Uko FPR yahoze niko iri ni na ko izahora (Igice cya 6)

Yanditswe na Tom Ndahiro
Kuya 11 Nzeri 2017 saa 09:21
Yasuwe :
0 0

Umwaka w’1992 wabayemo byinshi mu mateka y’u Rwanda. Ni wo mwaka wagaragaje ibimenyetso bikomeye bya Jenoside. Mu gihe cyo kuvuka kwa Cercle des Républicains Progressistes (CRP), nayo ikibaruka Coalition pour la Défense de la République (CDR), hahindutse byinshi mu gihe gito byombi biza bikurikira gushingwa k’umutwe w’abicanyi w’Interahamwe.

Mu gihe gito nyuma yo gushingwa kwa CRP na CDR, ibice byinshi by’u Rwanda byaragurumanye, cyane cyane u Bugesera igihe Abatutsi baho bicwaga, n’amazu yabo agatwikwa ku manywa y’ihangu. Bamwe mu bagize uruhare mu bwicanyi bw’i Bugesera, ni Ngeze Hassan wa CDR na Kangura kimwe na Nahimana Ferdinand wa CRP.

Ku wa 3 Werurwe 1992 Radiyo Rwanda yasomye itangazo mpimbano rivugwa ko ryanditswe n’uwitwa Mutangana Innocent. Iryo ryabeshyaga Abanyarwanda byitwa ko ribaburira ko Inkotanyi zahinduye amayere zikazajya zitwika ahari za lisansi, zigashyira ibisasu mu mamodoka, zikanaroga abantu zikoresheje Abatutsikazi.

MDR na PL bamaganye Jenoside yategurwaga

Kuri iyo itariki ya 3 Werurwe 1992, ishyaka PL ryandikiye Perezida Habyarimana Juvenal ibaruwa iri mu rurimi rw’igifaransa bamwereka ko u Rwanda ruri muri bimwe mu bihe bibi by’amateka yarwo. Bamwandikiye bamubwira ko ari inshingano yabo gutanga umuti w’ibibazo bireba igihugu. PL yasabye umukuru w’igihugu gukora ibishoboka byose agashaka icyabuza intambara ngo yifuzwa na bamwe mu bategetsi bakomeye.

Ku bijyanye n’intambara iryo shyaka ryasabye ko habaho imishyikirano itaziguye kandi nyakuri hagati ya Leta y’u Rwanda na FPR-Inkotanyi. Muri iyo baruwa PL yamaganye “Inyandiko za MRND zikwiza urwango n’amacakubiri mu moko kuko bishobora kuzatera intambara.” Banamagana amagambo ya Depite RUGIRA Amandin yavugiye mu ntara yo hagati mu gihugu no mu majyepfo (Gitarama, Gikongoro, Ndora na Stade Huye) ahamagarira abantu ubwicanyi. Urugero rwatanzwe ni mitingi ya MRND i Butare ku wa 19 Mutarama 1992 aho Rugira Amandin yagaragaje kubabazwa n’ubufatanye bwa MDR na PL kandi PL irimo Abatutsi benshi.

Depite RUGIRA yasabye abayoboke ba MRND kurimbura Abatutsi bazayoboka P.L abacira umugani ngo “ujya gutwika imbagara arazegeranya...nibateraniremo, nimubatwike, ku Batutsi bakomeje kujya muri P.L” Depite RUGIRA yareruye asa n’uburira Abatutsi ngo: “Umugabo waburiwe abarwamo babiri”.

Mu mvugo ya RUGIRA kurimbura Abatutsi byari koroha mu gihe begeranye. Babigezeho. Za Kiliziya ziciwemo Abatutsi benshi ari muri gahunda yo “gutwika imbagara”.

PL yabwiye Habyarimana iti “Nta gushidikanya rero niba nta gikozwe ngo Jenoside ibuzwe gushyirwa mu bikorwa, Bwana Rugira, abo bafatanyije n’abo bahuje bene ibyo bitekerezo bibisha, bazabishyira mu bikorwa. Urugero rwa Rugira ni rumwe mu zindi nyinshi zigishwa kandi zishyirwa mu bikorwa n’abayobozi bakuru ba MRND n’ishami ryayo ry’urubyiruko Interahamwe rirangwa n’ibikorwa by’iterabwoba aho riri hose”.

Nyuma y’iminsi ibiri gusa, ku itariki ya 5 Werurwe 1992, i Kigali, hasohotse ‘Itangazo Sipesiyali’ N°1 rya MDR NA PL rivuga ngo “Twatahuye ikinyoma cyambaye ubugome bwa MRND”.

Ayo mashyaka yagaragaje ko ikigamijwe na propaganda ya MRND ari “ukurimbura Abatutsi n’Abahutu batavuga rumwe na MRND.” Iryo tangazo ryamaganye “Radio yahoze yitwa iy’u Rwanda none ikaba yarabaye icyitso cy’abashaka kubiba imbuto y’amacakubiri n’imyiryane mu gihugu.”

MDR na PL basabye Abanyarwanda “kwamagana imigambi mibi” ya MRND “yo gukwiza ubwicanyi mu turere twinshi tw’igihugu.” Urugero rw’iyo migambi mibisha ni ibaruwa KAREMERA Edouard wa MRND yandikiye Perezida wa Repubulika ku wa 26 Gashyantare 1992 asa n’umwibira akabanga ko ibibi byose bikorwa mu Rwanda bikwiye kuryozwa MDR na P.L. akanasaba Guverinoma gufatira ayo mashyaka ibyemezo.

Iyo baruwa ya KAREMERA, yasongewe n’ikiganiro cya MRND kuri Radio ngo MDR irashoza intambara mu gihugu. Ishimangirwa na Minisitiri MUNYAZESA Faustin wavuze ngo ati: “Guerre civile iratwugarije” yemeza ko ibyavuzwe na taragiti yitwa ko yavuye Nairobi ari ukuri.

Nkuko byanditswe n’ikinyamakuru ISIBO (N° 44 du 25 fevrier au 03 mars 1992) ya taragiti yakomye imbarutso y’ubwicanyi i Bugesera, yaje ikurikira ibaruwa ya KAREMERA Edouard wabwiye Perezida Habyarimana ko hari ‘amashyaka akorana n’umwanzi cyane cyane PL’ yatangiye gahunda y’Inkotanyi.

Ku itariki ya 11 Werurwe 1992, abagize Komite Nyobozi (Comite Directeur) ya MDR bamaganye ubwicanyi bwakorwaga mu gihugu. Mu itangazo ryabo rigenewe abanyamakuru No 12, rifite umutwe ‘HALTE AU MASSACRE DES INNOCENTS’ (Hagarika ubwicanyi bw’Inzirakarengane) ryasinywe na Bagaragaza Thadee, Kambanda Jean, Matunguru Sylvestre, Niyitegeka Eliezer, Nsengiyaremye Dismas na Twagiramungu Faustin.

Iryo tangazo rivuga ko ubwicanyi bwibasira ubwoko kandi bigakorwa n’urubyiruko rwa MRND (Interahamwe) rwari rumaze amezi make rushyizweho. Urugomo ntirwari mu Bugesera gusa ahubwo ko ngo no mu komini ya Rubavu, Karago, Kanama, Satinsyi, Nkuli, Mukingo, Kigombe, Tare, Shyorongi, Kacyiru, Nyarugenge, Musambira, Mugina, Gisuma, Sake, Mugesera, Murambi, Nyamugali, Ndusu etc... byari bihari.

Abanditse iryo tangazo basabye leta kwirukana Sekagina Faustin wari Su-Perefe wa Kanazi, Rwambuka Fidel wari Burugumestri wa Kanzenze na Nahimana Ferdinand wari Umuyobozi wa ORINFOR. Leta ntacyo yabikozeho. Jenoside yakorewe Abatutsi mu 1994 yabaye Sekagina Faustin akiri mu butegetsi bw’igihugu kuko yari Su-Perefe muri Rushashi ya Kigali-Ngali. Kubera ingengabitekerezo ye ya Jenoside kugeza mu w’2008 SEKAGINA alias MANZI yari Komiseri wungirije ushinzwe ‘Gender/Uburinganire muri FDLR.

Umugambi wa Jenoside waravuzwe no mu ISIBO

Ibinyamakuru n’amatangazo byavugaga Jenoside ariko ntihagire abanyamahanga babyitaho. Uretse ayo matangazo abiri mvuze ya MDR na PL, ikinyamakuru ISIBO mu nkuru yanditswe na MUSANGAMFURA Sixbert “REVOLISIYO YARATANGIYE” (ISIBO N° 45 du 4 au 11 mars 1992 pg.2) aragira ati: “Abategetsi bamwe bashyigikiye iyicwa ry’abaturage (Abatutsi bo mu Kingogo, Abagogwe n’Abahima, Abatutsi b’i Bugesera n’i Murambi). Abategetsi babifitemo uruhare ntawe ubavuga (…) babishyigikiwemo na Radiyo Rwanda n’amashyaka ngo y’Abahutu kurusha abandi.” Ayo mashyaka ni MRND/CDR.

MUSANGAMFURA akavuga ko kuva mu Kwakira 1990, “Umukiga yerekanye urwango rukomeye ku Mututsi n’akamukomokaho kose, kugeza ubwo abahugutse mu bakiga bakwije iki gitekerezo ngo “ umututsi si umuntu ”, ubwo imambo zirababona mu Bigogwe, agahini n’agahoro kararikora muri Kibilira, za Murambi n’ahandi. Ibyo bitekerezo bitsemba, Abakiga bamwe bakomeje gukwirakwiza basanze bidahagije bashinga ishyaka n’ishyirahamwe rifite intego yaryo ya mbere itihishiriye yo kurimbura gatutsi. Ukubita imbeba ntababarira n’ihaka.”

MUSANGAMFURA yemeza ko hari “Abakiga benshi bakuye agahu ku nnyo”, atanga urugero rw’abashinze CRP we adatandukanya na CDR. Amazina yavuze muri abo bafite umugambi wo kurimbura Abatutsi Nahimana Ferdinand, Maniragaba Balibutsa, Ndereyehe Charles Ntahontuye na Nshimyimana Alexis “n’abandi bavuga ko ngo bahuriye mu gatsiko gaharanira Repubulika (CDR) bamamaje mu gihe cy’isaha yose amatwara agamije gutsembaho no kurimbura ubwoko bw’Abatutsi.”

Uwo muyobozi mukuru w’ISIBO ati: “(.....) Na none kandi mu gutoteza Abatutsi abakiga biyumvamo gukunda igihugu kurusha abandi, bakumva ko hari icyo barushije Abahutu bo mu Nduga, bavuga ko ari abaja b’Abatutsi cyangwa ngo nabo ntawamenya. Abatutsi nibashira hazakurikiraho abanyenduga.”

Musangamfura yasabye “Abahutu bacisha m’ukuri n’abakiga bake bemera ukuri guhaguruka bakamagana uyu mugambi wo gutsembaho ubwoko bumwe no gukomeza gukwiza inzangano mu banyarwanda ngo bakunde babone uko babategeka." Iby’iyo Jenoside babonaga itegurwa biri no mu yindi Nyangiko ya HABINEZA Aphrodice ibaza ngo “UMUKIGA APFA IKI N’UMUTUTSI?” (ISIBO N° 45 p. 2-3)

Icyo abo banyamakuru batavuze ngo berure, ni uko abatangije CRP ba mbere, bose bakomokaga mu Ruhengeri nkuko nigeze kubigaragaza.

FPR yanze kuba indorerezi y’ubwicanyi

Mu ibanga Habyarimana yari yarashyirishijeho akanama kiswe “Comité de Contact” igizwe n’abayobozi b’Abagatolika n’Abaporotesitanti. Ayishiraho yashakaga kwerekana ko hari ashaka amahoro. Benshi muri abo bayobozi b’amadini bari intagondwa zishyigikira MRND/CDR.

Kuwa 27 Mutarama no kuwa 6 Gashyantare 1992, “Comité de Contact” yaganiriye n’abahagarariye amashyaka mu Rwanda. Biciye mu banyamahanga baziranye n’abanyamuryango ba FPR-Inkotanyi, “Comité de Contact” yahuye mu ibanga n’intumwa z’Inkotanyi i Nairobi-Kenya.

Uretse ibyo kunoza umugambi w’imishyikirano y’amahoro Inkotanyi zatumye ako kanama kuri leta ya Habyarimana guhagarika ubwicanyi mu gihugu. Banabasabye kubwira ubutegetsi bw’u Rwanda guhagarika propaganda ishyamiranya Abanyarwanda. Ntawamenya niba baratumitse, ariko ntacyahindutse.

Ku wa 16 Mata 1992, hagiyeho Guverinoma ihuriweho n’amashyaka menshi. Minisitiri w’Intebe aba NSENGIYAREMYE Dismas wa MDR bavanyeho NSANZIMANA Sylvestre wa MRND. Izo mpinduka zaturutse ku gitutu cya politiki Inkotanyi zagiragamo uruhare.

Mu nshingano iyo Guverinoma yihaye, harimo kugirana imishyikirano na FPR-Inkotanyi. Imishyikirano itarifuzwaga na MRND. Ku wa 24 Gicurasi 1992 i Kampala-Uganda, Inkotanyi zahuye n’Intumwa za leta y’u Rwanda ziyobowe na NGULINZIRA Boniface, wari Minisitiri w’Ububanyi n’Amahanga. Icy’ingenzi cyemerejwemo n’uko imishyikirano y’amahoro itaziguye ari ngombwa hanashyirwaho ingengabihe y’agategenyo.

Mu rwego rwo gushimangira ibyemejwe, ku wa 29 Gicurasi 1992, i Buruseli mu Bubiligi hatangiye ibiganiro bitari mu rwego rwa leta bigamije kugarura amahoro. Byabaye hagati y’Inkotanyi ku ruhande rumwe, n’amashyaka ya politiki MDR, PL na PSD ku rundi.

Kwerekana kutishimira iyo mishyikirano kwa MRND/CDR, kuri iyo tariki ya 29 Gicurasi habaye imyigaragambyo ikozwe n’abasirikari, irimo urugomo rwinshi n’ubusahuzi mu maperefegitura ya Gisenyi na Ruhengeri. Aboshyaga abo basirikare bagasobanura ko batinya amasezerano y’amahoro azabagira abashomeri.

Uko imishyikirano yakorwaga, ubwicanyi n’ibikorwa by’ubugome byariyongeraga. FPR-Inkotanyi zasanze hari imvugo itumvwa n’abasirikare bumvira MRND/CDR badashaka amahoro. Ku itariki ya 5 Kamena, Inkotanyi zagabye igitero ku ngabo za Leta muri perefegitura ya Byumba na Ruhengeri.

Igitero cyafashe ahantu hanini, bituma ibyo kubeshya ngo ntaho Inkotanyi zifite ku butaka bw’u Rwanda bishira. Abafaransa batabaye ingabo za Leta kurwanya icyo gitero. Abafaransa bakoresheje intwaro zikomeye ngo batsimbure Inkotanyi biranga. Ari abategetsi b’i Paris ari aba MRND/CDR bumvise ko nta kindi gishoboka uretse kuyoboka inzira y’amahoro badashaka ku gahato.

Ku itariki ya 6 na 7 Kamena 1992 i Paris mu Bufaransa habaye imishyikirano noneho MRND iremera. Amasezerano yo guhagarika imirwano asinywa ku wa 12 Nyakanga 1992 i Arusha-Tanzaniya hari hemejwe ko n’indi mishyikirano izakomereza.

Imishyikirano yabereye Arusha abo muri MRND/CDR n’Abafaransa batabishaka, bifuza ko bibera i Paris cyangwa ahandi muri ‘Francophonie’ hanze ya Afurika. Inkotanyi zarabyanze zishaka ko ibibazo byo muri Afurika bikemurirwa muri Afurika. Nyuma y’inama yabereye i Paris, Inkotanyi zasabye Umuryango w’Ubumwe bw’Afurika (OUA) ko imishikirano yabera hafi yo mu Rwanda. OAU yarabyemeye, nyuma y’imishyikirano itandukanye yabereye Addis-Abeba na Arusha.

Umushakashatsi Tom Ndahiro

Biracyaza….


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza