Umukozi wo mu rugo ni umukozi w’urugo akaba n’umufasha

Yanditswe na Ntwari Pie
Kuya 2 Ukuboza 2019 saa 08:58
Yasuwe :
0 0

Umugabo ni umutware w’urugo rwe, we n’uwo bashakanye, umugore akaba umutima warwo. Aba ni bo baba ari abakozi b’ibanze b’urwo rugo. Iyo batarukoreye ngo babungabunge iterambere ryarwo rurazahara, imibereho myiza yose ikamera nk’ayo bakamira mu kitoze: Ntibiyabuza kwitwa amata ariko nta gitereka aba afite.

Urugo kurukorera ntibisaba kuba uri nyirarwo. Ukoze akazi kose kateza imbere urwo rugo aba abaye umukozi warwo. Ariko hari indi ngeri y’abakozi: Abakozi bo mu rugo. Ni abakozi bafite akazi gahoraho (akenshi).

Aba ni abafasha b’abakozi b’ibanze b’urugo. Kwitwa umukozi w’urugo aho bitandukaniye no kwitwa umukozi wo mu rugo, ni igihe ukorera n’aho ukorera ako kazi.

Ushobora kuba umukozi w’urugo ariko utari umukozi wo mu rugo, ariko ntushobora kuba umukozi wo mu rugo utari umukozi w’urwo rugo.

Urugero uramutse uhawe akazi ko koza intebe z’urugo uru n’uru rimwe mu mwaka, bikugira umukozi w’urugo izo ntebe zikomokamo. Ibi bitandukanye cyane n’ukora akazi ko mu rugo, akagakorera mu rugo, mu gihe cy’iminsi myinshi cyangwa buri munsi.

Uko Isi irushaho guhinduka mu iterambere ryayo ni nako abayituye bagenda barushaho gutengamara, bakaba mu buzima bworoshye kurusha ejo hashize. Uyu munsi, amaso y’abahanga ahanzwe ikoranabuhanga ryitezweho guhindura byinshi mu mibereho ya muntu – ikorwa ry’ingirwamuntu (robots).

Ingirwamuntu imwe iba ishobora gukora akazi kagakozwe n’umuntu umwe cyangwa benshi kandi mu gihe kirekire, yo ikagakora mu mwanya muto ushoboka. Ikaba ibaye umufasha wa nyirayo ityo.

-  Reka nsasire ijambo “umufasha” kugira ngo ntumvikana nabi

Hari umusaza nzi, buri gihe iyo ashyingira abakobwa be, abuza abantu kwita abagore/abagabo babo abafasha, kuko umufasha ni uwo kugufasha kugira ibyo ukora ibi n’ibi. Ntibivuze ko atari abakozi. Ariko uyu musaza isobanurampamvu rye arishingira ko iyo umufasha ashaje, umureka ugashaka undi ugifite imbaraga kugira ngo agufashe gukora ya mirimo. Aravuga ati mubigereranye n’ubuyede (aide) mu mirimo y’ubwubatsi.

Ntekereza ko kera cyane, cyane ntazi, abagabo bigeneraga abafasha bitewe n’uko imyaka y’abo bashatse mbere igenda ijya hejuru. Mpereye aha, abakozi bo mu rugo nibo bafasha, kuko inenge iyo ariyo yose yamubuza gukora akazi ashinzwe neza, ni iturufu imuha itike imwerekeza hanze y’urwo rugo.

Niba abakozi bo mu rugo ari abafasha, tubaha umwanya ungana iki mu buzima bw’ingo tubamo? Buri wese mu babakoresha yakwibajije umwanya bafite mu nshingano zikomeye zo kuba abakozi b’urugo, bikaba agahebuzo kuko ari abakozi bo mu rugo, bityo, ni abakozi b’ibanze mu mibereho myiza y’urugo ndetse ba nyir’urugo (abakozi b’urugo nyir’izina) nibo bakesha ubutengamare bwabo, kuko iyo bababuze barahungabana, bakinubira imirimo bakorerwaga nyamara ari iyabo.

Ntawe nshaka kwibutsa inshingano zikomeye umukozi wo mu rugo rwe, nako umufasha we afite mu kuruteza imbere, kuko buri wese mu babakoresha ni we uzi uko ahangayika iyo amubuze cyangwa agize igituma atamukorera akazi yari kwikorera.

Kuva ku mirimo mito mito nko gusukura munsi y’ameza aririrwaho kugeza ku mirimo ikomeye nko kurera abana, aba bangavu n’abasore ni bo baba bafite inkuru nyamukuru ku mutima wabo y’ubuzima bw’ingo bakoreramo akazi.

Ni inkuru utakumva ahandi, utasoma cyangwa ubarirwe na nyirayo iyo umubano wanyu ujegajega. Izi nkuru ziba zihenze kuko zandikishwa na ba nyirazo wino ikomeye cyane, zikabikwa kure – ku ndiba z’imitima yabo.

Umuntu uhemba uyu mufasha ari nawe mukoresha we, ni we uba ufite ijambo mu gutuma izi nkuru ziba nziza cyangwa mbi. Niwe utuma wino yandika izi nkuru ishashagirana cyangwa yijima bugome.

Rimwe na rimwe imigirire mibi y’abafasha bo mu rugo ituruka ku mwanya muke bahabwa b’abakoresha babo. Bitavuze ko hatariho abafasha bafite umutima muhanano utuzura igituza, wa mutima usobetse ubudabagizi n’ubupfu, wa mutima utahindurwa n’imigirire myiza ya nyirabuja/sebuja ngo bikunde, keretse iyo habaye ah’ingabire za Rugaba. Imana!

Izi nkuru ko ari ingingo z’ingenzi buri wese yakwifuza guheraho ngo ahindure amateka y’ubuzima bw’urugo rwe, zumvwa na nde? Ziganirirwa he? Ku muntu ufite abana bato barerwa n’abafasha nk’aba, kuba mu rugo kenshi, ugasiga ingemeri y’ibirutunga uyu munsi ejo ugasiga indi, bukira bugacya udasiba i musozi gushaka amaramuko, izi nkuru kutaziha agaciro, ni nko kumva amasomo ya Misa ukigendera nyamara udasomewe Ivanjili.

Aba bafasha bacu, dukwiye kubaha icyubahiro bakwiye nk’abakozi b’ingo tubamo. Tubahe umwanya nk’uwo baduha, tumenye uko baryamye n’uko baramutse nk’uko tubibaza n’abandi baraye mu rugo, nibwo bazatugira inama kugira ngo tumenye ibigenda n’ibitagenda kugira ngo twishimire ibyiza tunahindure ibituma urugo rufutama.

Ihurizo: Ni bangahe basangira n’abafasha babo ku meza amwe? Ese bo ntibakeneye ubabwira ngo Bon Appétit? Ni bangahe basohokana n’abafasha babo nibura uko babishoboye (Dukuyemo abasohokana abana bakitwaza abafasha babo ngo biruke inyuma yabo kugira ngo ubishyura atengamare)?

Ni bangahe bibuka gushima abafasha babo iyo bamaze kubakorera imirimo itari mu nshingano zabo ko ari nayo myinshi? Ku basenga, ni bangahe baha umwanya abafasha babo ngo bajye gusenga nibura rimwe mu cyumweru? Icya nyuma kitari gito, ni nde utababara iyo umufasha we avuze ko agiye iwabo, ngo amubaze igihe azagarukira ariko anamubwira ngo uzatashye abo mu rugo?

Tugiye kujya mu minsi mikuru isoza umwaka, ikwiye kutubera umwanya mwiza wo gufata ingamba zizahindura imibereho y’ubuzima bwacu bwite n’ubuzima bw’ingo tubamo. Buri wese aramutse agiriye neza mugenzi we nk’uko yakwifuza kugirirwa, ubutengamare navugaga bwasendera ibyifuzo bye.

Umukozi wo mu rugo ni umukozi w’urugo ndetse akaba umufasha.

Iki ni igitekerezo bwite cya Ntwari Pie.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza