00:00:00 IGIHE NETWORK KN KINYARWANDA EN ENGLISH FR FRANCAIS

Uganda ntiyigeze ikunda Rwigema kugeza apfuye

Yanditswe na Tom Ndahiro
Kuya 12 Ugushyingo 2021 saa 08:05
Yasuwe :
0 0

Mu Cyumweru gishize ubwo Perezida Kagame yari yitabiriye ubukwe bwa Teta, umukobwa wa Gen Fred Rwigema, yashyize umucyo ku mahari amaze imyaka myinshi hagati y’u Rwanda na Uganda kugeza n’aho uyu muturanyi warwo wo mu Majyaruguru atangiye kwivanga muri politiki yarwo.

By’umwihariko Perezida Kagame yagarutse ku buryo Uganda yashatse gukoresha umuryango wa Rwigema nk’iturufu yo kurwanya ubutegetsi bw’u Rwanda.

Yavuze ko inshuro nyinshi yagiye ahitamo guceceka kuko habaga hari ibindi bibazo bikomeye bikwiriye kwitabwaho kandi ko n’ubusanzwe ahitamo mu bushishozi intambara arwana.

Gusa hari ubwo biba bikwiriye ko ibintu bishyirwa ku mugaragaro kuko Rwigema ni umwe muri twe ntabwo ari uw’abo bamwiyitirira.

Rimwe na rimwe, Uganda yakunze kugaragaza Rwigema nk’umunyarwanda wenyine ukwiriye gushimirwa uruhare rwe mu kubohora Uganda.

Bavuga ko uruhare rw’abanyarwanda muri urwo rugamba rwari ruto cyane kandi ko nta gaciro rwari rufite usibye urwa Rwigema gusa. Ni ibintu bidafututse gutesha agaciro ubuzima bw’abantu ibihumbi bemeye guhara amagara yabo, by’umwihariko abaguye ku rugamba muri Uganda, ariko ibyo bakoze bikarenzwa ingohe hagamijwe gushyira imbere politiki ziciriritse.

Ikindi kibabaje ni uko abimakaje iyi politiki ipfuye, nta na rimwe bigeze bita kuri Rwigema ubwo yari akiri muzima.

Umunyamakuru wa NRA, William Pike, mu 1981 yigeze kwandika ko ubwo umusirikare mukuru wa NRA, Gen Elly Tumwine, yaraswaga mu jisho urugamba rugitangira i Kabamba, yahise atabarwa na Rwigema.

Tumwine yararwaye kugeza mu 1983 ubwo yajyanwaga mu bitaro i Nairobi, akahamara igihe kinini kugeza muri Mutarama 1986 ubwo NRA yafataga ubutegetsi.

Muri icyo gihe, Rwigema ni we wayoboye urugamba mu bihe bikomeye. Ibikorwa bye by’ubutwari hamwe n’abandi banyarwanda ibihumbi ni byo byagize uruhare mu ibohorwa rya Uganda. Muri icyo gihe, Museveni yamaze igihe kinini ari muri Suède hamwe n’umugore we n’abana.

Gusa ibyo Rwigema yakoze akiriho ntabwo bigeze babimushimira, ahubwo babikoze yarapfuye. Urugero, nyuma yo gutsinda urugamba Tumwine yasubijwe ku buyobozi, mu gihe igihe kinini cyarwo yari yarakimaze i Nairobi kandi yari umugaba w’ingabo. Uwarwanye urugamba akarutsinda, we yarengejwe ingohe icyo gihe.

Yewe no mu 1987 ubwo Tumwine yasimburwaga na Salim Saleh, Rwigema yirengejwe ingohe ku nshuro ya kabiri. Ibaze umugaba w’ingabo wungirije bavuga ko bakundaga cyane, kumurutisha umuntu wari warataye urugamba.

Nta muntu ukwiriye kwibagirwa ko politiki y’amoko igaragaza ibikorwa bya Museveni (bya kera n’iby’ubu) nk’ibyari byihishe inyuma y’imyanzuro yo kurenza ingohe ubutwari bwa Rwigema.

Urugero, Umuhima nka Salim Saleh, Pecos Kutesa n’abandi bari bararahiye ko badashobora guterera Rwigema isaluti, mu gihe yari umusirikare mukuru kuri bo.

Iryo ubwaryo ni ikosa rikomeye mu gisirikare ariko ntacyo byari bivuze kuko uwo barikoreraga ari Umunyarwanda batahaga agaciro nk’ukwiriye icyubahiro nubwo yari mukuru kuri bo.

Nyuma yo kwima Rwigema umwanya yari yarakoreye, Museveni yashyizeho umwanya yise uw’“Umuyobozi ushinzwe kugenzura ibikorwa, Overall Operations Commander (OOC)” utari ufite ikintu kinini uvuze arangije awuha Rwigema.

Mu by’ukuri, Rwigema ntabwo yari agifite ububasha bwo kugenzura ibikorwa bya gisirikare nk’uko yari abufite kuri ba bandi bangaga kumuterera isaluti. Uwo mwanya nta kintu kinini wari uvuze. Ese ibyo nibyo byakorwa n’umuntu wakundaga Rwigema?

Ntabwo bigeze bakunda Fred kuko bitandukanye n’abandi, we yareruraga akavuga ko ari umunyarwanda kandi ntiyemeraga ko abanyarwanda bafatwa nk’abantu baciriritse mu gisirikare cya NRA. Mu yandi magambo, iyo baza kuba bakunda Rwigema, ntibari gutoteza abanyarwanda.

Ubwo Rwigema yari muzima, baramukoresheje ndetse we n’abandi banyarwanda bakajya babohereza ku rugamba rukomeye babaga batinye koherezayo abasirikare babo. Mu rupfu rwe nibwo bigize nk’aho bamukunda, batangira kumvisha umuryango we ko bamukundaga.

Ariko ni gute wakunda umuryango wa Rwigema mu gihe utigeze ukunda Rwigema ubwe? Abayobozi muri Uganda bafata gukunda Rwigema nk’urwitwazo. Ese ubundi ni nde bigeze bakunda mu gihe abo bitaga ko bakunda bagiye bafatwa nabi iyo icyo babashakagamo cyabaga kirangiye.

Ntabwo bazigera bamuririra kurusha abanyarwanda bazahora bazirikana uruhare rwe mu kurinda imiryango yabo.

Uganda yigamba ko ikunda Rwigema mu gihe itigeze ibimugaragariza akiriho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .