00:00:00 IGIHE NETWORK KN KINYARWANDA EN ENGLISH FR FRANCAIS

Tuzamukane umusozi wa Kabuye!

Yanditswe na Ruzindana Rugasaguhunga
Kuya 5 Ukwakira 2021 saa 11:58
Yasuwe :
0 0

Ni ku wa Gatandatu mu gitondo, gahunda nararanye ni ukuzamuka umusozi wa Kabuye, kubera ko naryamye ntinze, nafashe telefoni nshyiramo ’imbyutso’ ya saa 5:40 za mu gitondo; gusa nagiye kumva numva umuhungu wanjye mukuru Inkindi ankanguye saa 5:12, ubwo nyine sinongeye gusinzira, nahise nkomerezaho nitegura kwegera abandi twurirana Umusozi wa Kabuye.

Ndakarabye, nambaye ipantalo y’umukara, umupira w’umuhondo, ndenzaho agakote ko kwifubika k’umweru – kuko turi mu bihe by’imvura, mfunze neza inkweto zimfasha kuzamuka imisozi, nambara mu nda uruhago njya nshyiramo amazi na telefoni, ubundi mbwira uwo twashakanye – Akamalayika nti “Wirirwe neza”.

Ndasohoka, ariko ngeze ku irembo nibuka ko hari igitabo maze iminsi nongeye kubura gusoma cyitwa “Ingoma ya Kigeli Rwabugiri na Nyirayuhi Kanjogera”.

Ni ko gusubira mu rugo ndagifata kuko nzi ko kiri bumfashe urugendo rwo kugera mu Gakenke, kandi ni byo koko, twageze mu Gakenke maze gusoma: Ibyiruka rya Rwabugiri n’iyimikwa rye, iby’Ingangurarugo, Igitero cya mbere, icya kabiri n’icya gatatu cyo ku Idjwi, Igitero cya Mirama muri Mpororo, Igitero cy’amazi, Igitero cy’i Bumpaka, Igitero cyo mu Lito, Igitero cyo mu Butembo, Igitero cya mbere n’icya kabiri cy’i Gikore, Igitero cy’Umunyu i Rucuru, Igitero cya mbere n’icya kabiri cy’i Bunyabungo, Igitero cyo mu Kanywiriri, Igitero cya mbere n’icya kabiri cyo mu Minove, Igitero cyo mu Bushubi kwa Nsoro, Igitero cyo muri Ankole cyo mu 1894 n’ibindi byinshi! Mbega urugendo!

Tugeze i Gakenke aho duhagurukira, utuyoboye muri uru gendo unasanzwe utuyobora iyo turimo kurira imisozi adukoresha imyitozo yo kunanura umubiri no kuduha amabwiriza y’urugendo. Itegeko risumba ayandi yose ni iri “Ntihagire usiga undi kandi abashinzwe kwita ku bananiwe, muzirikane ko ahantu tugiye hajya hagorana, mubikorane ubwitange nk’ibisanzwe!”

Urugendo ruratangiye rero! Birumvikana buri wese agenda uko imbaraga ze zingana, hari abasore n’inkumi b’imigenda bagira gutya bakavuduka ukayoberwa aho banyuze, hari abari hagati n’abahisemo kwigendera gahoro, gusa icyita rusange ni kimwe “Iyo tugeze aho tugomba kuruhukira, buri wese ahava na wa wundi waje gahoro gahoro ahageze! Kirazira gusigana!”

Kugira ngo ugere ku gasongero k’Umusozi wa Kabuye uruhuka nibura inshuro eshatu, ushobora kwicara munsi y’ibiti dore ko haba hari amafu, ushobora no kuruhukira ku ntebe z’imbaho zahashyizwe n’abantu bahatunganyije mu rwego rwo gufasha abahasura.

Nubwo uba urushye ariko ntabwo upfa kubyumva kuko intego abari ari imwe “Ndagera ku gasongero ryari ngo ndebe Inzu y’Umwami, ngo ndebe Iriba rya Nyirarucyaba n’irya Gihanga, mbe nesheje umuhigo wanzanye uyu munsi?”

Turuhutse rimwe, turuhutse kabiri ndetse tugera aha nyuma tugiye kurira umusozi bya nyabyo. Kubera uburyo hahanamye cyane, twongeye guhabwa amabwiriza “Itegeko rya mbere: Ntugakandagire ku ibuye ubona ko rishobora kuriduka, kuko riridutse ryabirinduka rigahitana ab’inyuma yawe; itegeko rya kabiri: reba aho ikirenge cyawe gikandagira kandi ugende wigengesereye; itegeko rya gatatu: komezea urebe mugenzi wawe ukuri hafi.”

Ntibyatinze tuba tugeze hejuru ahitwa ku Nzu y’Umwami, ariko nyine nta nkuru, ureba hejuru aho ugana ukibaza uti ‘Ariko nk’ubu nazanywe n’iki? Wahindukira ukareba hasi mu gikombe aho uvuye ugatangira kuvuga Zaburi ya 23 ariko wagera ku murongo wa 4 ugira uti “Naho nanyura mu gikombe cy’igicucu cy’urupfu, sinzatinya ikibi cyose kuko ndi kumwe nawe, inshyimbo yawe n’inkoni yawe ni byo bimpumuriza”, ugashimangira cyane koko!

Ntibyatinze tuba turahageze. Uhageze wese ahita yibagirwa umunaniro azamukanye umusozi agahita abwira umwegereye ati “Mfata ifoto y’urwibutso hano ku Nzu y’Umwami – kuko nta foto, nta cyabaye”. Iyo wubuye amaso ukareba kuri iyo Nzu y’Umwami – urutare ubonaho amazina menshi cyane, kuko buri wese wahageze asiga ahanditse izina rye kandi koko ni mu gihe uhageze aba aciye agahigo!

Abo twari twegeranye babiteyemo urwenya bavuga ko iyo wuriye Umusozi wa Kabuye ukawurangiza biba bimeze nko kubona Impamyabushobozi y’Icyiciro cya Mbere cya Kaminuza mu kuzamuka Imisozi - Bachelor’s Degree in Hiking – ubwo wenda iyo urangije kuzamuka Kalisimbi na Muhabura uba abonye Masters, ibya PhD wenda ukabigeraho wuriye wa Musozi wa Kilimanjaro w’aha hirya mu baturanyi – ubwo ibya Everest byo ntubimbaze.

Iyo uvuye ahari Inzu y’Umwami werekeza ahantu hateguwe neza ushobora kubona icyo ufata kugira ngo ugarure akabaraga, ni urugendo rushobora gufata hagati y’iminota 45 na 60; iyo uhageze usanganirwa n’icyapa kikwereka ko uri ku butumburuke bwa 2700 m (8800 feet), aha ni ho hari Iriba rya Nyirarucyaba. Ni urugendo rwa kilometero 9.4 rwakozwe mu gihe cy’iminota 184, gusa ba basore n’inkumi b’imigenda nigeze kubabwira bashobora no kuhakoresha iminota 120.

Nuko dufata akanya turaruhuka, ariko mu gihe twitegura kumanuka imvura ngo ba! Dusigarana ihurizo rikomeye cyane ryo kuvuga ngo “Aha hantu hahanamye gutya umuntu ahamanuka ate imvura yaguye?” Igisubizo ariko na none ni kimwe: “Mu kuzamuka no kumanuka imisozi ugomba kuba witeguye kubona igisubizo cyose hafi yawe.”

Ntibyatinze turamanuka ariko nyine buri wese agenda akwepana n’ubunyerere, areba neza aho ashinga ikirenge ngo ataza kubirinduka akagwa akisanga iyo mu kabande! Uwo twari kumwe yarambwiye ati “Sinari nziko mu kumanuka umusozi umuntu abira icyuya gutya – birasaba gukoresha ubwonko cyane!”

Ntibyatinze tuba tugeze aho twahagurukiye, turongera tugaruka i Kigali mu Murwa.

Kurira umusozi wa Kabuye ntibikomeye, bisaba ikintu kimwe gusa “Kwiyemeza” noneho rero iyo ugize amahirwe ukajyana n’abantu bo muri A–TEAM – (abasore n’inkumi twurirana imisozi) baganira neza bya gipfura, batebya, bakanagira morale y’inyenyeri zirindwi ntumenya igihe wagereyeyo n’igihe wagarukiye i Kigali.

Ngushimiye ko wazamukanye nanjye uyu Musozi wa Kabuye muri iyi nyandiko ariko sinasoza ntagize icyo nywukubwiraho.

Byinshi ku Musozi wa Kabuye?

• Umusozi wa Kabuye uherereye mu Karere ka Gakenke, mu Ntara y’Amajyaruguru, uri ku butumburuke bwa 2,700m ukaba umusozi wa Gatatu muremure mu Rwanda, nyuma y’Umusozi wa Bigugu (2880m) wo muri Nyungwe n’Umusozi wa Muhungwe (2950m) wo muri Rubavu – udashyizemo ibirunga.

• Uyu musozi ufite amateka akomeye cyane kuko watuweho na Nyirarucyaba, Umwana w’Umwami Gihanga I Ngomijana wahanze u Rwanda.

• Amateka avuga ko uyu Musozi wa Kabuye watangiye guturwaho cyane ubwo hagerwaga n’Umwami Gihanga wari uje kuhareba umukobwa we Nyirarucyaba wari uhororeye inka nyinshi cyane.

• Amateka kandi avuga ko uyu Nyirarucyaba ari we wongeye kugarura inka mu Rwanda ubwo yongeraga kugabira Se Gihanga, agatunga, agatunganirwa nyuma yo kuva aho yari atuye i Nyakinama muri Nkotsi na Bikara – ubu ni mu Karere ka Musanze.

• Iyo uri hejuru ku Musozi wa Kabuye ubasha kubona Iriba rya Nyirarucyaba, bivugwa ko yogeragamo, ari na ho inka ze zashokaga.

• Umusozi wa Kabuye kandi ufite ubuvumo bunini cyane benshi bakunze kwita Inzu y’Umwami kuko ari ho Gihanga yararaga bwacya akajya hejuru ku musozi ahari iriba rye.

• Kubera ukuntu uyu musozi uri ahirengeye, wifashishijwe mu rugamba rwo kubohora Igihugu, kuko Ingabo za RPA zari zihari zabashaga kugenzura ibirindiro byose by’abo bari bahanganye ahagana mu 1992.

• Mu 1994 nabwo Umusozi wa Kabuye wafashije Inkotanyi guhashya Interahamwe na Ex FAR bari mu bice bitandukanye by’Amajyaruguru kuko uhari wese aba yitegeye ahantu hose. Uyu musozi wanafashije cyane Ingabo z’u Rwanda mu 1997, 1998 na 1999 mu rugamba rwo kurwanya no gutsinsura Abacengezi.

Umuzamutsi Ruzindana Rugasaguhunga

Bigusaba gushyiramo imbaraga kugira ngo ugere hejuru iyo. Ni urugendo ruryoshye cyane
Hari ahahanamye! Bigusaba kwigengesera
Iyo uri ku Musozi wa Kabuye uba witegeye hose
Unyuzamo ukaruhuka kugira ngo akabaraga kiyongere
Usiga uhanditse n'izina ryawe, nuhagera uzahasanga iryanjye
Iyo ugeze hejuru wibuka no gufata ifoto y'urwibutso. Umunaniro wo ntuba ukiwumva
Ugeze ku Musozi wa Kabuye uhava wifotoroje muri iyi nzu y'Umwami Gihanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .