Kwamamaza

Byinshi ku Ijuru rya Kamonyi ribitse amateka akomeye y’abami n’imitegekere y’u Rwanda

Yanditswe kuya 30-09-2016 saa 15:12' na Rabbi Malo Umucunguzi


Ijuru rya Kamonyi, ni ahantu nyaburanga habumbatiye amateka akomeye y’u Rwanda, abahanga bakavuga ko hatuwe n’abami bagera kuri 12, ndetse hakagarukwaho ubwo Umwami Yuhi Mazimpaka yahatangirizaga imitegekere itari isanzwe mu gihugu.

Ijuru rya Kamonyi risa n’iryigiye hasi ugereranyije n’udusozi turikikije,ku buryo kuhitegereza neza uba uhagaze ku gasozi ka Sholi.

Nsengimana Evase w’imyaka 65 unafite ikigo cy’ubushakashatsi n’ubucurabwenge gikorera Kamonyi (Kamonyi Research Center), yavuze ko ahanini amateka y’Ijuru rya Kamonyi agizwe n’abami batandukanye bahatuye.

Gusa uyu munsi nta kimenyetso cyakwereka ko hari umwami wahatuye, icyo uhabona ni imirima y’abaturage n’inzu z’amategura zitatanye.

Nsengimana ati “Mbere y’uko Kigali iba umurwa mukuru, hariho umurwa mukuru wa Kamonyi, ari na ho abami bategetse u Rwanda cyane cyane kuva ku witwa Ruganzu I Ndoli na we yabaye aha, akaba yarabaye mu ijuru rya Kamonyi kugeza kuri Yuhi Mazimpaka wahitiriwe kuko yari umuhanga cyane kandi yari umusizi ukomeye.”

Ijuru rya Kamonyi rifite imisozi ine irikikije, harimo akitwa Akirwanda, Nyenyeri na Sholi, ari nako karekare muri two.

Nsengimana yakomeje agira ati “Sholi ni ho ingabo z’umwami zari zikambitse kugira ngo zibashe kugenzura igihugu cyose. Uri kuri aka gasozi areba amajyepfo,amajyaruguru, iburasirazuba n’uburengerazuba. Niho ingabo z’abami bose zakambikaga kugira ngo zibashe no kumurinda.”

Niho hatangiriye imitegekere igezweho

Ijuru rya Kamonyi hatuwe n’Umwami Mazimpaka, ariko akaba yari umuhanga cyane kuko niwe wazanye imitegekere yifashisha ibiro biri hanze y’urugo.

Nk’uko Nsengimana yakomeje abisobanura, “Aho Paruwasi ya Kamonyi yubatse ubu hari ingoro ye y’akazi, aho yahuriraga n’abatware bamuhagarariye mu gihugu cyose. Noneho nimugoroba abagaragu be bakamuheka bakamujyana aho atuye, mu gitondo bakongera bakamuheka akajya kukazi cyangwa se akajya n’ahandi hirya no hino kuko ntabwo yari afite urugo rumwe gusa.”

“Kuba turi aha, turi mu mutima w’igihugu. Turi noneho no mu mutima w’amateka y’igihugu. Aho Kamonyi ibundikiye amateka y’igihugu cyacu aho mu bami bategetse u Rwanda, abagera kuri 12 bose babaye ahangaha, kugeza kuwa nyuma Musinga. Utarahabaye ni Rudahigwa wa nyuma wabaye i Nyanza, ariko Musinga nyuma y’intambara yo ku Rucunshu yaje hano, ahava ajya i Nyanza.”

“Abandi ba mbere babaye mu Rwanda rwa Gasabo, kuko u Rwanda turimo rw’ubungubu ni urwanda rwa Kamonyi nk’uko Padiri Muzungu Bernardin yabyanditse.”

Uzamuka ugana ku Ijuru rya Kamonyi, hari ahitwa mu Rusukiro, hakaba no mu gasanteri k’ubucuruzi bita mu Nturo za Kamonyi, ari naho abantu bavunyishaga mbere yo kugera ibwami, bakakirirwa mu ngoro ye cyangwa mu rugo, iruhande hakaba ahitwa mu Nkingo za Kamonyi, aho umwami Rwabugiri yatuye.

Nsengimana avuga ko leta za mbere zitashatse kuhabungabunga kuko zabifataga “nk’amateka y’abatutsi”, muri iki gihe akaba ari bwo biri gushyirwamo imbaraga.

Iyo uva ku ijuru rya Kamonyi usatira Kaburimbo, niho usanga amasuka yahashyizwe na Papa Yohani Pawulo wa Kabiri mu 1990.

Umuyobozi ushinzwe iterambere ry’ubucuruzi n’umurimo mu karere ka Kamonyi, Habimana Innocent, avuga ko Papa yaje mu Rwanda nawe agasanga atataha adasuye umutima w’u Rwanda n’umurwa w’abami.

Ati “Byatumye umushumba wa Kiliziya gatolika ku Isi, mu gihe yasuraga u Rwanda yifuza kurusura ariko akagera no mu mutima warwo, ari nabyo byatumye ashyira uru rwibutso ahangaha rugaragaza igihango cya kiliziya gatolika n’Abanyarwanda.”

Uru rwibutso yahashyize kuwa 8 Nzeri 1990, rugizwe n’amasuka abiri agaragaza ubuhinzi n’igitebo kibika umusaruro, hejuru hakaba inyuguti za IHS (Iesus Humanium Salvator) zishushanya amagambo y’ikilatini asonabura ko Yezu ari Umukiza w’abantu.

Habimana akomeza avuga ko ibi bimenyetso byose bikomeza kubungabungwa, nk’ahamaze kubakwa inzu ya Guest House yiswe Ijuru rya Kamonyi, ku buryo aha hantu nyaburanga hagira uruhare mu iterambere ry’aka karere.

Ati “Muzamuka mbere yo kugera Kamomyi, hari aho akarere gafatanyije n’abikorera bahashyize Guest House, ni icyiciro cya mbere. Ibindi turateganya ko kuri Ijuru rya Kamonyi, hazajya ibikorwa biranga amateka yaho. Duteganya ko n’iyo twahagurira iyinyubako yacu, noneho ugeze muri Kamonyi akaba yanarara aho abami babaga.”

Akarere ka Kamonyi kanafite ahitwa ku biti bitanu, Abadage banzuye ko ariho mu mutima w’u Rwanda, ku muhanda ugana Remera Rukoma hafi n’ibiro by’akarere.

Ikigo cy’Igihugu cy’Iterambere, RDB, gikomeje gushishikariza Abanyarwanda gusura ibyiza nyaburanga igihugu gifite, aho kugira ngo bikomeze kwiharirwa n’abanyamahanga gusa, muri gahunda yiswe "Tembera u Rwanda".

Iki kigo kandi cyashyizeho uburyo bwo gusura ahantu nyaburanga ku buntu,kuri uyu wa Gatanu hakaba hatangiriwe ku nzira ndangamateka yo mu majyepfo, ireba ku byiza bigize uturere twa Kamonyi, Muhanga, Ruhango, Nyanza na Huye.

Biteganyijwe ko mu Ukwakira, Ugushyingo n’Ukuboza, hazaba hari imodoka imwe buri kwezi izajya ifasha abantu gusura ahantu nyaburanga ku buntu no kwinjira ahasurwa bikaba ubuntu.

Muri gahunda ya Tembera u Rwanda, RDB yashyizeho imodoka zizajya zifasha abanyarwanda gusura ahantu nyaburanga ku buntu
Guest House yiswe Ijuru rya Kamonyi, ni kimwe mu bikorwa byo kubungabunga aka gace k'amateka
Habimana asobanura amateka y'Agasozi k'Ijuru rya Kamonyi
Ibimenyetso by'urwibutso Papa Yohani Pawulo II yashyize ku Ijuru rya Kamonyi

Amafoto:Luqman Mahoro


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved