Ahahoze urugo rw’Umugabekazi Kankazi hagiye gushyirwa ingoro y’amateka

Yanditswe na Kanamugire Emmanuel
Kuya 1 Ukwakira 2016 saa 08:23
52 32

Ubuyobozi bw’Akarere ka Muhanga, bukomeje inyigo yo kubungabunga ahahoze urugo rw’Ubugabekazi Kankazi Ladegonde, ufatwa nk’umugore witaye kuri bagenzi be ndetse akabatoza umuco wo gukora.

Ahahoze urugo rw’uyu wari umugore w’Umwami Musinga, harasenywe ndetse ubu nta kimenyetso cy’inyubako gihari, uretse ikibuga uhasanga n’urukuta rudafite ikindi kiruranga.

Umuyobozi wungirije w’akarere ka Muhanga ushinzwe imibereho myiza y’abaturage, Mukagatana Fortunee, usanzwe unavuka mu murenge wa Shyogwe, avuga ko Kankazi wari utuye muri uyu murenge mu kagali ka Mubuga, yagaragaje ubutwari bukwiye kuranga umugore w’Umunyarwandakazi.

Mbere Musinga yari yaramutuje ahitwa mu Kigabiro naho mu karere ka Muhanga, umuhungu wabo Mutara Rudahigwa waje kubatizwa Charles Leon Pierre, amaze kwima ingoma mu 1931, aza kumwimurira muri aka kagali ka Mubuga, aho yabanaga n’umuvandimwe we Kabanyama Immaculata.

Mukagatana yagize ati “Nk’umugabekazi, aha yari akeneye iby’ingenzi kugira ngo ahature. Yari ahafite inzu za kijyambere zubatse n’amatafari ahiye zisakaje amategura, ariko nta mashanyarazi yabagamo. Ariko hari hari amazi bari baravanye hano hepfo mu gishanga bakayayungurura. Kubera ko yari umugabekazi mwiza wayoboraga neza, ayo mazi ntabwo yayihariye.”

Ahavugwa ko ariho Kankazi yari atuye, ubu hari ikibuga n’urukuta ruhagaze, ababizi bakavuga ko rwari inyuma y’urugo, rukoze neza ruriho amazi abashaka bose bazaga kuvoma ntawe usabye.

Akomeza agira ati “Muri uko gutura hano yari umukirisitu cyane ko n’umuhungu we Rudahigwa yari yarabatijwe, akagira n’imodoka imujyana gusenga i Kabgayi mu gitondo, ni hano hafi.”

Kankazi kandi ngo yagiraga ibirori bimutaramira, amatorero yo hafi aho akabigiramo uruhare ndetse abenshi bakagororerwa, bagatunga inka batyo.

Azwiho kandi kuba yarajyaga kuzanira abana amata i Gitarama ndetse n’iwe akayakiriza abana, agafata igihe kinini asura abaturanyi be ndetse agatoza abandi bagore gutegura, n’ubwo iwe habaga hateguye impu mu gihe abandi bakoreshaga ‘inyegamo’.

Ubutwari bwe bugiye gusigasirwa

Mukagatana yavuze ko nk’akarere aho yari atuye bahafitiye inyigo izarangirana na 2017 yo kuhubaka inzu ndangamurage igaragaza iterambere ry’umugore w’Umunyarwandakazi, nubwo isambu yari atuyeho abaturage bagiye bayihaho.

Ati “Hano hari umushinga wo kuhakora, Kankazi yabaye umugore w’intangarugero, twese turabizi ko abagabekazi igihe abana babo babaga ari batoya, babayoboreraga. Kankazi icyo yaragikoze kandi yayoboye neza. Ubwo yabaye umugore umwe mu bayobozi b’u Rwanda bayoboye neza.”

Yavuze ko uretse n’uburyo Kankazi yabanaga n’abaturayi be, yabaye umugore wayoboye neza mu gihe ubwami bwari mu nzira bubisa repubulika, ku buryo amateka ye adakwiriye kwibagirana.

Ati “Amafoto tuzabona y’abagore babaye mu buyobozi mu gihe kuva mu gihe cya cyami kugeza hano tuzayafata tuyashyiremo, ibikorwa bagiye bakora tuzabifata tubyanduke tubishyiremo, hanyuma nitunarangiza kandi twerekane ibikorwa abagore bagiye bagiramo uruhare muri iki gihugu.”

“Iyo ni inzu umuntu yakwinjira muri Muhanga, yakwinjira kwa Kankazi akavuga ngo ndashaka kumenya imibereho y’umugore wo mu Rwanda wa kera, akaza akabisanga hano. Icya kabiri, umugore wo mu Rwanda agomba gukomeza gutera imbere. Aya mazu hazaba harimo iyo nzu ndangamurage, ku ruhande hazaba harimo ikigo cy’amahugurwa, izajya ifasha abagore n’abari kurushaho kwihugura mu myuga ya kigore iteza imbere.”

“Muri ya mateka y’igihugu ni ukugira ngo ataducika. niba abagore baradodaga, badode. Niba barabohaga, babohe, ariko babohe ibizamutse hejuru. Niba ari ugukora imitako nibatake, kubera ko umugore w’Umunyarwanda yaratakaga inzu ye ikaba nziza.”

Aha hantu ni hamwe mu habitse amateka y’igihugu, Ikigo cy’Igihugu cy’Iterambere, RDB gikomeje gukangurira Abanyarwanda gusura bakamenya amateka habitse, mu gikorwa yise ‘Tembera u Rwanda’, kugira ngo banyarwanda ubwabo bazabiratire Abanyamahanga.

Muri izo gahunda, ikigo Wilson Tours, cyateguye ko buri mpera z’icyumweru kizajya gifasha Abanyarwanda batandukanye gusura ibice nyaburanga binyuranye bakamenya amateka yabo, aho kugira ngo ubukerarugendo bukomeze kwiharirwa n’Abanyamahanga.

Icy kigo kivuga ko gusura ibice nyaburanga by’igihugu bitagikwiye gufatwa nk’ibihenze, kuko nko mu 35 000 Frw Abanyarwanda bishyura bahabwa imodoka ibatwara, kwinjira aho gusura, kubafasha muri urwo rugendo n’amafunguro ya mu gitondo.

Umuyobozi wungirije w’akarere ka Muhanga ushinzwe imibereho myiza y’abaturage, Mukagatana Fortunée
Ahahoze urugo rwa Kankazi hagiye kubakwa ingoro iranga amateka y'Abanyarwandakazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE