibumbano kirekire muri Afurika

Monument de la Renaissance Africaine, ni cyo kibumbano kirekire muri Afurika kuko kireshya na metero 52. Cyakozwe kijya kujyanishwa na Statue of Liberty iri mu Mujyi wa New York muri Leta Zunze Ubumwe za Amerika.

Iki kibumbano kiri rwagati mu mujyi, ni cyo kirango cyawo. Gikoze muri bronze na cuivre, kikaba giherereye ku musozi wa Mamelles.

Gusura aha hantu naho habumbatiye amateka ya Afurika bisaba ko wishyura 4000 CFA angana 6500 Frw ubundi ugatambagizwa hose. Ukiboneye inyuma wagira ngo ni ikibumbano gisanzwe ariko imbere ni nk’inzu y’amagorofa kuko kugira ngo ugere hejuru mu bushorishori bisaba ko uzamukira muri Ascenseurs.

Iki kibumbano kigizwe n’ishusho y’umugore, umugabo n’umwana. Umugore agaragara asa n’uri inyuma akuruwe n’umugabo uteruye umwana mu kiganza kimwe. Hanyuma ishusho y’uyu mwana iba itunga ukuboko hejuru bishatse gusobanura ngo ‘ahazaza heza’. Ikibumbano cyose gisobanuye ngo ‘ikinyejana kiri imbere ni cyiza kurusha igishize [igishize bigaragazwa n’ikiganza cy’umugore kiba kireba inyuma’].

Ucyinjira muri iyi ngoro, uhingukira ahantu hari amabendera y’ibihugu byose bya Afurika [birumvikana n’iry’u Rwanda ririmo], haba hari ecran zigaragaza uburyo iki kibumbano cyubatswe kuva mu isiza kugera gitashywe.

Muri icyo cyumba kandi harimo amashusho menshi agaragaza ibihe bikomeye Afurika yanyuzemo urebeye kuri buri gihugu. Mu gasongero hacyo, hasumba inyubako ya Kigali City Tower kuko uzamuka Ascenseurs ukajya mu cyumba cya 15.

Muri iyi ngoro yafunguwe muri Mata 2010 na Perezida Abdulaye Wade, harimo intebe yakiriyeho abakuru b’ibihugu 20 bitabiriye uyu muhango, hagaragaramo ibibumbano bishushanya buri bwoko bw’abaturage bo muri Sénégal. Ni hamwe mu hantu heza ho gusura kuko hagukundisha uyu mugabane dutuye, ukareba inzira y’umusaraba wanyuzemo none ukaba umeze uko buri wese abibona.

Inama ku muntu wifuza gusura iki kibumbano: Byaba byiza niba ari umukobwa ugiyeyo wambaye ipantaro ukirinda ijipo. Impamvu ni uko ahantu cyubatse ari ku musozi hejuru hahora umuyaga mwinshi ku buryo iyo wambaye nk’ingofero wisanga yagurukanwe n’umuyaga, ubwo rero wambaye ijipo urumva uko byagenda!

Ahandi hari amateka akomeye ya Afurika ni ahazwi nka Place du Souvenir mu gace ka La Corniche Quest ku Nyanja ya Atlantique. Ni ho hakorerwa ibikorwa byinshi bijyanye no kwibuka intwari za Afurika ndetse mu minsi iri imbere hari gahunda yo kubashyira ikimenyetso kigaragaza amateka ya Jenoside yakorewe Abatutsi.

Uri i Dakar ni henshi wasura. Usibye aha nyaburanga hajyanye n’amateka ya Afurika, abakunda kujya ku mazi hari ibice byinshi byiza biri ku nkengero za Atlantique.

Ntiwataha utageze i Saly…

Saly ni nka Rubavu yo mu Rwanda. Ni wo mujyi wa ba mukerarugendo muri Dakar, usangamo amahoteli menshi, abanyaburayi cyane abo muri Espagne n’u Bufaransa baje mu biruhuko.

Ni ko gace muri Sénégal ushobora kujyamo ugasangamo isuku nyinshi bitewe n’uko ari nk’igicumbi cya ba mukerarugendo. Hari n’agace gatuwemo n’abanyaburayi, baza bakagura ibibanza ubundi bakubaka inzu bazajya baruhukiramo.

Umwanda n’akavuyo ntaho wabihungira…

Dakar ni umujyi urimo akavuyo kenshi k’imodoka, ntushobora kurenga intambwe ebyiri utabonye imodoka iparitse mu muhanda yapfuye yararengewe n’ivumbi. Ni nk’uko aho ukase hose ubona amashashi, abantu bacuruza ku muhanda, abadandaza imyenda, ibyo kurya n’ibindi.

Mu muhanda ntiwapfa kubona umuntu utwaye moto wambaye casque, biragoye kandi kubona moto zikora ibikorwa bya taxi nk’uko iwacu bimeze.

Udashaka gutega imodoka rusange [nazo zifite amateka yihariye] atega taxis voiture zirangwa n’ibara ry’umuhondo, ubundi ukumvikana n’umushoferi, iyo utahazi neza aguca amafaranga ku buryo abo uyabwiye bifata ku munwa. Hari kandi n’izindi modoka zitwara abantu zidafite ibara ry’umuhondo, Clando, [biva ku ijambo clandestinité] mu buryo twakwita ubwo kwihishahisha.

Muri iki gihugu hari inkubiri ikomeye yo guca mu muhanda imodoka zakozwe mu myaka ya 1800 za Made in Senegal zitwa ‘Car Rapide’. Ni imodoka ziba zishaje cyane, zirangwa no kuba zanditseho ibintu byinshi mu mabara y’umuhondo nka kumwe za zindi z’i Nyamirambo zari zimeze.

Kubera izuba ryinshi,usanga imikindo yatewe mu mucanga uba uri mu nkengero z'umuhanda idakura

Izi modoka ni zo za mbere zakorewe muri Sénégal, abantu bazikunda bikomeye kubera ko kuzigendamo bisaba ko wishyura nk’ijana, gusa ntiziba zifite urugi, inyinshi usanga amadirishya yaravuyemo imitwe y’abantu iri hanze, abantu bahagaze hafi yo kugwa n’ibindi. Gahunda yari iriho ni uko ziba zavuye mu muhanda bitarenze 2018, gusa uko bikozwe abaturage bajya mu muhanda bakigaragambya.

Izindi modoka zitwara abantu ni izizwi nka Ndiagadia [nyinshi muri zo ni bus za Tata] zo ziva mu mujyi zifite ibindi byerekezo zigiyemo.

Mu mujyi rwagati agace gasukuye ni Almadies ari naho hari icyicaro cya za Ambasade [ni naho iy’u Rwanda n’iya Amerika zikorera]. Hari icyicaro cy’imiryango mpuzamahanga myinshi, amahoteli akomeye n’ibindi.

I Dakar abantu batuye mu buryo bugezweho aho baba muri za apartments, haba ibigo by’ubwubatsi bizubaka bikazigurisha abaturage. Kubera uburyo hari ubucucike mu mujyi rwagati, hari kubakwa undi mujyi wa kabiri wunganira uyu aho kuri ubu inyubako ziri kuzamuka ubutitsa mu gace kazwi nka Diamniadio.

Muri iki gihugu kandi imodoka ziganje ni izo mu Bufaransa nka Peugot, Reunot n’izindi ziva i Burayi nka Volkswagen, Benz na Range Rover cyangwa KIA zo muri Aziya.

Muri iki gihe essence igura 695 CFA [1098 Frw], Orange niyo kompanyi y’itumanaho yihagazeho inyuma ya Tigo naho amafi ni byo biryo byiganje.

Muri Sénégal, hari Abanyarwanda benshi bahuriye muri Diaspora Nyarwanda (ACRS-Association de la Communauté Rwandaise au Sénégal) iyobowe Dr. Philonilla Uwamariya Thiam barimo abahashakiye mu myaka 40 ishize, abanyeshuri cyane abiga mu bijyanye n’ubuvuzi n’abandi bakora mu miryango mpuzamahanga.

Ni uku imodoka zitwara abagenzi ziba zimeze... Convoyeur aba yihagarariye inyuma bimwe bita kwitendeka
Ibikorwaremezo nk'imihanda bihari ku bwinshi...
Umuhanda uva mu mujyi werekeza kuri Monument de la Renaissance Africaine
Kwinjiza imodoka muri Sénégal uyivanye i Burayi ntibirenza amadolari 300
Byakugora gutambuka metero ijana mu mujyi rwagati utarabona ahantu haparitse imodoka yapfuye
Iki kibumbano kiri rwagati mu mujyi, nicyo kirango cyawo, gikoze muri bronze na cuivre
Ukiboneye inyuma wagira ngo ni ikibumbano gisanzwe ariko imbere ni nk’inzu y’amagorofa kuko kugira ngo ugere hejuru mu bushorishori bisaba ko uzamukira muri Ascenseurs
Umusozi wa Mamelles niwo wubatseho iki kibumbano. Iyo uwuhagazeho uba ureba ibice binini bya Dakar
Abakuru b'Ibihugu barenga 20 nibo bitabiriye umuhango wo gufungura iki kibumbano gishimangira ahazaza ha Afurika. Ni umuhango witabiriwe n'abantu bakomeye barimo nka Akon ndetse na Rev. Jesse Jackson
Muri iki kibumbano harimo amafoto agaragaza intwari zitandukanye za Afurika
Iyo uhagaze hejuru kuri Monument de la Renaissance Africaine uba witegeye neza Ikibuga cy'Indege Mpuzamahanga cyitiriwe Léopold Sédar Senghor; ubu gisigaye gikoreshwa n'Igisirikare ndetse n'Umukuru w'Igihugu. Ni nacyo cyakirirwaho indege z'abandi bayobozi bakomeye
Imyubakire y'i Dakar ni mu buryo bw'amagorofa. Ushaka inzu ayigura n'ikompanyi izubaka, ntabyo kubaka uko ushaka...
Muri iyi Monument harimo amafoto y'abayoboye Sénégal bose
Amateka y'Ibihugu byose bya Afurika agaragara muri iyi ngoro ndangamateka
Iyo uzamuka ujya kuri iyi monument, bigusaba guterera escalier 198
Harimo kandi ifoto ya Barack Obama wakabije inzozi za Martin Luther King Jr. akaba umwirabura wa mbere wayoboye Amerika
Ifoto ya Martin Luther King Jr. isa n'iteganye n'iya Obama aho aba amutunga urutoki
Izi ni intebe Perezida Wade yakiriyeho abakuru b'ibihugu bitabiriye umuhango wo gufungura Monument de la Renaissance Africaine
Muri iyi monument harimo ibibumbano bigaragaza amoko y'abaturage bo muri Sénégal
Buri kibumbano gihagarariye ubwoko runaka...
Hanze ya Monument, hari na none ikibumbano cy'umugabane wa Afurika
Hanze ya Monument hari ahantu habera ibitaramo. Mu minsi ishize, Davido yahakoreye icyitwa 30 Billion concert gisa neza n'icyo yakoreye i Kigali
Car Rapide ni imodoka zanditse amateka muri Sénégal. Abaturage bazifata nka gakondo yabo kuko zakorewe mu gihugu mu myaka yo hambere
Uzahasanga imodoka zimeze gutya zitwara abantu mu buryo bwa rusange... Icyitonderwa: Iri si idirishya!
Mu muhanda nta bya casque...
Ifarasi ni itungo rikomeye. Ni ntakumirwa no mu muhanda kuko n'umu-gendarme ntashobora kuyihagarika
Umuhanda werekeza mu Mujyi rwagati ahari rond-point yitwa Sandaga ari naho RwandAir ikorera
Stade yitiriwe Léopold Sédar Senghor niyo nkuru y'Igihugu. Yakira abafana bagera ku bihumbi 60 bari kureba umupira w'amaguru. Iherereye ku muhanda ugana mu gace kitwa Yoff
Niba utwaye imizigo urugi rukanga gufungika, ubu ni bumwe mu buryo wakoresha ukagenda nta kibazo...
Bank of Africa ifite amashami muri iki gihugu, nabonye Abanyarwanda benshi ariyo bagannye...
Ifarasi ziba zibisikana n'imodoka nta kibazo
Umuhanda werekeza ku kibuga cy'indege ni Auto-Route, aho abatwaye imodoka basabwa kwishyura
Kubera ubucucike bugaragara i Dakar, hari kubakwa undi mujyi ukomeye ahitwa Diamniadio [Soma: Diyaminajo] uzaba urimo inyubako za leta, ibikorwa by'ubucuruzi n'ibindi
Zimwe mu nyubako z'uyu mujyi ziri hafi kurangira
Muri Auto-Route werekeza ku Kibuga cy'Indege cyangwa se mu bindi bice nka Saly, umuntu yemerewe kugenda ku muvuduko wa kilometero 110 ku isaha
Mu marembo y'Ikibuga cy'Indege cyitiriwe Blaise Diagne ni uku hateye
Iki kibuga cy'Indege gishya cyafunguwe ku wa 7 Ukuboza 2017 nyuma yo kuzura gitwaye hafi miliyoni 600 z'ama-euro
Blaise Diagne witiriwe iki kibuga, niwe mwirabura wa mbere wabaye mu Nteko Ishinga Amategeko y'u Bufaransa nk'umudepite
Ku Kibuga cy'Indege ni uku wishyura...
Aha ni mu marembo yinjira anasohoka mu kibuga cy'indege
Iyi izaba ari Stade ya Basketball iri kubakwa mu mujyi mushya
Umubare munini w'abaturage ni Abayoboke b'Idini ya Islam
Iyo ni Car Rapide, imodoka gakondo y'abanya-Sénégal
Sénégal ni igihugu cy'imirambi ku buryo uterera amaso ukabona ahantu kure. Aha ni mu muhanda werekeza ahitwa M'Bour uca hafi y'ikibuga cy'indege
Saly ni wo mujyi wa ba mukerarugendo
Buri gace kaba gafite pulake yako yihariye. Nk'imodoka z'i Dakar ziba zifite 'DK naho nk'iyi ya Thies ni 'TH'
Clando nazo zikora taxi ariko mu buryo butemewe
BNP Paribas ya banki ishinjwa kugira uruhare muri Jenoside yakorewe Abatutsi nayo igaragara muri uyu mujyi
Muri iki gihe, Essence iri kugura 695 CFA
Hari abatembera bakajya kuryoherwa n'ubuzima mu mazi ya Atlantique i Saly
I Saly ku nkombe ya Atlantique, ni ahantu hakurwa na ba mukerarugendo cyane abaturutse mu Burayi
Iyo ugiye kwinjira muri Auto-Route, ubona icyapa kimeze gutya kibikumenyesha
Imodoka nk'izi nazo ushobora gukubitana nazo mu muhanda...
Car Rapide zikora nka twegerane zabaga mu Rwanda hambere
Ni uku baba bameze mu muhanda...
Aba bari bavuye gutashya inkwi, ifarasi ibacyuranye n'imitwaro yabo
Mu mihanda yo mu nkengero z'umujyi uhura n'inka zitambuka muri kaburimbo. Kubera ikibazo cy'izuba rituma ubwatsi bubura, zigaburirwa ibiryo bisanzwe byanarimba bagafata ibipapuro bakabishyira mu mazi ubundi zikabirya
Muri Weekend uhura n'abana bashaka kuzavamo ba Sadio Mané bashya
Ibendera ry'u Rwanda rizamuwe kuri Ambasade yarwo iri Dakar muri Sénégal
Ambasade y'u Rwanda muri Sénégal imaze imyaka irindwi ifunguwe aho ikorera Almadies

Amafoto: Philbert Girinema


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza