Kwamamaza

Uburyo butatu mwarimu yakoresha kugira ngo afashe abana batsindwa cyane mu ishuri

Yanditswe kuya 19-08-2016 saa 12:17' na Tombola Felicie


Mu myigire ntabwo abana mu ishuri bagendera ku muvuduko umwe, ntibaba bafite ubushobozi bumwe bwo gufata ibyo bigishijwe ndetse ntibakoresha n’uburyo bumwe bwo kwiga.

Mu gihe ababyeyi usanga bibaza icyakorwa ngo umwana utsindwa isomo iri n’iri cyangwa utabyitayeho abashe gufashwa, IGIHE yagiranye ikiganiro na Dr Alphonse Sebaganwa, Umwarimu n’Umushakashatsi muri Kaminuza y’u Rwanda, Koleji y’Uburezi maze yerekana icyo umwarimu aba agomba gukora kugira ngo umwana ufite intege nke mu ishuri afashwe.

Dr Sebaganwa avuga ko kuba umuvuduko,ubushobozi n’umwete ku bana bitangana ari byo biba bikwiye gutuma umwarimu agerageza kwigisha akoresheje uburyo butandukanye, ibikoresho bifasha mu kumva isomo, gukoresha ibikikije ishuri mu masomo cyane y’ubumenyi n’ibindi, kugira ngo buri mwana agire uburyo bwe bwo kugira icyo akuramo kandi abigizemo uruhare.

Hari uburyo bugera kuri butatu umwarimu yakoresha kugira ngo afashe abana bafite intege nke mu isomo iri n’iri.

1. Gukoresha uburyo bunyuranye bwo kwigisha

Mwarimu ngo yagombye gukoresha uburyo butandukanye kugira ngo buri munyeshuri ndetse na babandi bitwa ko badakurikira neza bafashwe harimo gusobanura isomo ku buryo bw’amagambo,gushushanya,gukoresha abanyeshuri mu matsinda mato nyuma bakagira umwanya wo kuvuga neza ibyo bakoze.

Ubu buryo ngo butinyura umwana mu gutanga igitekerezo cye, kumva abandi, kwihanganira abandi, kuvuga mu ruhame mu gihe ari we watowe na bagenzi be kujya imbere kuvuga ibyo bagezeho n’ibindi.

Harimo kandi gukoresha buri munyeshuri ukwe no kureba inzira akoresha mu gukora ibyo yasabwe.

Ibi mwarimu ntiyashobora kubikora buri munsi kuri buri mwana ariko ashobora kubikora byibura rimwe mu cyumweru kuri buri mwana.

Ikindi kigarukwaho na Dr Sebaganwa ni ugusaba umunyeshuri ubyumva gusobanurira mugenzi we,gushaka umwanya wihariye wo gukorana n’umwana ufite imbogamizi zamaze kugaragara,guha umwanya urenze uw’abandi ba bana batihuta mu gufata notes, cyangwa kurangiza umukoro no gushyira ku ntebe z’imbere abana bagomba gufashwa by’umwihariko kugira ngo mwalimu abahozeho ijisho,abatinyure n’ibindi.

2. Kugerageza kumenya ibibazo byiharihe bidafitanye isano n’ishuri umwana yaba afite

Dr Sebaganwa avuga ko imiryango abana baturukamo ishobora rimwe na rimwe kugira ibibazo bigira ingaruka ku mitekerereze no ku myifatire y’umwana, bikanagira ingaruka zitari nziza mu myigire ye.

Ati “Byari bikwiye ko umwarimu agirana kenshi imishyikirano n’ababyeyi be bwite, umubyeyi urera umwana, kugira ngo yumve neza imvano y’imyifatire cyangwa imikorere idahwitse y’umwana mu ishuri.Hari impamvu nyinshi zishobora guturuka mu muryango zikagira ingaruka mu myigire y’umwana nk’amakimbirane mu muryango, kutitabwaho, guhozwa ku nkeke, gutukwa, gukubitwa n ibindi byinshi.”

3. Kumenya amakosa umwana akunze kugira mu mikoro

Dr Sebaganwa avuga ko“Ikosa si ikimenyetso cyerekana ko umwana adashoboye, ahubwo ni inzira yo guhamya ubushobozi bwe.Twari dukwiye guhindura ijambo “ikosa” tukaryita “imbogamizi”mu ishuri.”

Iyo Umwarimu atanze umukoro ukorerwa mu ishuri cyangwa mu rugo, aba agamije kureba urugero umwana yafatiyeho isomo n’ubushobozi bwo kuba yakoresha ubwo bumenyi mu buzima bwa buri munsi.

Umwarimu ngo yagombye guhera kuri ayo makosa agaragara mu mikoro kugira ngo ashake uburyo bwihariye (butari ubwa rusange) bwo gufasha umwana kumva neza ibyo yakosheje no kwikosora.

“Rimwe na rimwe iyo umwana atsinzwe mu ishuri, mwarimu ndetse n’ababyeyi bakunze kubyitirira umwana gusa. Ntabwo ari byo kuko na mwarimu aba abifitemo uruhare rutaziguye. Uruhare rw’umubyeyi narwo rushobora kubamo ku bijyanye n’uburyo amufasha mu rugo, cyangwa aganira na mwarimu ku buryo bwo kuzamura imikorere ye.

Ni ngombwa rero, mbere yo kunenga umwana utagize amanota meza mu ishuri, ko mwarimu yabanza akinenga, hanyuma n’umubyeyi akibaza icyo yafashije umwana cy’umwihariko.”

Dr Sebaganwa yagaragaje ko ababyeyi n’abarezi baba bagomba gutahiriza umugozi umwe kugira ngo umwa ufite intege nke mu myigire azamuke agendane n’abandi kandi bigakorwa batamuhutaje kuko bishobora kumwangisha ishuri burundu.

Dr Alphonse Sebaganwa, Umwarimu n’Umushakashatsi muri Kaminuza y’u Rwanda, Koleji y’Uburezi

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved