Akarwa k’Abakobwa n’Ibigabiro bya Rwabugiri i Nyamasheke bigiye gutunganywa

Yanditswe na Sitio Ndoli
Kuya 21 Gashyantare 2018 saa 11:22
Yasuwe :
1 0

Akarere ka Nyamasheke kari mu mushinga wo gushyira ibimenyetso ku hantu nyaburanga hahishe amateka yo hambere agaragaza imibereho y’Abanyarwanda aho kazahera ku Karwa k’abakobwa ahajugunywaga abatwaye inda z’indaro no ku Bigabiro by’Umwami Rwabugiri.

Nyamasheke iri mu turere tw’u Rwanda dukungahaye ku byiza nyaburanga birimo Pariki y’Igihugu ya Nyungwe, Ikiyaga cya Kivu, amateka y’abami bahatuye n’abahateguriye ingamba n’ibindi.

Abaturage b’i Nyamasheke bagaragaza ko ubukungu bushingiye ku byiza nyaburanga n’amateka biyirimo bikwiye kwitabwaho byihariye bikabyazwa amadovize binyuze mu bukerarugendo.

Abaganiriye na IGIHE bagaragaje ko hakenewe kubakwa ibikorwaremezo birimo hoteli zigezweho zacumbikira ba mukerarugendo baje kwihera ijisho ibyiza nyaburanga.

Kamirindi Théogène yagize ati “Hagomba kumenyekana kuko hafite uburanga butabyazwa umusaruro, biracyari hasi cyane. Nko ku kiyaga ubona ukuntu ari heza ariko usanga henshi nta hoteli zihari kandi zije zakwinjiza amafaranga menshi cyane.”

Kubwimana Thomas yasabye ubuyobozi kureshya abashoramari bazana ibikorwaremezo muri Nyamasheke.

Yagize ati “Akarere ka Nyamasheke kugira ngo gatere imbere n’abantu bahari babone icyo bakora gakwiye kohereza abashoramari, nibo dukeneye kuko nibaza amajyambere azaboneka. Hano turacyari inyuma, ubukerarugendo ntabwo dufite kubera ko nta hoteli zihaba, ba mukerarugendo ni ugutambuka bigendera. Urebye nk’ibigabiro bya Rwabugiri no ku Karwa k’Abakobwa, bitunganyijwe byakurura ba mukerarugendo b’impande zose z’Isi.”

Ibigabiro by’Umwami Rwabugiri biri mu Murenge wa Kagano, ahahoze urugo rwe, ari na ho yahagurukiraga agabye igitero ubwo yafataga Idjwi (ubu ni muri Repubulika Iharanira Demokarasi ya Congo). Umwami Rwabugiri kandi yagiraga n’urundi rugo ku Kabunyoni ka Nyamirundi, ubu ni mu Murenge wa Nyabitekeri.

Umuyobozi w’Akarere ka Nyamasheke, Kamali Aimé Fabien, yavuze ko bari muri gahunda yo guteza imbere ubukerarugendo binyuze mu mikoranire n’inzego zitandukanye.

Yagize ati “Ku bufatanye n’inzu ndangamurage y’u Rwanda, ibigabiro bya Rwabugiri n’Akarwa k’Abakobwa kari mu Kiyaga cya Kivu n’ahandi hatandukanye turi gushaka uburyo twamenyekanisha amateka yacu, akabyazwa umusaruro mu buryo bw’ubukerarugendo n’ubw’iterambere.”

Kamali yakomeje avuga ko batangiye kubaka ibikorwaremezo ku nkengero za Kivu birimo imihanda, kuhageza amashanyarazi n’ibindi ndetse hari n’abashoramari batangiye kuhagura ibibanza.

Muri aka gace kandi hanubatswe ikibuga cy’indege kizajya gifasha ba mukerarugendo kugendera muri kajugujugu bareba ibyiza bigatatse mu gihe ahari amateka yihariye hazashyirwa ibyapa bihagaragaza.

Akarwa k’Abakobwa gaherereye hagati mu Kiyaga cya Kivu kajugunywagaho abatwaye inda z’indaro rimwe na rimwe Abashi baturutse ku Idjwi bakaza kubatwara. Kujugunya abakobwa byakorwaga ngo badasiga umuryango icyasha ndetse bikabera abandi isomo ryo kutiyandarika.

Akarere ka Nyamasheke nta mibare gatanga ya ba mukerarugendo bagasura bitewe n’uko nta buryo buriho bwifashishwa mu kuyikusanya.

Imbaraga zishyirwa mu rwego rw’ubukerarugendo mu gihugu zizatuma inyungu yabwo igera kuri miliyoni $ 800 mu myaka irindwi iri imbere, zivuye kuri miliyoni $440.

Abasura Akarere ka Nyamasheke batembera ku nkengero z'Ikiyaga cya Kivu, abandi bagasura Akarwa k'Abakobwa
Ibikorwaremezo byatangiye kubakwa ndete hari ikibuga cy'indege kizajya gifasha ba mukerarugendo kugendera muri kajugujugu bareba ibyiza bitatse Nyamasheke
Ibigabiro by'Umwami Rwabugiri biri mu Murenge wa Kagano mu Karere ka Nyamasheke aho yari afite urugo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza