Ahari Ubutayu bw’Abarokore hasigaye hinjiriza u Rwanda akayabo

Yanditswe na Uwishyaka Jean Louis
Kuya 2 Nzeri 2016 saa 08:29
Yasuwe : XX
0

Ubuvumo bwa Musanze bwahoze ari ahitwa mu butayu (ahiherereye Abanyamasengesho bazwi nk’abarokore basengera), ubu ni hamwe mu hakorerwa ubukerarugendo bwinjiriza u Rwanda akayabo, aho mu mwaka ushize bwinjije miliyoni 318 z’Amadolari.

Ubuvumo ni inzira inyura munsi y’ubutaka. Ubwa Musanze bwo buherereye mu Murenge wa Muhoza kimwe n’ubwo mu Murenge wa Kinigi, ariko bwo bukaba bwihariye.

Bahizi Edouard, Umukozi wa RDB muri Pariki y’Ibirunga, atangaza ko ubuvumo ari kimwe mu byo ba Mukerarugendo basura muri iyo Pariki kuva mu mwaka wa 2013, nyamara mbere yaho bukaba bwarifashishwaga nk’ahantu hatuje ho gusengera gusa, ku buryo nta kindi hari hamaze.

Bahizi ati “Ubuvumo abaturage b’inaha barabuzi cyane, kuko bajyaga babusengeramo, ukumva ngo umuntu yagiye mu butayu, ubu ni bwo babaga bavuga.”

Mbere kwinjira muri ubwo buvumo, byari ubuntu maze abaturage bakahazana ibibazo cyangwa ibyifuzo baje gutura Imana, ariko ubu noneho habaye ahantu ho gucuruzwa, ku buryo n’ushaka kuhasengera koko yaza akahagira ubutayu, ariko noneho asabwa kubanza kwishyura kimwe n’abandi bakora ubukerarugendo.

Bahizi akomeza agira ati “Ubu bwabaye igicuruzwa cy’ubukerarugendo, aho umunyarwanda ushaka kwinjiramo abanza kwishyura amafaranga y’u Rwanda 4000 n’aho umunyamahanga akishyura amadolari 50.”

Ubuvumo bwa Musanze bureshya n’ibirometero bitandatu, bukaba bugabanyijemo uduce (Segments) icyenda.

Ubwo buvumo bwatekerejwe kugirwa ahantu nyaburanga hasurwa na ba Mukerarugendo, nyuma y’aho Pariki y’Ibirunga itangiye kujya yinjiza amadovize mu buryo bufatika, RDB igatangira gutekereza uburyo yakwagura ibikorwa bishobora gukurura ba Mukerarugendo.

Nubwo RDB yahise itangira umushinga wo gutunganya ubwo buvumo bwa Musanze ku bufatanye n’Inkeragutabara, imirimo ikaba yarasojwe mu 2013, itwaye akayabo ka miliyoni zigera kuri 200.

Ese ubwo buvumo ni karemano?

Bahizi yatangarije IGIHE ko ubuvumo bwa Musanze bwavutse bitewe n’iruka ry’ibirunga mu myaka myinshi yashize, ndetse ngo ubushakashatsi bwose bwakozwe, ntibubasha kugaragaza igihe ibyo birunga byarukiye, gusa hakekwa ko ngo bwavutse mu myaka isaga miliyoni 65 ishize.

Gusa ikiri ukuri ni uko atari karemano, kuko n’amabuye abwubatse bigaragaza neza ko ari amakoro.

Mu Ntara y’Amajyaruguru honyine habarurwa ubuvumo 52, mu Karere ka Musanze hakaba ubugera kuri 12.

Ubu buvumo busurwa cyane bwahoze ari ubutayu abarokore basengeragamo biherereye
Izina rya kamwe mu duce tugize ubuvumo bwa Musanze
Mu buvumo hari ahagenewe kwitekerezaho, aho abahageze bazimya amatara bagaceceka abashatse bagasenga
Mu buvumo harimo n'ahazamuka
Ubuvumo ni igice gisurwa muri Pariki y'Ibirunga
Bahizi Edouard, Umukozi wa RDB muri Pariki y’Ibirunga, avuga ko ubu buvumo buri mu bice bisurwa cyane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza