Uko Museveni, Nyamwasa na Rudasingwa batamba abandi mu nyungu zabo

Yanditswe na Muhumuza Alex
Kuya 14 Nyakanga 2019 saa 12:01
Yasuwe :
0 0

Ku wa 22 Mutarama 1973, abanyamuryango batatu bo mu mutwe w’inyeshyamba wa Front for National Salvation (FRONASA), Yoweri Museveni, Mwesigwa Black na Mwesiga Martin, bagotewe n’ingabo za Idi Amin mu gace ka Mbale muri Uganda mu nyubako ya Maumbe Mukwana, wari umuzabikorwa wa Fronasa muri ako gace.

Museveni utaramenyesheje bagenzi be, yahise anyererera mu wundi muryango w’inyuma arigendera.

Mu gitabo kivuga ku buzima bwe yanditse yise “Sowing the Mustard Seed”, hari aho agaruka ku rupfu rwa Mwesiga na Mwesigwa, abarwanyi bahanganye n’ingabo za Amin ariko bakahasiga ubuzima.

Hari aho agira ati “Nasimbutse urupangu, nizeye ko bagenzi banjye bankurikira, hanyuma bakanyura mu byerekezo bitandukanye. Sinigeze menya ko batabikoze.’’

Ba nyakwigendera baribeshye batekereza ko Museveni ari kumwe na bo mu rugamba rwo guhashya umwanzi. Iyo aza kubamenyesha umuteguro wo kunyura mu muryango w’inyuma byashoboka ko baba bagihumeka umwuka w’abazima.

Museveni we yafashe icyemezo bucece yishingikiriza ko amahirwe menshi yo kubaho ayageraho n’ahunga wenyine, aho kubwira bagenzi be na bo ngo bagerageze amahirwe.

Yagombaga kwizera ko umurava bagenzi be bari bafite mu kurwanya umwanzi washoboraga kumuha ubwirinzi bwo guhunga. Mu by’ukuri iyo Museveni aza kuba ari gufatanya na bo kurwanya umwanzi, byashoboka ko na we aba atakiriho.

Urwibutso rukumbi Museveni afite kuri icyo kibazo ni uko “Impinduramatwara igomba kugira ibitambo.’’

Hari ibindi bikorwa byinshi bihinyuza ubuzima ba Museveni nk’indwanyi y’impinduramatwara.

Ku wa 7 Nyakanga, umunyamakuru Yoga Adhola yanditse muri The Daily Monitor ko ‘ukwitanga’ kwa Museveni nta rufatiro gufite, yafatiye urugero aho “Mu gihe cya Coup d’Etat yo mu 1985, Museveni yaratsinzwe ndetse anasubira Suède’’ asiga abasirikare be ku irasaniro.

-  Kayumba, Jenerali w’ikigwari

Ibyo Adhola yagarutseho binasangiwe na Kayumba Nyamwasa nkuko bitangazwa na Rudasingwa Théogène bafatanyije gushinga Umutwe w’Iterabwoba wa RNC.

Rudasingwa avuga Kayumba nk’umukozi ariko akagira n’amayeri, ushobora gufata abarwanyi ba RNC bakajya ku rugamba mu mashyamba ya DRC abizeza uburinzi n’umutekano wa Guverinoma ya Afurika y’Epfo.

Aya magambo asa n’akebura Rudasingwa yavuze kuri Kayumba yatangajwe ku wa 1 Nyakanga 2019 mu nkuru yari ifite umutwe uvuga ko “General Kayumba Nyamwasa agomba kubazwa amaraso y’Abanyarwanda amenekera muri RDC.’’

Yagaragaje ko ukwikunda kwa Kayumba kwatumye igisirikare cye kidafatika cyicwa. Ntiyizera neza ko ari igisirikare nyacyo.

Kuva mu 2016, Nyamwasa yayoboye RNC mu bikorwa bya gisirikare, ibikorwa byaguyemo Abanyarwanda benshi.

Ubwa mbere, Kayumba yohereje urubyiruko rw’Abanyarwanda rurenga 400 mu mashyamba ya DRC nta cyerekezo cya politiki bafite ndetse nta n’ibikoresho by’ubwirinzi.

Izi nshingano azisangiye na Gervais Condo, Nayigiziki Jérôme, Minani Corneille, Turayishimye Jean Paul bo muri Amerika; Hakizimana Emmanuel (Canada) na Micombero Jean-Marie uba mu Bubiligi kimwe n’abandi bantu ba hafi muri RNC.

Icya kabiri, Kayumba nka Jenerali ugaragaza ubugwari, yatanze amabwiriza ku gisirikare cye mu ntera ya kure kuko we yibereye mu mudendezo muri Afurika y’Epfo, ariko ubutumwa abunyuza kuri muramu we Frank Ntwali, usanzwe ari umusivili.

Rudasingwa anatekereza ko umugambi wa Kayumba wo gutandukanya abantu nkuko yabigerageje mu Ngabo z’u Rwanda, RDF bitewe no kwikunda byamukirikiye aho yahungiye muri RNC no mu gisirikare cye.

Yanditse agereranya ko ukwikunda kwa Kayumba kwatumye umugambi we uba nk’ubwato bwarohamye mu Nyanja.

Agaragaza ko ingabo ze zaciwemo ibice kubera kutagira ubuyobozi bwaba ubwa politiki n’ubwa gisirikare, kubura ibikoresho n’ibindi.

-  Amarira y’ingona kuri Rudasingwa

Rudasingwa si umuvugizi w’abatagira kivurira. Umujinya agirira Kayumba ushingiye cyane ku kuba basangiye ‘ukwikunda cyane no kwikubira’, ibyo Adhola yagaragaje kuri Museveni nk’umugambi wo guharanira kwikunda bidasanzwe.

Uburyo Rudasingwa yutse inabi Kayumba bishobora gusobanurwa muri ubu buryo; ko ari amagambo agamije kwereka Museveni ko akwiye kureka gufasha Kayumba, inkunga yose akayiha igice cya Rudasingwa cyiyomoye kuri RNC mu 2016, ubu kikaba gisa n’ikibagiranye.

Mu yandi magambo, mu bwicanyi bwakorewe abarwanyi ba RNC, Rudasingwa abonamo amahirwe y’iteka ryose, iyo ahumuriwe n’amaraso yumva amahirwe ari bugufi.

Mu gukora ibyo, agerageza ibishoboka byose agahanaguraho Museveni icyasha cy’ibyakozwe na RNC nyamara igisirikare cya Nyamwasa muri RDC cyaramaze kuba ikimenyabose.

Nyamwasa yabeshye abayoboke be batanze amafaranga anabizeza ko afite ubufasha ahabwa na Uganda n’u Burundi kandi ko igisirikare cye muri RDC gikura kandi kikanakora.

Iyo ageze ku bufasha bwa Museveni, Rudasingwa nta na kimwe asiga, mbese ni nko kugerageza gushyingura Kayumba ari muzima.

“General Nyamwasa na RNC bakwiye kubazwa Abanyarwanda bohereje muri RDC. Afurika y’Epfo, Amerika, Canada n’Akanama ka Loni gashinzwe Umutekano, bikwiye gufata iya mbere mu kuryoza General Nyamwasa n’abayobozi bakuru muri RNC ibyabaye.’’

Yongeyeho ko “Ni igihe cyo gushyira iherezo ku migambi mibisha ya General Nyamwasa na RNC no kwemwera ko nta mbaraga za politiki n’iza gisirikare bafite.’’

Rudasingwa avuga ko “Abanyarwanda bakwiye kumenya ko General Nyamwasa na RNC bateye inkeke kuko ntibita ku buzima bw’Abanyarwanda ahubwo icyo bashaka ni ugukuraho ubutegetsi bwa Kagame. Niba badashoboye kwita ku bantu 400, ni guhe bazita ku gihugu gituwe na miliyoni 12?’’

Ijambo rye rya nyuma yarivuze ahamagarira umuryango mpuzamahanga kuryoza Kayumba ‘ibyaha yakoze n’Abanyarwanda bakomeje kubura ubuzima’ ndetse abantu bo mu Karere k’Ibiyaga Bigari ‘kumenya General Nyamwasa na RNC ye.’

Rudasingwa ari mu kuri muri byose nyamara ikimutera imbaraga ntabwo gitandukanye n’icya Kayumba, ni inyungu bwite.

Iyo Rudasingwa aba adashaka kugera kuri Museveni ndetse akaba ashaka inyungu ku buzima bw’Abanyarwanda, yagombaga kugaragaza ikibazo cya RNC ya Kayumba kera nko mu gihe yayoboraga ibitero by’iterabwoba birimo n’ibyo gutera gerenade mu masoko n’ahahurira ahantu henshi, bigahitana ubuzima bw’abasivili, abandi bagakomereka.

Ikindi yashobora gukora kandi kwari ugutabariza urubyiruko rwaguye mu mashyamba ya RDC nyuma yo gukurwa mu bice bya Uganda, mbere yo kwambutswa umupaka bafashijwe n’Urwego rw’Ubutasi rwa Uganda (CMI).

Mu by’ukuri yashoboraga kugira icyo avuga mu gihe abayobozi ba RNC bagiriraga ingendo zihoraho muri Uganda, zanakorewemo inama n’abo muri FDLR kandi bizwi n’Umunyamabanga wa Leta ushinzwe ibibazo byo mu Karere muri Uganda, Philemon Mateke.

Rudasingwa ntari mu mwanya mwiza wo gushinja Kayumba ‘kugira umutuzo uteye isoni’ nyuma yo gusenyuka k’umutwe we w’ingabo kuko bombi babaye muri uwo mutuzo.

Ikigaragarira buri wese ni uko Museveni, Kayumba na Rudasingwa bakomeje gucengana mu gihe amaraso y’inzirakarengane akomeje kuba igitambo.

Mu gihe abasirikare ba RNC bari mu myitozo, bagerageje kuvugisha Kayumba aho ari muri Afurika y’Epfo aho yatangiraga amabwiriza, nkuko umwe mu barokotse ibyo bitero yabitangaje.

Ubwo batabazaga bavuga ko bugarijwe Kayumba yababwiye ko ari kuvugana n’abayobozi bo muri Uganda bari biteguye kubakira, ngo basange abandi aho bari mu myitozo.

Ntibahiriwe kuko inzira bari gukoresha yari yagoswe. Ubwo bongeraga guhamagara umuyobozi wabo w’urugamba, Kayumba, yabasubije ko “Muri abasirikare, mushake uko mwirwanaho.’’

Kayumba aratuje aho ari mu buhungiro muri Afurika y’Epfo mu gihe ingabo ze ziri kwicirwa mu mashyamba ya RDC. Benshi mu ngabo ze ubu bicuza impamvu binjiye mu gisirikare cye.

Abasirikare bato bo ntibari mu mwanya wo kubaza ibibazo bikomeye bituma bayoboka uyu mutwe w’iterabwoba, wari ugiye gutamba ubuzima bwabo.

Hari abagaragaza ko batengushywe, nyamara hari abasirikare bakuru nka ba captain na ba major bibaza uko Kayumba yabemeje kujya ahantu na we adashobora kugera.

Ikintu kimwe wakuramo hano ni uko urwego abantu Kayumba yiyegereje ari ba bandi badashobora kumubaza ibintu bikomeye. Bamwe babonye isomo ariko ikibazo kiracyari, kuki we atari hano?

Kuri Museveni, ingabo nyinshi zari iz’abanyamahanga batashoboraga gufata igihugu no mu gihe yatsinda ; bashoboraga gutsinda intambara bakamuha imbuto z’akazi kabo, ariko ibyo ntibyashoboka kuri Kayumba.

Nkuko kuri Museveni byagenze i Mbale mu 1973, ibitekerezo bya Kayumba ntibiri kure yo kwemera ko “impinduramatwara igomba kugira ibitambo’’ ariko ntuzabishingikirize mu gihe ukeneye uwitanga.

Iyi nyandiko yahinduwe mu Kinyarwanda na IGIHE. Yasohotse bwa mbere muri Virunga Post ku wa 12 Nyakanga 2019. Ibiyikubiyemo ni ibitekerezo bwite by’Umwanditsi Alex Muhumuza.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza