00:00:00 IGIHE NETWORK KN KINYARWANDA EN ENGLISH FR FRANCAIS

Umuhate w’u Rwanda mu kugarura umutekano muri Mozambique ni igihamya ko Afurika ifite ubushobozi idakoresha

Yanditswe na Kabagambe R. Ignatius
Kuya 16 Kanama 2021 saa 10:50
Yasuwe :
0 0

U Rwanda rukomeje kwigaragaza bitari amagambo ahubwo mu ngiro by’umwihariko mu kuba Afurika yakwishakamo ibisubizo ku bibazo biyugarije. Umutekano muke ni kimwe mu bibazo bimaze igihe kinini biyugarije. Nk’uko u Rwanda rumaze igihe kirekire rubyerekana, Afurika ishobora gukora byinshi kurusha ibyo yikoreye ndetse bikagira akamaro cyane nk’uko bimeze ubu.

Dufashe urugero rwa vuba muri Mozambique ahoherejwe ingabo n’abapolisi b’u Rwanda 1.000 gusa, mu kwezi kumwe uhereye ku wa 10 Nyakanga 2021 bakemuye ikibazo cy’abarwanyi b’aba-Jihadist bashamikiye kuri ISIS.

Abo barwanyi bari bamaze imyaka itanu barigaruriye Amajyaruguru y’icyo gihugu, igice gikungahaye kuri gaz ariko kikaba kitari gituwe nta n’ibihakorerwa.

U Rwanda ni urwo gushimirwa! Ubu Intara ya Cabo Delgado ihana imbibi n’Amajyepfo ya Tanzania yongeye gusubizwa mu maboko y’ubuyobozi bwa Mozambique.

Ukuboko k’u Rwanda kwiyambajwe nk’umwanzuro wonyine wari usigaye, nyuma y’uko icyo gihugu cyari kimaze imyaka gisaba Umuryango uhuza Ibihugu bya Afurika y’Amajyepfo (SADC) kuza kugifasha ariko igisubizo kikabura.

Mozambique ni umunyamuryango wa SADC hamwe na Afurika y’Epfo, Malawi, Zimbabwe, Botswana, Namibie, Lesotho, Tanzanie, Zambie, Swaziland, Ibirwa bya Maurice, Madagascar, Repubulika Iharanira Demokarasi ya Congo, Ibirwa bya Comores, Seychelles na Angola.

Si muri Afurika y’Amajyepfo u Rwanda ruri gutanga ubufasha gusa. Muri Centrafrique, kuhagera kwarwo ni kimwe mu by’ingenzi cyane. Rwohereje batayo enye mu ngabo z’Umuryango w’Abibumbye ziri kugarura amahoro muri Centrafrique (MINUSCA).

Byongeye, hari ingabo zindi ziherutse koherezwa muri Centrafrique kugira ngo zifashe izo zari zisanzweyo, iziri mu butumwa bw’Umuryango w’Abibumbye muri Sudani (UNSFA), iziri mu bwo muri Sudani y’Amajyepfo (UNMISS) ndetse n’iziri muri Mozambique ubu; biroroshye kumva ko u Rwanda ari kimwe mu bihugu bigira uruhare rukomeye mu kubungabunga amahoro ku Isi.

Igiteranyo cy’ingabo n’abapolisi b’u Rwanda bari kugarura amahoro mu mahanga ubu ni hafi 7.000. Bazahangana n’ibibazo byugarije Isi kurusha ikindi kintu cyose, binajyanye n’uko ubukungu bw’igihugu butanga icyizere gifatika mu iterambere.

Mu mitima y’Abanyarwanda hakomeje kuba umwuka wa “Ntibizongera ukundi” nyuma ya 1994. Ibyo byiyongeraho imiyoborere myiza ya Perezida Kagame ikomeye kurusha ubuzima, hanyuma ukareba uko igihugu gihugiye ku kugera kuri byinshi cyifashishije bike.

Ubwo yari mu nama yo ku rwego rwisumbuye igaruka ku kurangiza amakimbirane no kubaka amahoro muri Afurika yabereye i Kigali mu 2014, Perezida Kagame yanenze Abayobozi b’ibihugu bya Afurika kutagaragaza ubushake bwo gukemura ibibazo byugarije Umugabane.

Yifashishije urugero rw’umutwe wa Boko Haram muri Nigeria, uwo mukuru w’igihugu uvuga ashize amanga yabajije impamvu “abayobozi bacu bakabaye barakoranye mu kugaragaza ibibazo rusange bibangamiye ibihugu byabo, bategereza gutumirwa mu Burayi ngo bicareyo [abe ari ho bikemurirwa].’’

Ati “Bisa n’aho bicara bakavuga ibibazo byabo! Kuki umuntu ategereza ibyo? Ese ubundi biduhesha iyihe sura nka Afurika? Mu by’ukuri isura biduhesha ni uko tutaba twanagiyeyo ngo tugaragaze ibibazo. Tuba twagiyeyo ngo tubone amahirwe yo kwifotoza. Twishimira kwicara i Paris hamwe na Perezida w’u Bufaransa, tukaganira ku kugaragaza ibibazo. Ntabwo bisobanutse ukuntu abayobozi bacu badashobora kwicarana ngo basuzumire hamwe ibibazo byugarije abaturage bacu. Ntibyumvikana.”

Ni byo, ntibisobanutse ariko bibaho buri gihe, Perezida. Urugero nka SADC yaretse ikibazo gishobora gukemurwa cyugariza igihugu kinyamuryango mu gihe cy’imyaka itanu yose ntacyo igikoraho, kandi ubufatanye mu by’umutekano ni imwe mu mpamvu uwo muryango uriho.

Mu by’ukuri ntibyumvikana na gake uko u Rwanda, igihugu kitari ikinyamuryango, rushobora guturuka mu Burasirazuba bwa Afurika ngo rukemure ikibazo cy’umutekano ibihugu 16 bitavugaho rumwe kuko cyagaragajwe nk’igiteye ubwoba ku nzirakarengane z’Abanyafurika. Cyangwa birashoboka ko twakumva ibisobanuro batanga nk’umuryango umaze imyaka 41.

Umuntu yatekereza ko SADC yahaye agaciro kanini uburemere bw’ikibazo hanyuma abanyamuryango bayo bakinangira koherezayo ingabo bitewe n’uko wenda bagize ubwoba bw’ingaruka zashoboraga kubageraho.

Reka ibyo tubyumve nibura, tureke no kwibaza ibijyanye n’uko u Rwanda rwabatanzeyo mu buryo bwo gukora inyigo ku bushobozi bw’umwanzi mu bya gisirikare. Ahubwo twakwitega ko nibura SADC yaba yarigiye ku ndangagaciro z’u Rwanda, igafata amasomo ku gushyira hamwe no gutanga ubufasha mu karere, ikaba yayakomezanya mu murongo mwiza?

U Rwanda rwanezezwa n’uko ibihugu byo mu Majyepfo byari byarashyize hamwe imyaka myinshi byava mu cyakwitwa nk’ubujiji, hanyuma bigahamya ko byiga vuba mu gihe bigaragaye ko igishoboka giturutse hafi yabyo.

Umuhate w’u Rwanda wo gukunda Afurika uzahore uganza. Ntibishoboka ko twazigera tunanirwa gufata iya mbere mu kurengera ubuzima.

Ibikubiye muri iyi nyandiko ni ibitekerezo bwite by’umwanditsi Ignatius R. Kabagambe

Ingabo na Polisi y'u Rwanda bamaze kwigarurira ibice byinshi byarimo imitwe y'iterabwoba mu Ntara ya Cabo Delgado

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .