00:00:00 IGIHE NETWORK KN KINYARWANDA EN ENGLISH FR FRANCAIS

Uruzinduko rwa Perezida Emmanuel Macron mu Rwanda: Ubutwari ntagereranywa

Yanditswe na Mukagasana Yolande
Kuya 31 Gicurasi 2021 saa 02:38
Yasuwe :
0 0

Uruzinduko rwa Perezida w’u Bufaransa, Emmanuel Macron mu Rwanda ni imbarutso y’umubano mushya hagati y’ibihugu byombi ndetse n’ibya Afurika bihuriye ku rurimi rw’Igifaransa. Ni impano itanga icyizere ku rubyiruko rw’impande zombi ko imbere harwo hari icyezezi cy’urumuri cyari cyarafunzwe n’abagome.

Ntibigira uko bisa iyo umubano hagati y’abantu cyangwa se n’ibihugu utangiriye ku kuri. Icyo kikaba aricyo Perezida Paul Kagame w’u Rwanda na Emmanuel Macron w’u Bufaransa biyemeje.

Umubano mushya w’u Rwanda n’u Bufaransa ushingiye ku kuri ko mu mateka. Umubano ushingiye ku bwubahane. Ibyo ndemeza ko bibaye ubwa mbere muri Afurika y’ibihugu bihuriye ku rurimi rw’Igifaransa. Ahandi hose muri iyo Afurika, witonze ukitegereza, usanga u Bufaransa ari bwo bushyiraho Umukuru w’Igihugu nyamara ngo binyuze mu matora, kandi bukaba ari nabwo bumugusha mu mutego wo kuvaho. Kandi nta na rimwe avaho neza.

Iri ni ishimwe rikomeye kuko Perezida Kagame yongeye gukora agashya muri Afurika. Abanyafurika ni bo bagomba kumenya ibibazo byabo, ndetse n’umuti ukwiye wo kubikemura kuko ak’imuhana kaza imvura ihise. Nta muntu ugomba kukwigisha uko uyobora urugo rwawe kuko atakurusha kurumenya nka nyirarwo.

Abavuga Igifaransa bumvise neza amagambo akomeye Perezida Macron yavuze. Nibaza ko abatumvise ko yasabye imbabazi, nyamara yarazisabye mu kinyabupfura, mu magambo yujuje ubuhanga, hari ibyo batari kwifuza.

Nk’umuyobozi w’igihugu, twari dutegereje ko apfukama akavuga ngo mu izina ry’igihugu nyoboye ndasaba imbabazi u Rwanda?

Mbafiteho n’ikibazo: Muribuka Guy Verhofstadt, wari Minisitiri w’Intebe w’u Bubiligi ko yasuye u Rwanda ku wa Mutarama 2000, agasaba imbabazi mu izina ry’Ababiligi? Hakurikiyeho iki? Ntacyo, uretse kutubeshyeshya ngo baciriye imanza abahekuye u Rwanda, bagacira imanza interahamwe nazo nke zuzuyeyo. Ko abarokotse Jenoside nanjye ndimo batsinze, hari icyakurikiye? Abantu bicaranye incarubanza zaho nyamara basabye ibyo inkiko zabageneye, wabaza ikigega kibishinzwe bakakubwira ko ngo keretse icyaha cyarakorewe mu Bubiligi. Nkibaza impamvu bavuga ko baca imanza z’ibyaha bitakorewe iwabo niba ntaho bigeza ababikorewe.

Perezida Emmanuel Macron ni intwari. Ijambo yavugiye ku Rwibutso rwa Jenoside rwa Kigali ku Gisozi ku bumva Igifaransa ni iry’agaciro. Ni intsinzi ku Banyarwanda kuko uwitonze amira ibinoze.

Kwihangana no kudateshuka ku ntego kw’Abanyarwanda byabaye intwaro ikomeye kugira ngo ibyo bigerweho. Kandi ntihagire uwibeshya ko ijambo rye ryashimishije Abafaransa bose, kuko abagize uruhare mu mateka yatugejeje aha, ntibishimiye kuba yemeye icyaha cyakozwe mu izina ry’u Bufaransa, intwaro ikomeye ikaba ibendera riranga igihugu cyabo ryareshejwe agaciro. Abo rero nabo ubutabera burabategereje.

Ni yo mpamvu nsanga tudakwiye kuvuma iritararenga. Mbere ya Macron hari abandi bayoboye u Bufaransa batateye intambwe nk’iyo ateye. Nanone dutegereze ibyo yasezeranije u Rwanda n’Abanyarwanda, tube turetse guca urubanza.

Dore bimwe mu byo Macron yavugiye ku Gisozi. Yatangiye avuga ati “Ijoro ribara uwariraye.’’

Ayo magambo aratwumvisha ijwi ry’abagifite igisebe cyasamye kikiri gishyashya cyo kuba bari bahari na n’ubu bagihari. Abo tutateze amatwi ububabare bwabo, mbere, mu gihe cya Jenoside ndetse na nyuma yayo kikaba gishobora kuba ari nacyo kibi kurusha ibindi.

Abarokotse, imfubyi, ngo dutege amatwi ubuhamya bwabo, umuhate, agaciro byabo ari naho tubonera ko atari umubare cyangwa amagambo, ahubwo kubera uburemere bw’ubuzima bwabo ntasimburwa bushaririye...Imbere yanyu mu cyubahiro no kwicisha bugufi, nje kwemera uruhare rwacu. Kwemera ibyabaye, ariko cyane cyane gukurikirana akazi k’ubutabera.

Abariraye bonyine ni bo baduha impano yo kutubabarira babishatse. Ntawe ukekwaho Jenoside ugomba gucika ubutabera ...Ni umwenda turimo inzirakarengane zishwe. Nyuma yo guceceka igihe kirekire, ni umwenda turimo abakiriho, dushobora, niba babitwemerera kuborohereza ububabare.

... U Bufaransa bufite inshingano yo kwemera uruhare bwagize mu mateka yababaje Abanyarwanda igihe kirekire cyane no kugira ngo ukuri kutamenyekana ...Ayo magambo avuga icyiza ariko gifite izina ariryo Jenoside...Kuko ari ukubaho kwa buri wese n’indoto ze byishwe inshuro miliyoni...Jenoside ntigereranywa n’ikindi, ntacyo wabona uha umuntu ngo kiyimwibagize. Igira aho ituruka, abo yibasira, kandi igategurwa. Ikagira gahunda yo gutsemba abantu n’ubumuntu, kandi ntisibangana...Ntitubaho nyuma ya jenoside, tubana nayo. Ariko kandi u Bufaransa bwagize uruhare ndengakamere rwa politiki muri ayo mateka...

Ntabwo gahunda yacu ari uguhindura mu Kinyarwanda ijambo ryose Perezida Emmanuel Macron yavugiye ku Rwibutso rwa Jenoside rwa Kigali ku Gisozi. Aha turifuza kumara impungenge abumva atavuze abasirikare b’Abafaransa.

Mwibuke ko ziriya komisiyo zombi [iya Duclert yashyizweho na Perezida Macron n’iyitiriwe Muse yashyizweho nu Rwanda], hari ibyo zitarabasha kubona kandi zikaba zikomeje akazi ko gushakisha uruhare rw’u Bufaransa muri Jenoside.

Abanyepolitiki bakoresheje abasirikare ariko hari impapuro zarigitishijwe, ndetse na Ambasade y’u Bufaransa mu Rwanda mbere yo guhunga hari izo yatwitse n’izo yashwanyaguje. Ubushakashatsi buracyakomeza.

Mu gihe rero ubushakashatsi bugikomeje, ntabwo Perezida w’u Bufaransa yavuga uruhare rw’abasirikare b’igihugu cye. Nitwihangane dutegereze, tureke kuvuma iritararenga.

Ibikubiye muri iyi nyandiko ni ibitekerezo bwite by’Umwanditsi w’ibitabo Mukagasana Yolande, washinze Foundation Yolande Mukagasana, Umuryango urwanya abapfobya n’abahakana Jenoside yakorewe Abatutsi.

Perezida w'u Bufaransa, Emmanuel Macron, yasuye anunamira inzirakarengane za Jenoside ziruhukiye mu Rwibutso rwa Jenoside rwa Kigali ku Gisozi. Uyu Mukuru w'Igihugu yari mu ruzinduko rw'iminsi ibiri yagiriye mu Rwagasabo ku wa 27-28 Gicurasi 2021

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .