Kwamamaza

Uburyo u Burundi buri kwinjiza amadayimoni yabwo muri EAC

Yanditswe kuya 18-09-2016 saa 10:09' na Albert Rudatsimburwa


Mu mezi atanu ashize ubwo Umunyamamabanga Mukuru mushya w’Umuryango wa Afurika y’u Burasirazuba, Umurundi, Liberat Mfumukeko, yarahiriraga inshingano ze, ababikurikiranira hafi bari bafite amakenga ku buryo azuzuza inshingano ze nta kubogama, cyane nibigera ku bibazo biri mu gihugu cye cy’amavuko.

Byahuye n’igihe u Burundi bwagombaga gufata ubuyobozi bukuru bwa EAC mu rwego rw’abakuru b’ibihugu. Bwahisemo kureka uwo mwanya ahubwo bushyira imbaraga cyane ku mwanya w’Umunyamabanga Mukuru ndetse ibihugu bigize EAC bibyemeranyaho.

Ibyo ubwabyo byagombaga gutera amakenga kurushaho. Gusa amategeko atanditse yo muri dipolomasi asaba imigenzereze nk’iyi kugira ngo igikorwa gikurikira kitageza Umuryango wose ahantu habi.

Ndakeka ko John Pombe Magufuli, Perezida wa Tanzania akaba n’Umuyobozi Mukuru w’Inama y’Abakuru b’Ibihugu bya EAC, yaba yaragiranye ibiganiro byimbitse na bagenzi be, cyane cyane na Perezida Kagame wakunze kwibasirwa mu “mvugo zishotora” ziheruka z’ishyaka rya CNDD FDD mu Burundi, ko afite ubushobozi bwo guhangana n’ibyo byose mu mwanya arimo.

Birashoboka ko ariyo mpamvu Perezida Magufuli aheruka gusanga ari ngombwa kwibutsa Umunyamabanga Mukuru mushya ko agomba gukorera umuryango muri rusange kurusha inyungu bwite z’igihugu avukamo.

Gusa biri kugenda byiyongera, bigaragara ko Mfumukeko yamaze kubona amahitamo ye ajyanye n’inyungu ashaka gushyira imbere. N’ikimenyimenyi kuva yarahira ntarakoza ikirenge cye ku butaka bw’u Rwanda. Ntibyanabaye no mu gihe yari akenewe mu nama zikomeye z’akarere n’umugabane muri rusange zimaze igihe zibera i Kigali.

Inama ya 17 y’Abakuru b’ibihugu bya Afurika yarabaye irahita. Ni nako byagenze ku yindi nama iheruka yigaga ku ishoramari muri Afurika, wenda mvuge ebyiri zonyine.
Byagorana ngo umuntu yirengagize urwango abayobozi b’igihugu cye bafitiye u Rwanda nk’impamvu y’ugukomeza kutitabira izi nama.

Byamaze guhinduka nk’amayeri kuva Pierre Nkurunziza na guverinoma ye biyemeje gutera umugongo amasezerano y’amahoro ya Arusha, bahisemo gushinja u Rwanda guteza umutekano mucye mu Burundi.

Imvugo zisesereza Kigali ziva mu kanwa k’abayobozi mu Burundi zatangiye gake gake ziza gufata indi ntera, ubwo Dr Richard Sezibera wahoze ari Umunyamabanga Mukuru wa EAC ufite ubwenegihugu bw’u Rwanda, yasunikwaga nabi n’inzego z’umutekano mu Burundi ubwo yari yoherejwe na Perezida Museveni hamwe na Minisitiri Kiyonga w’Ingabo wa Uganda, mu butumwa bwari bugamije gusubukura ibiganiro hagati y’Abarundi.

Muri imwe mu nama yaseserejwe n’abahagarariye Guverinoma y’u Burundi n’ishyaka riri ku butegetsi, CNDD-FDD, bamushinja gukorera u Rwanda mu guteza umutekano muke mu Burundi.

Byabaye imbarutso y’itotezwa rindi ry’abafite ubwenegihugu bw’u Rwanda bari ku butaka bw’u Burundi, hazamo ibyo kubata muri yombi binyuranyije n’amategeko no kubica mu buryo bashatse. Ibi byahise bigira ingaruka mbi ku rujya n’uruza rw’abantu n’ibicuruzwa hagati y’u Rwanda n’u Burundi.

Ku bya vuba, Ubuyobozi bw’u Burundi, by’umwihariko Perezida w’Inteko Ishinga Amategeko y’u Burundi Pascal Nyabenda n’Umuyobozi wa CNDD-FDD yumvikanye mu mvugo zihakana Jenoside, avuga ko Jenoside yakorewe Abatutsi mu 1994 itigeze ibaho.

Cyakora Liberat Mfumukeko we ntiyigeze agaragara ajya muri izi mvugo, nibura ngo bibere mu ruhame. Ariko guhuza ibikorwa by’Umunyamabanga wa EAC na gahunda yo mu gihugu cye yo gushotora u Rwanda byabaye impamo kandi binarenze kutitabira inama zinyuranye ziheruka.

Mu guhangana n’ibibazo biri mu Burundi Mfumukeko yagiye afata ibyemezo bibogamiye cyane ku Burundi, ku buryo umuntu atapfa kubyirengagiza.

Ku isonga hazamo guheza impande zitandukanye mu biganiro bihuje Abarundi biyobowe na EAC, kandi zari zisanzwe ari abafatanyabikorwa b’uyu muryango mu gukemura amakimbirane, harimo nk’Akanama Ngishwanama k’Inararibonye za EAC Akanama k’inararibonye za COMESA n’Ishami Rishinzwe gukemura amakimbirane, Umuryango wa Afurika Yunze Ubumwe, n’abandi.

Nyamara imyumvire n’ubumenyi bafite ku bibazo by’u Burundi byafashije cyane Inama Idasanzwe ya EAC yo muri Gicurasi na Nyakanga 2015.

Umuryango w’Abibumbye na AU nayo yijeje ubufasha bwa tekiniki n’ubushobozi bw’amafaranga mu biganiro hagati y’Abarundi ariko Mfumukeko yafashe icyemezo cyo gukora ibishoboka ngo abo bafatanyabikorwa b’ingenzi bagume hanze y’ikibazo.

Yakomeje akora urutonde rw’abantu bagomba kwitabira ibiganiro, ashyiramo n’abantu bafatwa ko babogamiye ku butegetsi bw’u Burundi. Muri ubwo buryo, yasize hanze ihuriro ry’abatavuga rumwe n’ubutegetsi CNARED, Imiryango Iharanira Uburenganzira bwa muntu, Imiryango Itegamiye kuri Leta, bose bari mu buhungiro.

Byongeye yashyizeho imbogamizi zari zigiye gutuma umuhuza muri ibyo biganiro, Benjamin Mkapa, atabasha guhura nabo mu mujyi wa Bruxelles. Yanze kumuha amafaranga y’urwo rugendo, kugeza ubwo byasabye imbaraga za Perezida Magufuli kugira ngo yemere gutanga umusanzu muri icyo kibazo.

Nyuma haza Inama y’Abaminisitiri ya mbere, atangira akazi nyir’izina. Anyuranije n’inama z’abungiriza be, Liberat Mfumukeko yashatse guhindura ibyagombaga gukorwa n’itsinda rishinzwe gukurikirana ibibazo by’umutekano mu Burundi nk’uko byagenwe n’Inama iyobora EAC. Yashakaga kubibyaza raporo yo kujyana mu nama y’Abaministiri. Cyakora abashinzwe gutegura iyo nama banze iyo raporo kubera impamvu nyinshi. Bayikuramo banamugirira inama bamwibutsa uko bikwiye mu cyubahiro cy’amabwiriza agenga Umuryango. Mfumukeko rero yashatse kwirengagiza ijambo ryabo, agerageza kubyongera kuri gahunda y’Inama. Imiterere y’izo ngingo no kutubaha amabwiriza agenga Umuryango wa EAC, byatumye abaminisitiri bamusaba gusohoka mu nama, ubwo bari bagiye kuganira uburyo icyo kibazo cyakemurwa mo. Mbibutse ko iyo yari inama ya mbere y’Abaministri, ari nayo urwego akoreramo. Kubona bamukuramo bitwereka ko batari bishimiye akazi ke cyane cyane kurenga ku mabwiriza agenga Inama.

Amakuru yatanzwe n’umwe mu bakurikiraga iyo nama, avuga ko raporo y’iryo tsinda yari yacuzwe n’uyu Munyamabanga Mukuru ubwe, agaragaza ko umutekano mu Burundi umeze neza yirengagije ibibazo bihari n’imfu za hato na hato. Uyu muyobozi kandi yakoresheje iyi raporo mu kongera gutunga urutoki u Rwanda arushinja ibirego.

Ababikurikiranira hafi bahuza icyo gikorwa no kuba EAC yari yarahagaritse ibikorwa byose mu Burundi. Guhindura ibitekerezo by’abagize inama y’abaminisitiri batanga raporo ku bakuru b’ibihugu bya EAC, ni bumwe mu buryo bwagombaga gutuma bisubiraho ku cyemezo cyafashwe n’Umunyamabanga Mukuru Ucyuye igihe, cyo guhagarika ibikorwa bya EAC mu Burundi.

Hanabayeho kandi gusesa binyuranye n’amategeko Ishami rishinzwe amahoro n’umutekano, avuga ko ryabuze ingengo y’imari. Nta wabura kuvuga ko bamwe mu bahezanguni ba guverinoma b’u Burundi bagiye bitsa bavuga ko iryo shami “rirwanya u Burundi”

Kuri icyo kibazo ho, uwo mwanzuro wateshejwe agaciro n’Inama y’Abaminisitiri yasabye Mfumukeko ko ibyari byakozwe biseswa akanakemura ikibazo cyagejejwe mu rukiko cy’abakozi b’iri shami birukanwe mu buryo bunyuranije n’amategeko.

Abaminisitiri banagaragaje impungenge zo kuba Umunyamabanga Mukuru ari kurenga ku mabwiriza asanzwe ashaka gufunga iryo shami rishinzwe amahoro n’umutekano. Ubushake bwe buke mu gukurikiza amabwiriza kandi buzanagaragazwa neza na Komisiyo y’Inteko Ishinga Amategeko y’Umuryango wa Afurika y’u Burasirazuba (EALA), Ishinzwe Ibikorwa by’Akarere no gukemura amakimbirane, yahawe gukora iperereza ryimbitse kuri icyo kibazo.

Gusa nubwo uyu Munyamabanga Mukuru yasabwe kwisubiraho ku mwanzuro yari yafashe ntiyabyubahirije. Mu gihe Ishami rishinzwe abakozi ryateguye inyandiko ibihamya nyuma y’inama y’abaminisitiri, yanze kuyisinyaho. Byasabye ko Urukiko rw’Umuryango wa Afurika y’u Burasirazuba rwihanangiriza Mfumukeko rumusaba kubahiriza iyo myanzuro, akarushyikiriza inyandiko isinye.

Ibindi bibazo bigomba kurebwaho na Komisiyo ya EALA, harimo no kuba u Burundi bwararenze ku masezerano y’Isoko rusange ku mupaka wabwo n’u Rwanda.

Mu bimaze kugaragara byose, nta gushidikanya cyane guhari ku nyungu Umunyamabanga Mukuru wa EAC yaba ari gukorera: Itsinda ry’Abanyapolitiki ryiteguye intambara mu Burundi.

Kuba u Burundi bwarahawe amahirwe akomeye yo kwisubiraho ku cyubahiro gike bwagaragarije inzego ubwo basunikaga nabi Umunyamabanga Mukuru i Bujumbura, nta gushidikanya ko bahisemo kugeza abadayimoni babo no mu muryango wa Afurika y’u Burasirazuba.

Ibi ni bimwe mu bibazo bikeneye kwitabwaho n’ubunaribonye bw’uyu muryango w’ubukungu umaze kugera kuri byinshi kuri uyu mugabane. Ese uyu muryago ushobora kugumana umwanya wawo ufite Umunyamabanga Mukuru umaze guterwa icyizere cyose mu maso y’abakozi na y’inzego ziwugize, ndetse no mu abafantanyabikorwa mpuzamahanga … kandi mu mezi atanu yonyine?

Albert Rudatsimburwa

Albert Rudatsimburwa
Umusesenguzi muri Politiki y’Ibiyaga Bigari
@albcontact


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 26 September 2016
Copyright © 2009 -2014 - IGIHE Ltd - All Rights Reserved