Byinshi ku kirunga cyihariye cya Bisoke, kigiye gukundisha abanyarwanda ubukerarugendo

Yanditswe na Ferdinand Maniraguha
Kuya 20 Kanama 2018 saa 06:52
Yasuwe :
0 0

Kuwa Gatandatu tariki 25 Kanama 2018, abanyarwanda babyifuza bazoroherezwa kuzamuka no gusura ikirunga cya Bisoke, gifite umwihariko wo kuba ari cyo cyonyine gifite ikiyaga ku gasongero.

Uru ruzinduko rwateguwe na sosiyete itembereza ba mukerarugendo Home Rwanda Safaris, muri gahunda yayo ngarukakwezi igamije gushyigikira Guverinoma mu gushishikariza abanyarwanda gusura ibyiza bitatse igihugu.

Umuyobozi Mukuru wa Home Rwanda Safaris, Tuyigire Aimable yabwiye IGIHE ko impamvu bahisemo kuzamuka Bisoke ari uko ari ikirunga cyihariye nyamara abantu badakunze gusura kandi gifite ibyiza byinshi bitaboneka ahandi.

Gifite ubutumburuke bwa metero 3711. Ni ikirunga cyazimye kuko giheruka kuruka muri Kanama 1957.

Tuyigire yavuze ko uretse kuba gifite ikiyaga hejuru ku gasongero, iyo uri hejuru yacyo uba witegeye imisozi myiza n’ibibaya by’u Rwanda, imisozi yo mu gihugu cya Uganda ndetse no muri Repubulika Iharanira Demokarasi ya Congo.

Ati “Uba witegeye u Rwanda, hirya yawe bakwereka muri Uganda ndetse no muri Congo. Ikiyaga gihari nacyo giteye ubwuzu ku buryo abahageze bahungukira byinshi bitandukanye.”

Iki kirunga kandi kiriho ishyamba ririmo ibiti byinshi kimeza ndetse n’inyamaswa nto zitandukanye.

Kuzamuka Bisoke umuntu umwe bizamusaba kwishyura 35 000 Frw, abantu babiri (couple) bishyure 45 000 Frw naho umunyamahanga yishyure amadolari 110.

Muri ayo mafaranga hazaba harimo itike y’urugendo, ibyo kurya bya saa sita ndetse n’utwo guhekenya (snacks).Harimo kandi amafaranga yo kwinjira muri pariki n’umuntu uzafasha abakerarugendo gusobanukirwa ibyiza biyirimo.

Tuyigire avuga ko bateguye uru rugendo nyuma yo kubona ko abanyarwanda bifuza gusura ibyiza by’iwabo ariko ababibafashamo ari bake.

Ati “Twasanze hakirimo ikibazo cy’uko nta bantu batanga iyo serivisi, nibwo twavuze duti ‘niba dufite ubumenyi mu bijyanye n’ubukerarugendo, ni gute twagerageza gufatanya n’igihugu cyacu kugira ngo abanyarwanda bamenye ibyiza igihugu gifite.Usanga kenshi byitwa ngo ni iby’abanyamahanga kandi batagomba kuturusha ibyacu.”

Amatike ari kugurishirizwa ku biro bya Home Rwanda Safaris kuri Champion Hotel i Remera cyangwa kuri 0788206999.

Ku gasongero ka Bisoke hariyo ikiyaga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza