Kwamamaza

‘Reka Kagame ayobore manda ya gatatu’

Yanditswe kuya 7-11-2016 saa 10:30' na IGIHE


‘Reka Kagame ayobore manda ya gatatu nka Perezida’ ni inyandiko y’umuyobozi mukuru w’ibinyamakuru bitandukanye muri Maroc, Ahmed Charai, yanditse ashingiye ku gushaka Abanyarwanda bagaragaje binyuze muri Referendumu n’ubwo hari abanyamahanga batishimiye ko yakomeza kuyobora u Rwanda.

Ahmed asanzwe ari Umuyobozi w’ikinyamakuru L’Observateur; Umuyobozi Mukuru wa MED Radio; akanayobora ikinyamakuru gisohoka buri munsi, Al-Ahdath al-Maghrebia kandi akaba mu buyobozi bw’ibigo bitandukanye muri Leta Zunze Ubumwe za Amerika (USA).

Mu nyandiko ye iri mu kinyamakuru Huffington Post agaragaza uko Perezida Kagame yahinduye u Rwanda rwari rugeze ku izina rivugwa umuntu agahita atera agatima ku mateka ya Jenoside yakorewe Abatutsi mu 1994 igahitana abasaga miliyoni imwe, ariko ubu rumaze guhinduka ikimenyetso cy’icyizere muri Afurika nzima.

Ubwo Perezida Kagame yatangiraga kuyobora u Rwanda mu nzibacyuho, mu 2000, yasezeranyije komora ibikomere by’u Rwanda, guteza imbere imiyoborere myiza, kuzamura imibereho y’abaturage no kurangamira icyerekezo kizageza u Rwanda ku kuba igihugu gifite ubukungu buciriritse bitarenze 2020.

Yatangije umushinga w’Itegeko Nshinga riha agaciro urunyurane rw’ibitekerezo na demokarasi, azamura urwego rwa serivisi, amabanki, urwego rw’imari n’ubucuruzi, ateza imbere serivisi z’ubuzima adasize ubukerarugendo.

Bitewe n’uko azi neza ko kongerera ubushobozi umugore ari ingenzi mu iterambere ry’igihugu, Perezida Kagameyatumye hashyirwaho umubare wihariye ugenewe abagore mu buyobozi (30%), ariko uyu munsi binyuze mu matora asesuye, abagore barawurenze ubu bageze kuri 64% mu Nteko Ishinga Amategeko, umubare utari mu kindi igihugu icyo aricyo cyose ku Isi.

Nyuma ya Jenoside kandi, Ahmed agaragaza ko Perezida Kagame yagejeje u Rwanda ku butabera n’ubwiyunge, ibintu bijya gusa n’ibyashobotse muri Afurika y’Epfo nyuma y’inkundura y’ivanguramoko rya Apartheid.

Nyuma ya Jenoside yagaruye inkiko Gacaca zari gakondo y’Abanyarwanda ngo ziburanishe abasaga miliyoni bakekwagaho ibyaha, zihabwa inshingano yo gutanga ubutabera bwunga kandi abaturage bakavugisha ukuri ku byo babonye.

Ati “Kagame yashyizeho Komisiyo y’Igihugu y’Ubumwe n’Ubwiyunge ngo yigishe amahoro, kumvisha abantu ko bose bareshya, gutanga ubujyanama ku ihungabana, ariko hejuru ya byose hakaba guteza imbere inzego zikorera mu mucyo na demokarasi, zifite ubushobozi bwose bwo gutsinda ibintu byose byagejeje abaturage mu bibazo.’’

Ahmed Charai yanagaragaje ko mu mboni za Perezida Kagame, ubwiyunge bugomba gushingira ku baturage ubwabo, nk’uko yanabibwiye imbaga mu Ishuri rya Wharton muri Kaminuza ya Pennsylvania muri USA.

Ati “Gushimangira umutekano wanyu ntabwo bizagerwaho ari undi muntu ubibakoreye. Mugomba kubigiramo uruhare kandi mukamenya ko muha abandi umutekano mukabona kwizera ko nabo bazawubaha.’’

Aho kandi ngo Perezida Kagame yagaragaje ko Abanyarwanda bubatse umusingi ukomeye, hasigaye kuwubakiraho bagakomeza urugendo.

Ati “Umusingi urahari: Abaturage bazi akamaro ko kubigiramo uruhare, ibyo basabwa n’ibyo bazabonamo. Bumva neza ko ibintu byose bitazahora ari byiza kandi siko abantu bose bazanyurwa, ariko hari iby’ingenzi bizajya bitwemerera gukomeza kujya imbere.’’

Ahmed Charai yavuze ko u Rwanda rwakomeje kuba kimwe mu bihugu bifite ubukungu buzamuka cyane ku Isi, kugeza ubwo rwageze ku mpuzandengo isaga 8% mu myaka 16 Perezida Kagame amaze aruyobora.

Mu gusaranganya ubukungu, mu Rwanda ngo bitandukanye n’aho usanga izamuka ry’umusaruro mbumbe w’igihugu ryarahumye amaso abaturage, ntibabashe kubona uko itsinda rimwe ryigwizaho ubukungu, kuko Abanyarwanda bungukira muri buri mutungo igihugu gifite haba mu buvuzi n’uburezi, n’ubukene bugakomeza kugabanuka.

Ahmed Charai ni Umuyobozi w’ikinyamakuru L’Observateur

Abaturage barashaka Kagame, abanyamahanga ntibanyurwe

Ahmed avuga ko mu gihe manda ya kabiri ya Perezida isatira umusozo, abaturage “basabye Kagame bakunda cyane” kwiyamamariza manda ya gatatu ndetse Itegeko Nshinga riravugururwa rimuha uburenganzira busesuye, bitorerwa muri Referendumu ku majwi yo hejuru.

Uyu mwanditsi akomeza agira ati “Kagame yatanze ikimenyetso ko aziyamamaza, agatsinda amatora kandi akemera inshingano ze.’’

Gusa agaragaza ko hari ibihugu bitishimiye ko yiyamamariza manda ya gatatu, nk’aho Ishami rishinzwe Ububanyi n’Amahanga muri Leta Zunze Ubumwe za Amerika ryatangaje ko bishobora kugabanya imbaraga z’inzego zigendera kuri demokarasi.

Ambasaderi wa Amerika mu Muryango w’Abibumbye, Samantha Power, we yavuze ko “yiteze ko Perezida Kagameazava ku butegetsi manda ye irangiye mu 2017’’, ndetse Umuyobozi ushinzwe ubutwererane n’Umuryango w’Ubumwe bw’u Burayi, Federica Mogherini, we yavuze ko “bigabanya agaciro ko kuvugurura Itegeko Nshinga, bikanabangamira ihame rigamije ihinduka rya guverinoma muri demokarasi.’’

Abatemeranya n’Abanyarwanda bariyerurutsa

Uyu mwanditsi agaruka ku badashyigikiye manda ya gatatu ya Perezida Kagame, biyerurutsa ashingiye ko nk’u Budage buri kuyoborwa na ‘Chancellor’ Angela Merkel uri muri manda ya gatatu, ndetse no muri Amerika, Abasenateri n’abadepite bakaba batagira manda ndetse na manda ntarengwa za Perezida wa USA zikaba ari iza vuba.

Ati “Muri manda enye zikurikiranya, Franklin Delano Roosevelt yayoboye neza igihugu mu bihe bikomeye n’intambara ya kabiri y’Isi. Hari ibitekerezo mu Rwanda ko Kagame yaba ari “Roosevelt” w’icyo gihugu kandi imiyoborere ye ikenewe by’umwihariko mu bihe bikomeye. Ariko abanyamahanga bo bifuza kubuza abaturage umukandida bihitiyemo.’’

Hari abemeranya n’ugushaka kw’Abanyarwanda

Ahmed avuga ko Perezida Kagame hari ibihugu n’abantu bakomeye bashyigikiye ko yiyamamaza, nk’aho mu namaiherutse kubera i Kigali ya ‘World Economic, Umushoramari w’Umunyamerika Howard Buffett yeruye ko ashyigikiye manda ya gatatu.

Ati “Iyo mba ntatekereza ko Perezida Kagame azaba akiyobora no mu yindi myaka irindwi, ntitwakabaye dutekereza gukora ibintu turi kugerageza ubu.’’

Tony Blair wigeze kuba Minisitiri w’Intebe w’u Bwongereza, nawe wayoboye igihugu muri manda eshatu, nawe yunze mu ry’abemeranya na manda ya gatatu ya Perezida Kagame.

Mu bandi bayishyigikiye harimo abantu batandukanye bo mu bihugu bikomeye byo mu Burengerazuba bw’isi bashimangira ko yateje imbere ubwisanzure n’imiyoborere myiza mu gihugu cye. Banamufata kandi nk’umuntu wabaye inshuti ya ba rwiyemezamirimo b’Abanyamerika n’Abongereza kimwe n’ibigo byabo, ubwo byageragezaga kwinjira ku isoko ryo muri Afurika.

Ahmed ati “U Rwanda ni umwe mu nshuti za hafi za Israel ku mugabane wa Afurika. Kandi ku mugoroba wo kuwa Kabiri w’icyumweru gishize, Umwami Mohammed VI wa Maroc yaje mu Murwa Mukuru w’u Rwanda, Kigali, mu nama yagiranye na Perezida Kagame n’abandi bayobozi bakomeye.’’

Abo bayobozi bombi kandi basinye amasezerano asaga 20 hagati y’ibihugu byombi hagamijwe gushimangira ubucuruzi, ishoramari n’ubufatanye mu mpinduka muri za guverinoma n’iterambere ry’abaturage n’ubukungu.

Mu mboni z’ubwami bwa Maroc, kuzamura urwego rw’umubano n’u Rwanda biri mu cyerekezo cyagutse cy’igihugu cye gishaka kuba ku izingiro ry’amahoro n’iterambere ku mugabane wose, n’ikiraro gihuza Afurika n’abandi bafanyabikorwa ba Maroc bo mu Burayi na Amerika.

Icyo gihe Umwami Mohammed VI yavuye mu Rwanda yiyemeje kuvuga imyato imiyoborere ya Perezida Kagame.

Ahmed Charai asoza agira ati “Ni ngombwa kuri Kagame ngo akomeze kuzamura imiyoborere mu Rwanda, anamenya neza niba inzego yagize uruhare rukomeye mu gushyiraho zizabasha gukora neza ubwo azaba atagihari.’’

“Gusa nta mpamvu ihari yatuma aha agaciro igitutu cy’abanyamahanga ngo ave ku butegetsi, nyuma y’ibyiza byagezweho ari umuyobozi, arangaje imbere kuzahura igihugu kandi akaba ashyigikiwe bidasanzwe n’abaturage kubera imiyoborere ye. Igihugu cye kiramukeneye, Umugabane wa Afurika uramukeneye kandi n’Isi nayo iramukeneye.’’


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved