“Pan-Africanism” ni ubushake bwa politiki ariko izubakwa no gusangira umuco n’ubukungu bw’Abanyafurika

Yanditswe na Paul Mbaraga
Kuya 8 Kanama 2017 saa 09:29
Yasuwe :
0 0

Tuzamuke tuve mu guterana amagambo y’indimi twubake Pan-Africanism; ku gitekerezo mperutse gusohora nenga uwavuze ko igifaransa ari “akantu gato”, uwo numvise nabi nka Habineza Joe uvuga ko nakuye amagambo ye mu mujyo wayo, n’uwanyumvise nabi tubabarirane. Icyo nabonye ni uko ukuri tuguhuriyeho turi benshi.

Nasoza impaka ku Gifaransa mvuga nti “Ikinyarwanda ni umusingi w’umuco n’ubwenge bwacu Abanyarwanda. Igifaransa n’Icyongereza ni imiyoboro itugeza ku bumenyi bw’amahanga, Igiswahili ni umukondo wa Pan-Africanism turi kubaka. Izo ndimi zose ni uburenganzira bwacu ariko twese twuzuzanye mu mahirwe angana ejo tutazatungurwa n’amakimbirane ashingiye ku ndimi kandi twese turi Umunyarwanda umwe.

Yarakoze Perezida wacu Kagame wadufunguriye Pan-Africanism. Jye nyibonamo ubwigenge bushya bwa Afurika yose. Dushakire hamwe uburyo iyo Pan-Africanism twayishyiramo ingamba zakomeza guhesha u Rwanda intebe yo ku isonga mu guhindura Afurika n’Isi yose.

Hari uwatubwiye ko n’abahanga b’abafaransa bandika ubumenyi bwabo mu Cyongereza kugira ngo babucuruze, nibyo, ariko umwimerere w’ibitekerezo bihangano byabo uri mu gifaransa.

Undi ati ‘ntawajyana igifaransa mu Bushinwa, i Dubai, muri Japan, muri Koreya y’Epfo, mu Burusiya, muri Turkiya, muri Nigeria ngo azahahe. Nibyo koko, jye cyakora nziko nta munyarwanda wabyirutse mu myaka yanjye (ubu mfite 68) wize mu Gifaransa, akarangiza amashuri yisumbuye (secondaire) utazi Icyongereza cyatuma ahaha muri ibyo bihugu byose.

Ubu bwo abafite amahirwe yo gukorerayo business, barushijeho gutyaza Icyongereza cyabo. Hari n’abambwiye ngo ndacyavugira mu bisigisigi by’ubukoloni, bari mu banyumvise nabi cyangwa birengagiza ibindi natanzeho ingero ngaya abakiriye ubwigenge bw’igihugu cyacu batazi icyo bazabukoresha. Mwese ariko ndabashimira ko mwumvise ikibazo nagaragaje mugasanga namwe mwakigira icyanyu.

Naho ubukoloni ari nabwo nshingiraho nsaba ngo dutange umusanzu mu kubaka Pan-Africanism, na Perezida mushya w’u Bufaransa Emmanuel Macron aherutse kuvuga ari ku butaka bwa Afurika ngira ngo muri Senegal niba atari muri Algeria sinibuka neza ariko icyo yavuze ndacyacyibuka neza ahamya ko ubukoloni bwahabwa inyito y’icyaha cyibasiye inyokomuntu (crime contre l’humanité cyangwa crime against humanity).

Ntawavuga ariko ko umurage wose w’ubukoloni wabaye mubi. Ururimi cyangwa indimi n’izindi nyigisho twahawe mu mashuli ya gikoloni muri izo ndimi (Icyongereza, Igifaransa, igi Portugal n’izindi) mbibarira mu byiza bimwe dusanga muri uwo murage w’abakoloni kuko utazi izo ndimi ntiwakwicara mu Muryango Mpuzamahanga (ONU) ngo ugire ijambo.

Ndashima abumvise ko Igifaransa kitakiri umwihariko w’igihugu gikomokamo, ko ahubwo cyinjijwe mu mutungo bwite w’abacyigishijwe bakakigira icyabo nabo hatitawe kubonamo ibisigisigi by’ubukoloni ahubwo kikabarirwa mu ngazo y’isi.

Icyaha cy’inyokomuntu abakoloni badukoreye harimo byinshi dutekereje ubucakara abanyekongo babayemo igihugu cyabo ari akarima k’umwami Leopold w’Umubiligi ku giti cye; jenoside zitavugwa Abafaransa bakoze muri Cameroun no muri Algeria, Abadage muri Namibia, ariko cyane cyane gahunda bari bafite bose yo kutatwigisha ikoranabuhanga ryabo cyangwa ngo batwubakire uburyo bwo gushyikirana mu bwikorezi n’itumanaho. Iyo basiga badukoreye ibyo ntituba tujya guhaha Dubai cyangwa Japan cyangwa Koreya n’ahandi. Byose biba bikorerwa muri Afurika kuko ibikoresho by’ibanze bihari.

Ibyubatse bombe atomique yarangije intambara y’isi ya kabiri, ibyubatse imigi minini y’Abafaransa, y’Ababiligi n’iy’Abongereza byavaga muri Afurika. Ibikoreshwa mu ikoranabuhanga ubu byinshi byubatswe mu mabuye y’agaciro ava muri Afurika. Abakoloni bari bazi ko Abanyafurika bamenyanye bagahuriza hamwe ubukungu bwabo bugatunganyirizwa ku mugabane wabo bazawubaka ntibashobora gukomeza kubasahura. Niko kutaduha uburyo bwo kwiyubakira imihanda iduhuza, kubaka amashanyarazi no kuyakwirakwiza (Amasumo ya Congo, ya Mozambique n’aya Zimbabwe yonyine yabyazwa amashanyarazi yamurikira Afurika yose akanakoresha inganda zaho).

Ubwigenge bwa kabiri bwa Afurika buzaba kubaka Pan-Africanism u Rwanda ruri ku isonga. Perezida Kagame yubatse uburyo bw’icyitegererezo mu Rwanda. Yerekanye ko u Rwanda rushobora kuba laboratwari n’urubuga ruhuza ibitekerezo byubaka Pan-Africanism.

Pan-Africanism izafata intambwe idasubira inyuma mu mezi ari imbere, mu ntangiro kandi ya manda ya gatatu ya Perezida Kagame ayobora u Rwanda. Kuba u Rwanda ruzaba ruyobora Umuryango w’Ubumwe bw’Afurika; kuba mu Rwanda ariho hatangiwe mbere na mbere passport nyafurika. Ndareba ifoto Perezida Kagame ayihereza Perezida Idriss Deby wa Tchad nawe ayisoma n’umunwa mu nama y’Umuryango w’Ubumwe bwa Afurika yabereye bwa mbere hano i Kigal, ikanaba umugabo ko inama zikomeye zishora gutegurwa neza mu Rwanda.

Perezida Kagame na Perezida Idriss Deby wa Tchad batangiza ikoreshwa rya passport nyafurika

Kuba u Rwanda aricyo gihugu cya mbere cyahaye karibu Abanyafurika bose badahangayikishijwe na Visa; kuba u Rwanda ari urwa mbere ku isi muri politiki yimakaza uruhare rw’abagore mu buyobozi no mu iterambere ry’igihugu; kuba u Rwanda ari igihugu ntangarugero mu kugarura no kubungabunga umutekano aho wabuze muri gahunda za Loni; kuba u Rwanda ari intangarugero mu karere no muri Afurika yose muri demokarasi iturutse ku bushake bw’abaturage kandi amatora no gushyiraho ubuyobozi buvuguruwe bigakorwa mu mahoro; Kwishakamo ibisubizo bishingiye ku mateka no ku muco; Kuba hari ubudasa bwinshi mu miyoborere y’u Rwanda butuma rwaba Laboratwari ya Afurika n’isi yose. Twiteguye gute gusubiza amahanga aduhanze amaso ngo Nkwame Nkruma azazukira iwacu muri 2018? Za ndimi zose twavuze zizahabwa kandi icyubahiro kizikwiye.

Mu mutwe w’iki gitekerezo navuze ko Pan-Africanism izubakwa no gusangira umuco n’ubukungu bw’Abanyafurika. Abakoloni bose ntibatekerezaga kimwe ; Abadage bari bafite gahunda yo kubaka umuhanda wa gare ya moshi uhuza Cairo na Captown muri Afurika y’Epfo; undi wagombaga kunyura kuri Equator ugahuza inyanja y’u Buhindi n’iya Atalantika. Iyo gahunda iyo ishobora gusozwa niyo ibihugu byari gufatiraho byubaka imihanda itambitse ihuza Abanyafurika. Iyo mihanda yose ubu ni Pan-Africanism igomba kuyubaka.

Umuryango w’ubumwe bw’Afurika washishikarije ibihugu kubaka imiryango y’ubukungu y’uturere twa Afurika ku buryo ariyo izashingirwaho hubakwa ubumwe bw’Afurika. Iyo miryango mu kwiyubaka yagombaga gushyira imbere kubaka imihanda ihuza ibihugu bigize iyo miryango n’uburyo bw’itumanaho. Ibyo ntibyashyizweho imbaraga zihagije kubera kurangazwa n’ibibazo bya politiki mu myaka ya mbere y’ubwigenge byazanye kubaka ishyaka rimwe rukumbi bamaze guheza abandi no kubamenesha ahenshi bakanabica.

Hakurikiyeho ibihe bya za Coup d’Etat zahariye politiki abasirikare atariyo nshingano yabo muri Repubulika. Hari aho wabara Coup d’Etat zirenga icumi mbere y’uko igihugu n’abaturage babona agahenge. Haje gukurikiraho inkubiri ya demokarasi mu bihugu byose by’Afurika, amashyaka menshi arongera aravuka ariko ibyo byose byajyanaga n’umutekano muke mu bihugu. Kubitiraho ko abakoloni nabo bagiraga uruhare muri ako kaduruvayo bitewe n’ubushyamirane bari bafitanye iwabo bwakurikiranaga n’amashyari ku nyungu bakuraga mu bihugu muri Afurika bategekaga. Za Coup d’Etat nyinshi zategurirwaga muri ibyo bihugu bya mpatse ibihugu (Paris, Bruxelles, Londres).

Afurika yarivuguruye, ifite ijambo rimwe mu ruhando mpuzamahanga kandi byatumye ibyahoze ari mpatsibihugu birushaho kubaha Afurika. Ba mpatsibihugu na bo inkoni y’ubukoloni barayirambitse kuko uburyo nabo bivuguruye bubaka ubumwe bwabo, ntibicyorohera igihugu kimwe guhaguruka ngo kigiye cyonyine gutera muri Afurika kidafite uburyo cyabyumvikanyeho n’ibindi bihugu bihuje inyungu mu muryango byubatse (nk’Ubumwe bw’u Burayi) cyangwa kibihawemo manda ya Loni. Ni muri ubwo buryo Francois Mitterrand wategekaga u Bufaransa atashoboye kugaba igitero simusiga cyo kubuza Inkotanyi gufata Kigali. Mu myumvire ye ingabo z’u Bufaransa zagombaga gukora ibishoboka byose Kigali ntifatwe kuko kuri we kuyifata yari itsinzi ya FPR akumva ko nawe yaba atsinzwe. Igihe yarakeneye iyo nkunga, Habyarimana yagiye kumutakambira, Mitterrand abura aho ahera aramuhakanira. Isura y’u Rwanda na Jenoside yateguwe byari bizwi bikurikiranirwa hafi kandi mu Bufaransa hari imitwe ibiri y’ubutegetsi itumvikana aho Mitterrand yategekanaga na Ministiri w’Intebe badahuza politiki, no mu Nteko Ishinga Amategeko hari higanjemo abadepite badashyigikiye umurongo wa politiki w’ishyaka Mitterand akomokamo.

Aho uko kwivanga muri politiki y’ibihugu by’Afurika igabanukiye, nibwo abayobozi b’ibihugu by’Afurika bubatse inzego nshya zigize Umuryango w’Ubumwe bw’Afurika zagaragaje ko zishobora ubwazo gukemura ibibazo bya politiki n’umutekano muri Afurika. Ubwa nyuma twabibonye kuri Gambia Perezida wariho ashatse kwanga kurekura ubutegetsi kandi yatsinzwe amatora.

Haracyari inzira ndende kugira ngo inzego z’Ubumwe bw’Afurika zikomere kandi zubahwe ariko intambwe igezweho ubwayo iratanga umusaruro wubahisha Afurika ku buryo na Loni nta cyemezo igifata itifatanyije cyangwa itubahirije ibyemezo by’uwo muryango. Ibyo ntibyahozeho

Imiryango y’ubukungu yashyizweho mu turere twa Afurika iri kwiyubaka mu buryo bw’imihanda n’ubw’itumanaho. Urugero rwa hafi ni amasezerano ahanitse hagati y’u Bushinwa na AU wo guhuza imirwa mikuru y’ibihugu ku buryo bwa highway cyangwa gari ya moshi. Ibirometero 2200 bimaze kubakwa kandi biracyakomeza.

Gari ya moshi hagati ya Abijan na Ouagadugu iri kuvugururwa; Kenya irangije iya Mombasa-Nairobi kandi igomba gukomeza igana ku mupaka wa Uganda. Uganda nayo imaze kubona amafranga yo gukomeza uwo muhanda iwuganisha Kampala no ku mupaka w’u Rwanda. Biteganyije ko uwo muhanda uzagera na Juba muri Sudani y’Epfo.

Uretse gari ya moshi, hariho ibiganiro ku bushobozi bwo kubaka ibitembo bya peteroli bizaturuka ku cyambu cya Mombasa ikanyura Kampala ikagera n’i Kigali. Izo ngufu iyo zijya gusanga wa murongo wa Cairo- Captown warakozwe biba byoroheye Afrika guhuza vuba abaturage bayo.

Politiki nazo ziri guhinduka, ubundi Afurika ivuga Igifaransa mbere ntiyumvaga ifite impamvu yihutirwa yo gusabana na Afurika ivuga Icyongereza. Amasoko yarateye ku buryo abavuga ururimi rumwe bahahiraga mu Bufaransa, abandi mu Bwongereza.

Ikindi kandi yaba abo bavuga Igifaransa, ari n’ab’Icyongereza, kugira ngo bavugane kuri telefoni bagombaga kunyura ku murongo basabye i Paris cyangwa i Londres. Sosiyete z’indege nazo kwaruko. Ntiwavaga i Kigali ngo ujye Libreville utabanje kunyura i Paris. Iyo mihanda iri kubakwa, sosiye z’indege ziri kwivugurura n’itumanaho ryateye imbere kuri telefoni na internet ubu byafunguye uburyo bushya bwo kugira ngo Abanyafurika bahahirane kandi basabane.

U Rwanda rwagaragaje ubushake bwa politiki na dipolomasi. Ibihugu byo muri Afurika y’Iburengerazuba byiganjemo Igifaransa birasurana n’u Rwanda bigakorana amasezerano y’ubufatanye muri gahunda z’iterambere zitandukanye, hafunguwe imihanda y’indege n’ibyo bihugu. Ntabwo ariko ibihugu byinshi byari byabona ayo mahirwe mashya.

Mu mamurikagurisha mpuzamahanga hano i Kigali hakunze kuza ibihugu by’Afurika y’Iburasurazuba, bimwe bya ruguru nka Misiri ndetse na kure muri Turukiyaa ariko Afurika y’Uburengerazuba niyo hagati no hepfo ntibyari byitabira. Haracyari kare wenda. Hagomba ariko kugira igikorwa kugira ngo bitere imbere nabyo bize. Aha niho mbona uruhare rw’itangazamakuru, urw’ishami ry’ubukerarugendo muri RDB ; urwa Ministeri y’Umuco na Siporo ; urwa RwandAir n’urw’Urugaga rw’Abikorera mu Rwanda.

Ndabirebera kandi mu ndorerwamo y’u Rwanda ruyobora Umuryango w’Ubumwe bw’Afurika, tukazatanga inkoni ku kindi gihugu tumaze kwerekana icyerekezo cyo kubaka Abanyafurika bahuje.

Gushyiraho uburyo itangazamakuru rishyize hamwe ryo mu Rwanda ryazakorana inama na bagenzi babo bo mu bihugu bimwe bya Afurika bikomeye muri buri karere. Ibyo bitangazamakuru bizumvikaneho uburyo bwo guhererekanya porogaramu zimenyekanisha ibihugu ku bindi, abaturage n’umuco wabo n’ibikorerwa mu bihugu byabo mu by’ubukungu, amasoko yaho n’ibindi ; hakaba gahunda zubahirizwa hagati y’itangazamakuru ry’u Rwanda n’ibyo bihugu.

RwandAir igashyiraho ibiciro bya promotion muri ibyo bihugu ; ibikorwa by’itangamakuru bigahuzwa na gahunda za Ministeri y’umuco na Siporo mu kureba uburyo imyidagaduro byategurwa. Champiyona yamamaza Pan-Africanism y’umupira w’amaguru yatekerezwaho.

Abikorera ku giti cyabo ku byerekeye ubucuruzi, bakagira umushyikirano ku buryo bw’ingendo n’inama zategurwa ndetse n’imurikagurisha. Hashobora no kugenwa ukwezi kwa « Pan-Africanism» ; ibyo bikorwa byose bigahurira mu Rwanda cyangwa bigasaranganywa mu bindi bihugu.

Izo gahunda zose zaba imbarutso ubundi hakazagenwa izihoraho zirushaho guhuza Abanyafrika mu bukerarugendo, mu bucuruzi, muri siporo no mu muco.

Umuryango w’Ubumwe bw’Afurika na wo na Banki Istura Amajyambere (BAD ) n’izindi banki bigahuriza kuri gahunda y’ubwikorezi n’itumanaho no kubaka inganda zikora ibyo tujya guhaha ishyanga kandi Afurika ishobora kubikora. Ibyo bigahabwa umugisha no kubaka inzego n’imikorere mishya n’amahame mashya bya AU nabyo biri mu nshingano zahawe Perezida Kagame. Ni Programu yaguye kandi iremereye ariko izashimangira uruhare rw’u Rwanda mu byicaro bigenga politiki mpuzamahanga.

Paul Mbaraga wanditse iki gitekerezo ni umwarimu muri Kaminuza y’u Rwanda mu ishami ryigisha itangazamakuru.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza