00:00:00 IGIHE NETWORK KN KINYARWANDA EN ENGLISH FR FRANCAIS

Umubano wa kivandimwe w’u Rwanda n’u Bushinwa mu gice cy’ikinyejana gishize

Yanditswe na IGIHE
Kuya 13 Ugushyingo 2021 saa 08:31
Yasuwe :
0 0

Nka Ambasaderi w’u Bushinwa mu Rwanda, ntewe ishema ndetse ni amahirwe kuba narabashije kubona isabukuru y’imyaka 50 y’umubano ushingiye kuri dipolomasi hagati y’u Bushinwa n’u Rwanda. Wenda navuga ko ndi kuba umuhamya w’intambwe ikomeye y’ubuvandimwe bw’u Rwanda n’u Bushinwa mu gice cy’ikinyejana gishize.

Mu myaka 50 ishize twashyize imbaraga mu bijyanye n’umubano wuzuye kandi ushingiye ku bintu bitandukanye. Kugirirana icyizere mu nzego zo hejuru mu bijyanye na politiki byazamuye ndetse bikomeza umubano w’ibihugu byombi muri ibi bihe bikomeye Isi.

U Bushinwa bwabaye igihugu cya mbere gikorana imishinga ndetse n’ubucuruzi n’u Rwanda. Amatsinda 21 y’abaganga b’Abashinwa n’inzobere 258 mu buvuzi (doctors) z’Abashinwa bakoreye mu Rwanda kuva mu 1982.

Guhanahana ubumenyi hagati y’abantu byaragutse ndetse kwiga imico y’ibihugu byombi bitezwa imbere cyane. Turashyigikirana mu rwego mpuzamahanga ndetse tukagira ijwi rimwe ku bintu byinshi.

Ishyaka ry’aba-Communiste mu Bushinwa na FPR Inkotanyi babona imiyoborere y’igihugu nk’ishingiye ku bantu, imitekerereze y’Ishyaka ry’aba-Communiste mu Bushinwa n’iyubakira ibintu byose ku baturage ya FPR inkotanyi irajyanye ku rwego rwo hejuru.

Tubikesha ugufata inshingano kw’abayobozi bacu, ubu nibwo umubano w’u Rwanda n’u Bushinwa ugeze ahantu heza mu mateka yawo.

Mu ruzinduko rw’amateka Perezida Xi Jinping yagiriye mu Rwanda mu 2018 ari na rwo rwa mbere rwa Perezida w’u Bushinwa, ibihugu byombi byashyize umukono ku masezerano y’ubutwererane 15 mu bintu bitandukanye. Ishyirwa mu bikorwa ry’ayo masezerano riri kurushaho kongerera imbaraga ubufatanye bwacu n’ubuvandimwe.

Ubucuruzi ndengamipaka bwifashisha ikoranabuhanga bwatangiye kugaragara nk’ingingo nshya igize ubu butwererane, aho buri kilo cy’ikawa kigurishwa mu Bushinwa binyuze kuri internet cyinjiriza abahinzi b’ikawa b’Abanyarwanda 4$ y’inyongera.

U Rwanda rwabaye igihugu cya mbere cya Afurika cyagurishije urusenda mu Bushinwa, ndetse mu myaka itanu iri imbere ruzagurishaho toni 50000. Hari ibicuruzwa byinshi by’u Rwanda bitegerejwe ku isoko ry’u Bushinwa.

Binyuze mu guhuza imbaraga mu rwego rwo kurwanya COVID-19, u Bushinwa bwahaye u Rwanda doze ibihumbi 500 z’inkingo z’iki cyorezo n’ibindi bikoresho, byari bikenewe cyane. Turi gufatanya mu bijyanye n’ikoranabuhanga ryitezweho kuba urwego rw’ingenzi mu Rwanda.

Ubuvandimwe bwacu bufite imizi mu muco wacu no kuba dufite ibyo duhuriyeho. Twese twemera ko ibihugu byose, yaba ibito cyangwa ibinini, ibikomeye cyangwa ibyoroheje bingana. Twese duha agaciro ubusugire n’ubwigenge ndetse tukarwanya abashobora kwivanga mu miyoborere y’ibihugu byacu byaba bikozwe n’igihugu cyangwa abandi bantu bo hanze.

Twese twemera ko uburyo bw’imiyoborere bubereye ibihugu byacu aribwo bwiza. Abaturage b’ibihugu byacu basangiye indangagaciro zo kuba abanyembaraga, kutavugirwamo, kugambirira ibyiza, gukora cyane no kugira umutima mwiza.

Ubuvandimwe bwacu bwubakiye ku bumuntu. Muri manda yanjye y’imyaka ine n’igice nagiriye ingendo mu ntara enye zose z’igihugu. Muri izi ngendo, nabonye ubucuti no kwakira neza Abashinwa.

Ibyinshi byo mu cyaro byari nk’urwibutso rw’ibice by’u Bushinwa byari byaribasiwe n’ubukene mu gihe cya vuba gishize. Kimwe n’u Rwanda u Bushinwa bwahanganye n’amateka akomeye adakunzwe kugarukwaho. Twumva uyu mubabaro n’agahinda ndetse n’imbaraga zo gushyira iherezo kuri izi ngorane. Ibi bisobanura neza impamvu Guverinoma y’u Bushinwa yashoje ndetse igatsinda intambara y’ubukene; yakuye mu bukene abaturage babarirwa muri miliyoni amagana.

Ibi kandi bisobanura impamvu u Bushinwa buhora bwiteguye gutanga ubufasha ku bavandimwe bacu b’Abanyarwanda.

Ubuvandimwe bwacu bwubakiye mu kwizerana. Nabwiwe ko ubwo ikigo kimwe cy’Abashinwa gikora imirimo y’ubwubatsi cyafataga umwanzuro wo gufunga imiryango muri Jenoside yakorewe Abatutsi, cyafashe ibikoresho byacyo kibisigira abaturage bari baturanye, kibasezeranya ko kizagaruka vuba bishoboka.

Nk’uko cyari cyabibasezeranyije iki kigo cy’Abashinwa cyasubiye mu Rwanda hatarashira igihe kinini, nk’uko babyemeranyije aba baturage babitse ibi bikoresho neza ndetse babikora mu bihe bigoye. Isezerano ni isezerano, kandi by’umwihariko ni ingenzi ku bavandimwe. Kwizerana ni ubutunzi bukomeye dukwiye kubungabunga kandi tugaharanira kubuteza imbere mu buryo buhoraho.

Muri Nzeri uyu mwaka ubwo yatangizaga inama ku bucuruzi ihuza Afurika n’u Bushinwa, Nyakubahwa Perezida Paul Kagame yavuze ko intego y’u Rwanda ari ukurushaho gushimangira umubano wacu no mu gice cy’ikinyejana cy’ubufatanye kiri imbere.

Mu ijambo Minisitiri w’Ububanyi n’Amahanga, Dr Vincent Biruta yavuze ubwo hizihizwaga imyaka 50 y’umubano w’u Bushinwa n’u Rwanda, yijeje kurushaho gushimangira no kwagura ubutwererane n’ubufatanye ibihugu byombi bifitanye. Nemera ntashidikanya ko ibihugu byacu byombi bizashimangira ubufatanye muri gahunda z’iterambere. Tuzarushaho kuzamura ubufatanye mu nyungu z’abaturage bacu ndetse tuzandika amateka mashya y’ubucuti bwambukiranya imisozi igihumbi n’imigezi.

Ifuni ibagara ubushuti ni akarenge.

Ubu butumwa ni ubwa Ambasaderi w’u Bushinwa mu Rwanda, Rao Hongwei.

Rao Hongwei , Ambasaderi w'u Bushinwa mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .