Icyo Tito Rutaremara yakora aramutse abaye Perezida wa Congo Kinshasa

Icyo Tito Rutaremara yakora aramutse abaye Perezida wa Congo Kinshasa


Yanditswe kuya 21-08-2012 - Saa 00:40' na IGIHE

“Ndamutse ngizwe Perezida wa Congo nabanza nkavugurura igisirikare, nkashyiramo discipline kandi nkahemba neza abasirikare, ku buryo Congo igira umutekano, ibindi nkabitunganya buhoro buhoro” Senateri Tito Rutaremara avuga kuri Congo-Kinshasa

Buri gitangazamakuru gikomeye ku isi ntigishobora kumara icyumweru kidakoze inkuru irebana n’igihugu cya Congo kandi u Rwanda rufatwa nk’urufite uruhare rukomeye mu bibazo bya Congo.

Ariko se umutwe wa M23 nicyo kibazo Congo ifite? Ese u Rwanda koko rufasha uyu mutwe? Ese M23 itariho Congo nta bibazo nk’ibi yigeze?
Tito Rutaremara inzobere mu bya politike mpuzamahanga by’umwihariko igihugu cya Congo, asanga igisubizo ku bibazo bya Congo ari abategetsi ba Congo bagomba kugishaka aho kubitsindira u Rwanda.

Rutaremara ati, “Congo ifite imitwe iyirwanya irenga 10, nibahagarika M23 se bazaba bakemuye ikibazo gihari? Uretse ko na M23 itazatsindwa muri buriya buryo, icyangombwa ni ukujya ku muzi w’ikibazo kuko ariho hari ipfundo”.

Senateri Rutaremara avuga ko abategetsi ba Congo bameze nk’umwana wiriza ashaka ko bamuhozaho ijisho, asanga ikibazo gihari ari imiyoborere mibi yakomeje kuranga icyo gihugu uhereye igihe cya Perezida Mobutu Seseseko.

“Abanyapolitiki ba Congo bameze nk’umwana w’umutesi usaba bakuru be ikijumba, bakimwima akarega kuri Papa na Mama ngo baramukubise, Congo yabanje gusaba u Rwanda kuyifasha, u Rwanda rubyanze itangira kuvuga ko rufasha M23.”

Tito Rutaremara akomeza avuga ko “Ikibazo cya Congo kigomba gukemurwa n’ubuyobozi bwa Congo aho guhora basaba u Rwanda ngo rubafashe nkaho rufite inshingano zo gukemura ibibazo byabo.”

Congo irashaka amaboko y’amahanga

Repubulika Iharanira Demokarasi ya Congo ihanze amaso ku ngabo mpuzamahanga zishobora kuyifasha kurandura imitwe yose iyirwanya.

Minisitiri w’Itangazamakuru akaba n’Umuvugizi wa Guverinoma ya Congo Kinshasa, Lambert Mende yatangarije ikinyamakuru “TURKISH WEEKLY” ko bari hafi kugera ku gisubizo cy’ikibazo bafite.

Ati “Turi hafi y’igisubizo cyo kubona ingabo mpuzamahanga zidafite aho zibogamiye zishobora gukora nka MONUSCO. Turatekereza ko noneho iki ari igisubizo”.

M23 yiteguye ingabo aho zizava hose

Abaminisitiri b’ingabo b’ibihugu 7 bahuriye mu Mujyi wa Goma taliki 17 Kanama 2012, bemeza gushyiraho umutwe w’ingabo zivuye mu bihugu by’Afurika zigaterwa inkunga n’Umuryango w’Afurika Yunze Ubumwe ndetse n’Umuryango w’Abibumbye, izi ngabo ngo zizaba zishinzwe kurwanya imitwe yose yitwaje intwaro harimo FDLR na M23.

Umuvugizi w’Ingabo z’u Rwanda, Brigadier General Nzabamwita Joseph yagize ati, “Inama yemeje ko ingabo zizagarura amahoro muri Congo zizava mu bihugu by’Afurika, bemeje kandi gushyigikira ihuriro rigamije guhanahana amakuru hagati y’u Rwanda na Congo”.

Umutwe wa M23 uvuga ko imyanzuro y’inama y’abaminisitiri b’ingabo ntacyo ibatwaye, kandi ngo ishobora gutwara igihe kirekire cyane. Umuvugizi wa M23, Colonel Kazarama Vianney yatangarije ikinyamakuru Izuba Rirashe ko na MONUSCO yananiwe. Ati “Ndumva MONUSCO ariyo ifite ingabo nyinshi ntacyo yagezeho, abo nabo nibaza ntacyo bazadutwara.”

Yongeyeho ko ikibazo M23 ifite kitakemurwa n’imirwano cyangwa gutabaza ingabo z’amahanga, ahubwo ko kizakemurwa no kugirana ibiganiro n’ubutegetsi bwa Joseph Kabila, Perezida wa Congo Kinshasa.

Inkuru ya Izuba Rirashe

TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!

IBITEKEREZO