00:00:00 IGIHE NETWORK KN KINYARWANDA EN ENGLISH FR FRANCAIS

Ubushyamirane hagati y’u Rwanda na Uganda sibwo abaturage bakeneye

Yanditswe na Kabagambe R. Ignatius
Kuya 2 Ugushyingo 2021 saa 05:00
Yasuwe :
0 0

Bizaba uko byakagenze nubwo Uganda ihakana cyangwa ikaba ahari yarananiwe gukemura ikibazo yagaragarijwe n’u Rwanda. Ku batari bazi uko ibintu bihagaze, Uganda mu by’ukuri ifite ikintu kimwe isaba u Rwanda. Ko rureka kohereza, sinzi,..abanyarwanda muri Uganda gukora ubutasi mu buryo butemewe.

U Rwanda mu buryo bweruye ntiruzi uko ibyo byakorwa. Birasa nk’aho ubutegetsi bwa Kampala bufite ubwoba bw’indengakamere, butinya ikintu kidahari. Ibyo yita ubutasi bukorwa n’u Rwanda, bwayibereye nka baringa ntibyari bikwiye tuvugishije ukuri. Ntibyumvikana ukuntu igihugu kivukanyi cyagushinja gukora ibintu bisanzwe.

Ubutasi hagati y’ibihugu ni ibintu bisanzwe ku isi nzima. Ni gute ibirego bidafite ishingiro byemerwa ahantu hose? Ikibazo cy’ubutasi bwa Kampala ku Rwanda ubwacyo nta gaciro cyagira.

Ubwo muri Kamena 2015 Leta Zunze Ubumwe za Amerika zatahuraga ko u Bushinwa bwibye amabanga mu biro bishinzwe abakozi (OPM), White House yabifashe nk’ibintu bisanzwe nubwo byari byashyushye mu binyamakuru.

Ubwo yagiraga icyo abivugaho, Robert K. Knate, wari umuyobozi Mukuru ushinzwe politiki ijyanye n’iby’ikoranabuhanga muri komisiyo y’Ububanyi n’amahanga yagize ati “Niba guverinoma y’u Bushinwa yihishe inyuma y’iki gikorwa, abatasi bayo bakoze ibyo bigishijwe gukora. Bakoze ibyo natwe twatekerezaga ko bashobora gukora kandi twagombaga kuba twiteguye kurwanya. Nk’uko Gen. Michael Hayden, wahoze ari umuyobozi wa NSA na CIA ku butegetsi bwa Bush yabivuze, ‘iki si ikimwaro ku Bushinwa. Ni ikimwaro kuri twe.”

Biteye isoni kuba Uganda irwanya icyo yita ubutasi ikorwaho n’u Rwanda irwanisha uburyo budakwiye, itoteza abaturage b’inzirakarengane b’ibihugu byombi. Reka tujye ku ruhande rwa Knate. Mu gihe cye yasobanuye ko “hakurikijwe amahame agenga ubutasi, kumenya amakuru ku bakozi ba Leta byari bifite ishingiro.”

None se bigenda bite ku Rwanda iyo rukurikirana amakuru y’imitwe yitwaje intwaro irwanya ubutegetsi bwarwo ikorera muri Uganda? Ibyo bikwiye kuba ari ibintu byemewe bidasubirwaho. Birazwi ko iyi mitwe y’abarwanyi yagiye itahurwa iri mu bikorwa byo gushaka abandi yinjiza, isaba ubufasha ndetse yahawe impapuro z’inzira n’inzego z’ubutegetsi bwa Uganda.

U Rwanda rufite urutonde rurerure rw’ibyo rushinja Uganda. Ku isonga hari ukuba Uganda ishyigikira cyangwa igaha umwidegembyo ku butaka bwayo abashaka guhungabanya umutekano w’u Rwanda. Kugira ngo ibi bihagarare bisaba ko inzego z’umutekano za Uganda zihagarika umubano zifitanye n’iyi mitwe yigometse ku butegetsi bw’u Rwanda.

Muri urwo rwego u Rwanda rwagaragaje ibintu simusiga Uganda ikwiye kwemera. Urugero yagaragaje amazina y’abayobozi b’imitwe y’iterabwoba n’abo bakorana mu nzego zitandukanye za leta ya Uganda by’umwihariko mu rwego rushinzwe ubutasi bwa gisirikare (CMI).

Ibimenyetso u Rwanda rwatanze biruzuye kuko bihuza n’amatariki y’ibikorwa byabayeho, inama zabaye n’aho zabereye, ingengabihe y’ibikorwa, ibikoresho byatanzwe nk’ubufasha n’ibindi.

Uganda imaze kubura aho ihera ihakana ibi bimenyetso bifatika, yatanze icyizere ko izabikoraho iperereza. Nyamara guhera mbere icyo bakora bagamije guhungabanya ubutegetsi bw’u Rwanda baba babigambiriye, si ibibagwirira. Kampala yishima mu mutwe yibaza uko amakuru nk’ayo yuje ibimenyetso simusiga yaguye mu biganza by’u Rwanda.

Nyamara mu bihe byashize hari igikorwa kimwe cyabaye gisa n’impanuka. Turemera ko twamenyeshejwe iby’iyi mpanuka...mumbabarire sinshaka kubasetsa. Ndizera neza ko na we wibutse ibya ya nama yabayeho mu buryo bw’impanuka.

Mu myaka ibiri n’igice ishize Charlotte Mukankusi na Eugene Gasana bombi bo muri RNC, bakiranywe icyubahiro gikwiriye abantu b’ikirenga.

Uretse kuba aba bayobozi bakuru ba RNC barakiriwe n’umuyobozi w’ikirenga muri Uganda, mu mpano guverinoma yabahaye harimo pasiporo ya Uganda kugira ngo yorohereze ingendo z’umuyobozi ushinzwe ibikorwa bya diplomasi muri uyu mutwe.

Nyuma y’aho u Rwanda rubimenye kandi ntirurye indimi ku byabaye, byakojeje isoni ubuyobozi. Iyo iza kuba ari gahunda ya Gen. Abel Kandiho biba byaramukozeho gutatira ibyo umutegetsi mukuru ashaka.

Amakuru yerekeye pasiporo kimwe n’urugendo rw’aba bombi yari yuzuyemo ibimenyetso bifatika. Bifite uburemere bwagereranywa n’ubw’ibaruwa yo ku ya 28 Kanama 2001 yandikiwe uwahoze ari Minisitiri w’u Bwongereza ushinzwe iterambere mpuzamahanga, Clare Short, yanditswe na Perezida Museveni avuga kuri Perezida Kagame.

Iby’iyi baruwa ntibyigeze biba ibanga nk’uko byagenze kuri iyo nama n’abayobozi ba RNC.

Yumvise ahatirwa kumenyesha iyo nama mu ibaruwa ifunguye yandikiye mugenzi we w’u Rwanda, agira ati: “Nkwandikiye ngira ngo nkumenyeshe ko ku bw’impanuka, nagiranye inama n’umunyarwanda wemeye ko ari umwe umwe mu bagize itsinda wambwiye - Rwanda National Congress (RNC).

Uyu ni umugore uzwi nka Mukankusi, nzi neza ko umuzi ariko ntari narigeze mpura na we mbere. Umwe mu bo muri NRM yakomezaga kumbwira ko hari umugore ukomoka mu Rwanda ufite amakuru y’ingirakamaro ashaka kumpa kandi ko yashakaga kuzana n’undi witwa Gasana na we ufite amakuru y’ingenzi. Yavuze ko yanshakaga ngo ambwire ibintu bibi byaberaga mu Rwanda. Nyuma yambwiye ko yinjiye muri RNC ngo arwanye ubutegetsi bwawe nyakubahwa kandi yashakaga ubufasha bwacu.”

None niba igihugu cyakorera ibintu bimeze bityo uwahoze afatanyije na cyo, ni gute yakomeza kwinubira ko igihugu cyakorewe nk’ibyo kimutata.

Nibikomeza gutya, Perezida Kagame ni we wenyine uzajya wumva yibaza n’ijwi rirenga icyo Guverinoma ye yakora ngo ivugurure umubano wayo na Uganda. Ku ruhande rwa Perezida Museveni, uzumva icyo asaba ari uguhagarika ubutasi no gufungura umupaka.

Naho Bob Atwine wa commandonepost.com, ikinyamakuru cya CMI, uzamwumva mu butumwa atanga yitwikiriye izina rya Jean Damascene Habumuremyi ariko akiyibagiza ikintu kimwe cy’ingenzi. Umuntu witwa iryo zina w’i Byumba ntashobora kuvuga ngo “ukuri gucya mu ziko nigushye.” Yari kumenya neza ko bandika ‘ukuri guca mu ziko ntigushye.’

Bob Atwine utarashoboye guhimba amazina atabaho ngo yiyoberanye mu byo atangaza ubusanzwe adashobora guhagaragara ku maguru yombi ngo abivuge, ari inyuma yanjye n’ibikangisho by’ubwoko bwose. Njye ibyo mvuga mu nyandiko zanjye ntabwo ntsikira nk’undi uwo ari we wese.

Ndashaka kuvuga ku gutanga ubutumwa mu buryo busanzwe. Gukunda igihugu ni byo bimpata nk’uko bimeze kuri Bob Atwine. Ariko hari itandukaniro rinini hagati y’ibikorwa byanjye n’ibye. Akorera munsi y’ikinyoma mu gihe njye noga hejuru y’ukuri. Ni yo mpamvu ibyo mvuga mba mbihagazeho nemye na ho we aba ahwihwisa mu kwaha kwa blog za CMI. Ukuri ni ko kwabohoye u Rwanda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .