Uko FPR yahoze niko iri ni na ko izahora (Igice cya 7)

Yanditswe na Tom Ndahiro
Kuya 17 Nzeri 2017 saa 01:22
Yasuwe :
0 0

Turacyari mu bimenyetso by’ibihe mu w’i 1992 byerekana imbaraga mu itegurwa rya Jenoside. Ubushize nakomoje ku myigaragambyo n’ubusahuzi byakozwe n’abasirikare mu zahoze ari Perefegitura za Gisenyi na Ruhengeri. Ubwo bugome bugakorwa umunsi umwe n’itangira ry’ibiganiro byo gushaka amahoro hagati y’Umuryango FPR-Inkotanyi n’amashyaka MDR, PL na PSD. Ibiganiro byatangiye i Buruseli mu Bubiligi ku itariki ya 29 Gicurasi 1992.

Urwo rugomo rwakozwe n’abasirikare, nabyise koshywa kubera impamvu. Ku itariki ya 28 Gicurasi 1992, i Kigali habereye urugendo rwahindutsemo mitingi ya MRND isa n’iyakozwe bitewe n’uburakari bwo gukorwa kw’imishyikirano y’amahoro i Buruseli. Umushyitsi mukuru yari Perezida Juvenal Habyarimana.

Imigambi yo gutegura Jenoside yakajije umurego ari mu rwego rwo gutoza Interahamwe na poropagande y’ubugome. Ku wa 26 Kanama 1992, Minisitiri w’Ububanyi n’Amahanga, Boniface Ngulinzira na Ambasaderi w’u Bufaransa mu Rwanda, Georges Martre, bashyize umukono ku “masezerano adasanzwe y’ubufatanye mu rwego rwa gisirikari” byitwa ko ari ukunoza imikorere ya Jandarumori “Gendarmerie” y’igihugu.

Icyo Minisitiri Ngulinzira atamenye ni uko ari Jenoside yategurwaga kuko isinywa ry’ayo masezerano ryakurikiwe no gusakazwa kw’imyitozo y’Interahamwe no gukora urutonde rw’Abatutsi no kumenya aho buri wese atuye ngo kubica bizaborohere .

Bari bazinduwe no kwamagana amashyaka yari mu biganiro na FPR-Inkotanyi. Umujinya bari bafite wari ukaze ukaba watekereza ko biciwe abantu kandi ari bo babamaze.

Umwe mu bafashe ijambo muri iyo mitingi yagaragaje ko ikibazo ari “abantu bo muri MDR na PL” bavuga ngo “twarihanganye bihagije, twarihanganye bihagije, tugiye kubyimba, tugiye kubyimba, ni uko bimeze!..Twarabihanganiye bihagije, ubwo rero Interahamwe ntabwo … zitera ahubwo ziratabara. Ubwo bazitabara! Ni uko bimeze nta kundi byagenda!”
Amagambo yavugiwe muri urwo rugendo Habyarimana yari arimo, yari akomeye. Bamaganye Guverinoma y’inzibacyuho iyobowe na Nsengiyaremye Dismas ngo yari yafashe umwanzuro wo kugabanya Ingabo.

Mubavuze umwe ati “Tuzazongera hanyuma tugabanye ibyitso! Ni ukuzongera, tukagabanya ibyitso ni uko bimeze! Ni uko bimeze …bicare hasi tubategeke! Nibicare tubategeke, nibitonde tubategeke”.

Ayo magambo yavuzwe kenshi ahabwa impundu, amafirimbi aravuga. Gahunda yo kutagabanya ingabo ahubwo bakagabanya ibyitso byasubiwemo kenshi. “Turazongera tugabanye ibyitso. Ibyo ni uko bimeze! Ibyo ni uko bigomba kumera, tugomba kubongera tukagabanya ibyitso, ni uko bimeze! Bagera n’ubwo bavuga ko ushaka “kugabanya ingabo, najye mu rugano”.

Bati “Ibyo byo ni uko bimeze twarabyihanganiye n’lmana ibitubabariremo. lbitubaririremo ni uko bimeze, kandi Radio Muhabura turayiyamye.”

Ibyo kugabanya ingabo ni igihuha bahimbye gica igikuba ngo abasirikare babashyigikire. Ukuri ni uko nta mwanzuro nk’uwo wari wafashwe, uretse ko bari baraganiriye mu nama bakavuga ko mu mu gihe hazaba imishyikirano hagati y’Ingabo za leta na FPR-Inkotanyi bizaba ngombwa kuvanga Ingabo.

MRND ni Interahamwe

Hanashimangiwe ko mu Rwanda hari “ishyaka rimwe gusa, ry’Interahamwe nsa”. Iryo ni MRND. Habyarimana yabwiye izo Nterahamwe ati “rwose mugomba kujya mubibona, ntawufasha umwanzi. Nta mpangano y’umwanzi! Nta gutiza umwanzi umurindi! lbyo byo ni ko bimeze tugomba kubategeka kuko turi benshi. Turi benshi tugomba kubategeka!”
Habyarimana yemeje ko kugabanya ingabo “bifitanye isano n’umwanzi.” N’uburakari bwinshi ati “Bagabanye ingabo? Bagabanye ingabo se bahagaritse intambara? Cyakora kugabanyiriza inyenzi byo ntabwo nzabishyigikira. Yongeraho ati kandi ubwo nari ngiye kongeraho ngo "ndi Ikinani cyananiye abagome n’abagambanyi."

Ikinani cyishongoye kuri Minisitiri w’Intebe Nsengiyaremye: “…Ibyo bye byo kugabanya ingabo nabireke, ahubwo niyihatire kugabanya ibyitso, nagabanye ibyitso. Ubwo rero turumva ashaka kubicurika akagabanya ingabo akongera ibyitso. Dushigikiye ingabo, zibyumve zibimenye! Ni uko bimeze turabashyigikiye…”

Yavuguruje inama ya Guverinoma

Muri urwo rugendo Habyarima yabwiye Matayo Ngirumpatse uburyo ashyigikiye Nahimana Ferdinand: Nguriya Nahimana turamushyigikiye cyane kandi, Nahimana turamushyigikiye …Nahimana ni uwacu. Ni uwacu Nahimana, Nahimana ni uwacu…Ni uwacu ntaho agomba kujya agomba guhangana n’inzibacyuho, yose akayirangiza. Ni uko bimeze! Ni ikinani cyananiye abagome n’abagambanyi.”

Habyarimana yavugiye muri iyo myigaragambyo ko nyuma y’amezi cumi na kumwe (11) Nahimana agomba gusimbura uwo yise “Minisitiri bahaye Radiyo” kandi atazi kuvuga. Habyarimana yongeyeho ko yigeze guhura n’uwo “Minisitiri bahaye Radiyo” akumva ibyo avuga ari “mu rugano gusa.”

Ku kibazo cya Nahimana, Perezida Habyarimana yavuguruzaga icyemezo cyari cyarafashwe n’inama ya Guverinoma yo ku wa 28 Mata 1992. Iyo nama ikurikije ubusabe bw’amashyaka ya MDR, PL na PSD yakuye Nahimana ku buyobozi bwa ORINFOR bamwimurira muri Minisiteri y’Ububanyi n’Amahanga ashingwa kuzaba Umujyanama wa mbere muri Ambasade y’u Rwanda i Bonn mu Budage.

Ayo mashyaka yari yarabisabye akoresheje ibimenyetso byerekana ko Nahimana nk’Umuyobozi wa ORINFOR abangamiye ubumwe n’umutekano by’Abanyarwanda. Hatanzwe ingero zirimo ubwicanyi bwakorewe Abatutsi i Bugesera mu ntangiriro z’uwo mwaka w’i 1992.

Uko kuvuguruza Guverinoma ayoboye ntibitangaje. Yumviraga Interahamwe ze kurusha Guverinoma ayoboye. Ku wa 5 Gicurasi 1992, “Selire y’ Interahamwe za MRND" igizwe na Kajuga Robert, Sebanetsi Jean Pierre, Mbarushimana Eugène, Serugendo Joseph na NKEZABERA Ephrem bandikiye Habyarimana nka Perezida wa MRND bamusaba gukoresha ububasha bwe kugirango aburizemo ibyo kwohereza Nahimana gukorera mu mahanga.

Uru rugendo rw’integuza ya Jenoside rwabaye hashize ibyumweru bibiri GASANA Anastase yandikiye Komite Nyobozi y’Ishyaka MDR abamenyesha ko bagomba kwitegura guhangana n’umutwe w’Interahamwe zimaze gucengera mu gihugu hose. Iyo dosiye yo ku itariki 14 Gicurasi 1992 yiswe “Dossier Interahamwe za muvoma, ou LES IRREDICTIBLE DU MRND: Essai de Déracinement du Mal”. Ni nko kwerekana ko byari ngombwa kurwanya Interahamwe yise Sekibi. Uretse ibitekerezo ubonamo Parmehutu, Gasana Anastase yari azi neza abantu bari mu Nterahamwe.

Amwe mu mazina yavuze kandi akaza kuba yo koko ni: Colonel SERUBUGA Laurent, Colonel Sagatwa Elie, Lt. Col. Nsengiyumva Anatole, Colonel Bagosora Theoneste,, Lt. Colonel Renzaho Tharcisse, Colonel Rwagafirita Pierre Celestin, Zigiranyirazo Protais, Rwabukumba Seraphin, Nzirorera Joseph Nyandwi Charles, Ngirumpatse Mathieu, KAREMERA Edouard, MUSABE Pasteur, Nzabagerageza Charles, Nzabonimana Callixte, Kajuga Robert, Nahimana Ferdinand, na Bizimungu Casimir.

Abandi ni Habyarimana Jean Pierre, mwene Habyarimana Juvenal; Mbonabaryi Leone, fils de Mbonabaryi Noel, Rutaganda Georges; Murigande Fidèle, NGABITSINZE Aimable, RUGINA Jules, Mudahinyuka Jean-Marie-Vianney (ZUZU), SIMBA Richard, mwene Colonel SIMBA Aloys. Col. Simba nawe yari kuri uru rutonde yanaje kuba Umuyobozi w’Interahamwe wa Perefegitura ya Gikongoro.

Hakiyongeraho Semanza Laurent, Karera Francis, Kayondo Pierre, Mbarushimana Eugene, KAMANA Claver, Capitaine Gacinya, Nkezabera Ephrem, Kamali Isaac akaba na muramu wa Colonel Bagosora, Habyarimana Jean, Bikindi Simon, Rwambuka Fidèle, Gatete Jean Baptiste, Kajelijeli Juvénal. Abenshi muri aba bakoze Jenoside ndetse abatari bake bakatirwa n’inkiko bazira gukora ibifitanye isano n’icyo cyaha. Hari n’abo amahanga yohereje mu Rwanda ngo baryozwe ibyo bakoze.

Nkuko Gasana abivuga nk’ubizi, MRND yakanguriraga urubyiruko kujya mu Nterahamwe irubwira ngo "Ibintu by’amashyaka ni uguhaguruka mukarwana kuko murangaye MRND yatsindwa, kandi iramutse itsinzwe nkamwe b’abasore bo mu mujyi mwamererwa nabi kuko ariyo ibabeshejeho. Si kimwe n’iby’imipira rero.”
Ikinyamakuru Umurangi cyayoborwaga na Ntawuyirushintege Boniface cyo cyari cyaramaganye kwoherezwa mu Budage kwa Nahimana, ariko ku mpamvu zitandukanye n’iz’abayobozi b’Interahamwe: “Nahimana Ferdinand wagaragaje ubugome burenze ukwemera, wicishije abantu za BUGESERA n’ahandi akoresheje Radiyo y’Igihugu akerekana ubwirasi bukabije agakubitiraho ibindi byaha…ngo najye mu Bubanyi n’Amahanga? Kuki u Rwanda rushaka guhekesha u Budage impyisi rubwoherereza umu-CDR, ba bandi bariho bigisha iby’ivanguramoko tugereranya n’aba NAZI. Turasaba amashyaka MDR, PL, PSD na PSR gusaba bidatinze Guverinoma y’Ubudage kwanga kwakira uriya mugome. Yijya kudusebereza igihugu. Nashyikirizwe ubutabera d’abord. Arararara!!! Ubwo ga ejo twakwumva Ngeze Hassan yabaye Ambasaderi muri kimwe mu bihugu by’inshuti, kandi bidufasha?!!” (Umurangi No 007 du 28 Avril, 1992 pg.12).

Birumvikana ko Habyarimana atari kumva Ntawuyirushintege ahubwo yumviye ijwi ry’Interahamwe. Ibyo kwohereza NAHIMANA mu Budage, izo Nterahamwe zabifashe nko kumucira mu mahanga kandi akazi ke gakenewe mu gihugu. Kandi koko byarakomeje.

Iyo Habyarimana agera aho akavuga ko na Nahimana ari “Ikinani cyananiye abagome n’abagambanyi” ni uko atari icyivugo cye yari amuhaye, ahubwo yagombaga kuguma hafi agategura guhashya/Kwica “Abagome” (Abatutsi), n’ “Abagambanyi” (Abahutu badashyigikiye Jenoside).

Amagambo Habyarimana yakoresheje nka “Umwanzi”—“Nta mpongano y’Umwanzi”—“kugabanya ibyitso” n’andi nkayo byari ibimenyetso. Impiri ikwikiyemo imisumari yakoreshejwe muri Jenoside yitwaga “nta mpongano y’umwanzi”. Umukuru w’igihugu yari yarabiboneye izina.

Ubwo bwicanyi bwakorwaga mu gihugu FPR-Inkotanyi ntiyabashaga kuburwanya ikoresheje amatangazo nka MDR na PL. Byabaye ngombwa ko imbunda ikora. Igitero cyo ku wa 5 Kamena 1992 cyatumye habaho imishyikirano y’amahoro.

Nkuko nigeze kubyandika, mu masezerano yo guhagarika intambara Inkotanyi zashyirishijemo igika gisobanura ko gucecekesha imbunda atari byo bitanga amahoro nko gucecekesha ababiba urwango n’ingengabitekerezo ya Jenoside.

Iyo ntekerezo ubu iri mu Itegeko-Nshinga n’andi mategeko y’u Rwanda. Abagishaka gukora politiki ishingira ku bitekerezo bitanya Abanyarwanda—nka Nahimana Thomas, Ndereyehe Charles, Twagiramungu Faustin na GASANA Anastase basizwe n’igihe. Bashatse bayoboka bakareka kubeshya abato nabo ubwabo batiretse. Bakibuka ko ababikwizaga byatsinzwe banafite ubutegetsi.

Umushakashatsi Tom Ndahiro

Biracyaza…


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza