Rubyiruko, tubaheshe icyubahiro bakwiye, aho kubandagaza kandi batakiriho

Rubyiruko, tubaheshe icyubahiro bakwiye, aho kubandagaza kandi batakiriho


Yanditswe kuya 7-04-2013 - Saa 16:34' na Sengo Niyoyita Christian

Ubwanditsi : Sengo Niyoyita Christian wanditse iki gitekerezo ni umunyarwanda w’imyaka 25 utuye mu gihugu cy’u Busuwisi. Yacitse ku icumu mu gihe cya Jenoside yakorewe Abatutsi. Kuri ubu ni ingénieur/Engineer ugikomeza amasomo yisumbuyeho mu Busuwisi mu bijyanye n’ingufu z’amashanyarazi.

— 

Hashize imyaka 19 urwatubyaye ruhekuwe. Imbaga y’Abatutsi barenga miliyoni yarishwe mu 1994.

Abanyarwanda benshi babuze ababyeyi, abavandimwe, incuti, abana ndetse n’abafasha. Imiryango imwe yarazimye burundu, indi isigaranye mbarwa.

Nyuma y’imyaka 19 agahinda karacyuzuye imitima ya benshi, kandi kazahoraho kuko ibyakorewe abacu ntituzabyibagirwa na gato, ndetse tuzabibwira n’abana bacu kugira ngo nabo babyirinde ntibizongere ukundi.

Nyuma y’imyaka 19 umuntu yakwibaza ati ni gute umunyarwanda yakwibuka? Ese iyo tuvuze kwibuka duharanira kwigira byaba bishatse kuvuga iki? Izi ngingo ni zo tugiye kurebera hamwe muri iyi nyandiko.
Jenoside yakorewe Abatutsi yasize urubyiruko rwinshi rw’imfubyi, hakaba harimo abari bato cyane ariko ubu umuto kurusha abandi afite imyaka 19.

Rubyiruko, nta kibi kirimo iyo twibuka ababyeyi bacu abavandimwe ndetse n’incuti tukaba twarira ndetse tukagira n’agahinda kenshi cyane. Ibi birunvikana kuko twarababaye cyane ku buryo kwihangana bitoroshye. Twabuze ababyeyi tukiri bato aho twari tubakeneye cyane, twavukijwe uburenganzira bwo kurerwa n’ababyeyi bacu. Ariko se umuntu yakwibaza niba bigomba kugarukira aho? Ese tugomba guheranwa n’agahinda ? Ese ababyeyi bacu aho bari icyo bifuza ni ukutubona twarishwe n’agahinda cyangwa ni ukutubona twararenze ako gahinda tukavamo abagabo babahesha icyubahiro?

Rubyiruko, nkeka ko iyo tuvuze kwibuka duharanira kwigira bivuga ibintu byinshi, harimo uko twitwara kugira ngo twuse ikivi cy’ababyeyi bacu ndetse no kugirango tubaheshe icyubahiro bakwiye, aho kugira ngo tubandagaze kandi batakiriho.

Rimwe mu masomo akomeye dukwiye kuvana muri jenoside yakorewe abatutsi ni uko umugabo yigira yakwibura agapfa. Kandi ntitwibagirwe ko ubabaye ariwe ubanda urugi. Ibi twese twarabibonye aho amahanga yarebereye abicaga inzira karengane mu gihe cy’iminsi 100 ntagire icyo akora.

Ibi bikwiye kutwereka ko dukwiye guhaguruka tukiyuha akuya tugakora tukubaka igihugu maze abazadukomokaho tukabasigira umurage mwiza ndetse n’igihugu gitemba amata n’ubuki.

Kwibuka duharanira kwigira kandi bivuze kwihesha agaciro ndetse tukagahesha n’ababyeyi, incuti ndetse n’abavandimwe twabuze.
Urebye wasanga bamwe muri twe tudahesha ababyeyi bacu agaciro ndetse n’icyubahiro nyamara kandi tuzi neza ko twasigaye hari mpanvu ndetse hari n’inshingano dufite.

Umuntu yakwibaza ati ese iyo twibuka ababyeyi batubyaye, ntibyagombye gutuma twibaza icyo bo bashaka kutubonamo nyuma y’imyaka 19 baratabarutse? Ese barashaka kubona inkumi yabo yirirwa mu tubari, ihinduranya abagabo uko bwije n’uko bukeye ? Itwara inda z’indaro cyangwa se yicwa na Sida kandi yararokotse umuhoro ? Hari igihe nsanga nabo iyo babonye imyitwarire ya bamwe muri twe nabo bajya mu cyunamo,

Nkeka ko Nyina umubyara yifuza ko incuti n’abavandimwe bamutahira ubukwe. Ko bamusaba, bakamukwa nk’uko Se yabikoze. Aho kugirango abyarire m urugo cyangwa se yicwe na Sida.

Uwo musore se we wirirwa mu nzoga, imogi, indaya n’ibindi, amashuri yaramunaniye, barumuna be yasigaranye aho kugirango abahe indero ababyeyi be bamusigiye, umurage abaraga ni uburara. Nibaza ko aho Se na Nyina bari bahora mu cyunamo, kandi ko barira arusha kure ayo twe turira tubibuka. Muzi neza urwagashinyaguro bapfuye nimureke tureke kubabaza twiheshe agaciro ari nako tukabahesha.

Rubyiruko ni mureke kwibuka tubigire ibya buri munsi, ntibibe amarira gusa, bibe n’ibikorwa. Nemera ko urubyiruko rw’u Rwanda rwababaye kuko rwabaye imfubyi hakiri kare ariko igihe kirageze ko kwibuka tubishyira ku yindi ntera, tukava mu gahinda n’ubwo bitoroshye, ariko ntitwirengangize ko kuri iyi si nta cyoroshye kihaba, kandi kuba intwari biraharanirwa. Nimureke twubake urwatubyaye, maze aho bari bajye batwirahira ko batabyaye ibigwari.

Ni mureke duharanire ko ibyabaye bitazongera kuba, duharanire amahoro, ubukungu ndetse n’iterambere. Ibi ntabwo tuzabigeraho twicaye, tugomba kuvunika, kuko imbuto y’umugisha yera ku giti cy’umuruho.

Hari urubyiruko rwinshi rwabishoboye, hari ururera barumuna barwo abo dukwiye kubita intwari, kuko barabikwiye. Hari ubu abari muri za kaminuza n’andi mashuri biga bashyize ho umwete n’ubwo bitaba biboroheye kubera ibibazo byinshi harimo ibyatewe na Jenoside yakorewe abatutsi harimo ubukene n’agahinda. Abo bakwiye kwitwa abagabo, bakitwa intwari abandi bakabareberaho.

Ntitube ibigwari rubyiruko, twabyawe n’intwari zatwitangiye kugirango dushobore kubaho, mureke rero tubereke ko bataruhiye ubusa. Nemera ko icyo batwifuriza ari ukudaheranwa n’agahinda, tukava mu maganya, tugakora tutikoresheje tukabaho mu mudendezo. Ibyo ntago bizaturuka mu kirere, tugomba kubiharanira, tukanabikorera ndetse tukabivunikira.

Muri uku kwibuka kandi tugomba kurwanya ihungabana. Hari byinshi bituma urubyiruko ndetse n’abacitse kwicumu muri rusange bahungabana aha navuga ubukene, kutagira aho baba, agahinda, kutagira uwo baganiriza, kuba hari abacitse kwicumu bakicwa, abagipfobya jenoside yakorewe abatutsi n’ibindi n’ibindi. Ntibyoroshye niyo mpanvu nkangurira abanyarwanda muri rusange kuba hafi y’abacitse ku icumu, ntibibe muri iki gihe gusa ahubwo bibe ibya buri munsi, kuko bakeneye inkunga zanyu muri byose.

Abahanga bemeza ko umwe mu miti ikiza uwahungabanye ari ukumuba hafi, ukamwumva, ukamuganiriza. Akeneye umuntu umwunva ntamwite umusazi cyangwa ngo amuseke.

Nawe wacitse ku icumu isuzume niwumva muri iki gihe udakomeye, ntiwirirwe ujya ahantu wumva utari bushobore kwihangana. Abantu ntibakomeye kimwe. Isuzume rero, uhitemo ibyo ushoboye kureba cyangwa kumva muri iki gihe ntibikugireho ingaruka mbi. Ibyo nibyo kwigira kuko ntawundi wabikumenyera. Reka kwisenya kuko warasenyutse bihagije.

-Kwibuka ni ubutwari, kwibibagirwa ni ubugwari! Nimureke tube Intwari rero.

- Duharanire ko ibyabaye bitazongera kubaho ukundi, duharanira kwigira, amahoro, ubukungu, gukunda igihugu, gukunda umurimo ari nako twihesha agaciro tudategereza akimuhana.
Mukomere.

Imana ihe umugisha u Rwanda n’abanyarwanda.

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO