00:00:00 IGIHE NETWORK KN KINYARWANDA EN ENGLISH FR FRANCAIS

Rubyiruko rw’u Rwanda, dore ikindi kiyobyabwenge mukwiriye kwirinda

Yanditswe na Kwezi Jean
Kuya 20 Kanama 2021 saa 03:02
Yasuwe :
0 0

Kuva isi yaremwa biragaragara ko ikiremwamuntu cyagiye cyishakira ibisubizo ku bibazo bimwe na bimwe byazaga bigamije kototera imibereho rusange y’inyokomuntu, ibi bikaba byaratumye hagenda habaho ubuvumbuzi butandukanye kugeza ubwo umuntu yavumbuye uburyo bushya bw’itumanaho ryihuse.

Nibuka neza mu myaka y’ubuto bwanjye ko iyo washakaga koherereza ubutumwa umuntu uri kure byasabaga kujya kumureba uteze imodoka cyangwa indege bitewe n’aho uwo muntu yabaga aherereye. Bitaba ibyo byasabaga kumwandikira ibaruwa izafata igihe kugira ngo igere kuri kanaka utuye irunaka.

Nyuma y’akaga u Rwanda rwanyuzemo ka Jenoside yakorewe Abatutsi mu 1994, Leta y’Ubumwe bw’Abanyarwanda yakomeje kubaka igihugu harimo no kugendana n’isi mu iterambere rishingiye ku ikoranabuhanga, tekinoloji n’itumanaho rigezweho rikoresha internet.

Ng’uko uko abantu batangiye gutunga telefoni zigendanwa guhera ahagana mu 1998 kugeza ubu. Iri terambere ryahinduye byinshi mu mibereho y’abantu. Narasesenguye nsanga u Rwanda ruri mu bihugu bike byo mu karere ruherereyemo rwakoze ibishoboka mu bijyanye n’impinduramatwara ishingiye ku ikoranabuhanga na tekinoloji harimo n’itumanaho.

Natembereye muri bimwe mu bihugu bya Afurika ariko aho nageze nasangaga turi imbere yabo muri uru rwego rw’ikoranabuhanga; iki kikaba icyo kwishimirwa cyane kandi tugashimira Leta y’Ubumwe bw’Abanyarwanda. Biranshimisha iyo nkuye amafaranga kuri konti yanjye iri Kigali akangeraho kuri telefoni nibereye mu cyaro i Busasamana cyangwa mu Byimana. Biranshimisha kuvugana n’inshuti yanjye ituye mu Jenda kuri Seshwara ndi mu gasanteri ka Karangazi.

Nubwo byose ari byiza ariko natekereje ku rubyiruko, nsanga aya mahirwe bamwe batayakoresha uko bikwiriye. Hamwe n’uko urubyiruko rumwe rubaswe n’ibiyobyabgwenge by’amoko atandukanye kuva ku rumogi, mugo, Cocaine, heroine n’ibindi byinshi biyayura ubwonko harimo no kunywa inzoga nyinshi hari no kuba internet na yo yahinduka ikiyobyabwenge mu gihe yakoreshwa nabi mu bijyanye n’imbuga nkoranyambaga zose uko zigenda zivumburwa mu isi ya none.

Umunsi umwe ubwo nashakishaga amakuru kuri status z’abantu batandukanye, naguye ku ngero zimwe zanyeretse ko aya mahirwe ya murandasi n’imbuga nkoranyambaga yaba akoreshwa nabi.

Nasomye ubutumwa bw’umwe mu nshuti yanjye y’urubyiruko ubusanzwe nari nzi ko afite Youtube channel yigishirizaho ubukungu, nza gutangazwa n’uko nahasanze ubutumwa bugira buti “murabizi ko ya fi yamize Yona yitwa Fiyona?’’

Narababaye kuko bundles yakoresheje atanga ubu butumwa yakazikoresheje yamamaza Youtube ye cyane ko nanjye bundles nakoresheje numvaga ngiye kureba isomo rishya atubwira nsanga ntaryo nyuma na channel ye yarahagaze.

Undi na we ni umusore w’inshuti yanjye nanyarukiye kuri status ye ngira ngo ndebe niba arimo kwamamaza akazi akora ko gukora filime, nsanga hariho ifoto ye yiteretse inzoga yazamuye udutoki tubiri by’abasitari. Nibajije niba arimo kwamamaza izo nzoga, nibaza niba bamuhaye amafaranga yo kwamamaza, nibaza impamvu ntahasanze ifoto ye na camera na nimero za telefoni abwira abantu ibyo akora n’aho bamusanga.

Urubyiruko rumwe rurimo kumara amafaranga yakabaye igishoro bashyira ku mbuga zabo ibintu bitabafitiye umumaro aha nk’aba mvuga ibibyara inyungu. Icyo bakora ni ukwihombya no guhombya bamwe babakurikira kuko kugira ngo ujye kuri Instagram, Whatsap, Facebook, Twitter, Youtube n’izindi, ugomba kuba waguze inite cyangwa bundles za internet.

Nyamara kandi urubyiruko rurataka ubushomeri kandi na duke babonye badukoresha nabi. Nibaza impamvu umuntu ataka ubushomeri yarize wenda amasomo runaka, yarangiza ntafate utwo dufaranga duke ngo atugure internet akarishya ubwenge akora ubushakashatsi ku cyo yize kuko hamwe n’imbuga nkoranyambaga urabihasanga.

Ibi byatuma nibura ashobora kwiga uko yakwihangira igitekerezo cyavamo akazi. Ibyo umuntu yaba yarize byose ubu hamwe na murandasi urakurikira ukihugura uko barema akazi wiyicariye iwanyu, bityo amafaranga make abonetse akanyura mu nzira zigufasha kwiteza imbere.

Bintera agahinda iyo mbona umusore cyangwa inkumi wifotora arimo kurya yarangiza agashyira ku mbuga nkoranyambaga kenshi n’ibyo arya biba byamugoye kubibona kuko adafite aho bizakomeza kuva. Uyu atandukanye n’uwifotora ari mu kazi yaremye asaba abantu kumugana bakamugurira serivisi cyangwa igicuruzwa acuruza.

Ubaze neza amafaranga agenda muri ubwo buryo bw’imikoreshereze mibi ya internet ku rubyiruko, wasanga buri mwaka cyakabaye igishoro kuri bamwe barangije amashuri birirwa bataka ubushomeri.

Kugura bundles nibura bishobora gutwara make akaba 500Frw buri munsi ubwo mu kwezi ni hafi 15.000Frw kandi aya yavamo ikibwana cy’ingurube bityo uwize ubworozi agatangirira aho umushinga we mu cyaro iwabo.

Aya mafaranga yavamo ibiro cumi nibura by’ibigori bityo ufite umurima yarize ubuhinzi agahera aho uwo mushinga mu cyaro cy’iwabo. Aya mafaranga yagura turunovisi imwe uwize amashyanyarazi yaheraho. Aya mafaranga uwize imibare cyangwa akaba akora filime nkanjye yayaheraho akora ubushakashatsi akiga akamenya hamwe na murandasi ye.

Natanze ingero ntoya ariko ikigamijwe ni uko urubyiruko rwacu mu Rwanda ruhumuka rukabyaza amahirwe internet n’imbuga nkoranyambaga biga cyangwa bamamaza ibikorwa bakora. N’abantu bakuru bamwe usanga aho kubikoresha bigisha cyangwa bagaragaza inararibonye ryabo ku bato ahubwo bashyiraho ubuzima bwabo bwite bw’imuhira nabyo bidatanga amasomo ahubwo byo kwifotoza gusa.

Abakoresha internet n’imbuga nkoranyambaga nabo barihombya ariko bagahombya n’ababakurikira kuko hari igihe umara bundles zawe ugiye gukurikira umuntu ngo umwigireho ugasanga nta kizima afite ni ibihombo gusa. Navugaga ko internet ikoreshejwe nabi n’urubyiruko rw’u Rwanda izaba ikiyobyabwenge kuko nsigaye mbona abirirwa ku mbuga nkoranyambaga bifotoza gusa ari byo bita “gutwika’’ mu mvugo y’ab’ubu.

Urubyiruko rwacu nirudahumuka ruzisanga rwarabaye abanebwe n’abacakara b’ubukene batagitekereza ahubwo batekererezwa n’abanyabwenge bw’isi bazi gukoresha neza bike bafite no gukoresha igihe cyabo neza.

Ni gute umusore cyangwa inkumi ahera mu gitondo yicaye yarize “atwika” gusa yifotoza ategereje ngo kuva mu bushomeri byose bigerekwa kuri Leta kandi yaratanze amahirwe yo guteza imbere icyo cyiciro cy’ikoranabuhanga?

Imbuga nkoranyambaga zikoreshejwe nabi zaba intandaro y’ubunebwe n’ubukene bityo bikazitira iterambere ry’igihugu.

Rubyiruko bana b’u Rwanda aho muri hose ko abavumbuye internet n’imbuga nkoranyambaga dukoresha bavukiye amezi icyenda nkamwe mwazikoresheje namwe muvumbura? Umunsi mwiza mpuzamahanga wahariwe urubyiruko kuri mwese bana b’u Rwanda.

Urubyiruko rwasabwe kwitondera cyane imbuga nkoranyambaga kugira ngo zirubyarire umusaruro

Igitekerezo cya Kwezi Jean


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .