Niba nta gikozwe ku cyaha cy’ubusambanyi ibintu bizakomeza kujya irudubi

Yanditswe na Urinzwenimana Mike
Kuya 24 Mata 2021 saa 06:43
Yasuwe :
0 0

Ubushakashatsi bw’Ikigo cy’Ibarurishamibare bwo mu 2014/2015 bwagaragazaga ko mu Rwanda abakobwa bageza imyaka 19 y’ubukure, muri bo 15% baba baratwaye inda zitateguwe.

Ubu bushakashatsi bwagaragazaga ko Intara y’Iburasirazuba iza ku isonga mu kugira abangavu benshi batwaye inda kuko yari ifite 10,7%, Umujyi wa Kigali ukagira 10,2%, hagakurikiraho Uburengerazuba na 5,8%, Amajyepfo ni 5,6%, mu gihe Intara y’Amajyaruguru yo ifite 4,9%.

Mu mibare yavuye mu bushakashatsi bwa UNICEF Rwanda mu 2015/2016 bwakorewe ku bana 2000 bugamije kureba ihohoterwa rikorerwa abana, bwasanze 24% by’abakobwa na 10% by’abahungu barakorewe ihohoterwa rishingiye ku gitsina.

Minisiteri y’Ubutabera igaragaza ko mu 2019 yakiriye ibirego by’abana bafashwe ku ngufu barenga 5000 mu gihe mu 2018 yari yakiriye ibirego 4127.

Ubundi bushakashatsi buheruka gushyirwa hanze na Minisiteri y’Ubuzima bwerekanye ko nibura mu Rwanda abagore n’abakobwa bagera ku bihumbi 60 bahura n’ikibazo cyo gukuramo inda buri mwaka.

Ubwo bushakashatsi bwagaragaje ko mu bagore n’abakobwa bari mu kigero cy’imyaka 15 na 44, byagaragaye ko abagera kuri 25/1000 bahura n’ikibazo cyo gukuramo inda.

Mu mibare y’inkiko iheruka gutangazwa igaragaza ko gatanya zizamuka ubutitsa kuko kugeza mu Ugushyingo 2018, hari hamaze gucibwa imanza za gatanya 1311, ni ubwikube bw’inshuro 19 ugereranyije n’umwaka wa 2017

Abajyanama n’impuguke ku muryango nyarwanda bagaragaza ko 90% y’isenyuka ry’ingo rishingiye ku busambanyi .

Imibare imenyekana nitamenyekana y’abana baterwa inda zitateguwe ni umwe mu musaruro w’abantu bamwe bamaze kumva ko ubusambanyi ari igikorwa kidafite inkurikizi.

Dushingiye kuri iyi mibare yagaragajwe n’ubu bushakashatsi yaba iy’abana baterwa inda zitateguwe, abana bafatwa ku ngufu, abana b’abakobwa bakuramo inda ndetse n’itandukana ry’ingo igaragaza uburyo icyaha cy’ubusambanyi ari kimwe mu bifite ubukana ndengakamere muri iyi minsi, cyane ko cyugarije abantu b’ingeri zose.

Ikibabaje kurushaho ni uko usanga mu gihe tugezemo ubu busambanyi butakirangwa gusa mu batizera Imana ahubwo bimaze kugaragara ko na bamwe mu bakora imirimo y’imbere mu nzu y’Imana (ba Pasiteri, Padiri n’abandi ) batangiye kwandura uyu muze w’icyaha.

Nyamara twibuke ko ubwinshi bw’aba basambanyi budatagatifuza icyo cyaha ngo bireke kwitwa icyaha ndetse cyabasha kurimbuza benshi nk’uko byabaye ku bari batuye muri Sodomu na Gomora.

Iyo usomye muri Bibiliya mu Itangiriro igice cya 18, ijambo ry’Imana ryerekana ukuntu habonetse gutaka gukomeye kurega Sodomu na Gomora ku Mana kubera ibyaha byaho, nyamara Aburahamu agatakamba cyane ngo Imana ibabarire abahatuye.

Icyaje kubaho kinateye agahinda ni uko Abamalayika Imana yohereje ngo bajye kureba ukuri kw’ibibera i Sodomu, abaho babasanganiye bashaka kubasambanya ku ngufu, byerekana ko icyaha cyo gusambana cyari kimaze kubarenga.

Nk’uko bigaragara mu gice cya 19:23, bikururiye akaga maze ngo Uwiteka agusha kuri Sodomu na Gomora amazuku n’umuriro bivuye k’uwiteka mu ijuru. Atsemba iyo midugudu yose na cya kibaya n’abayituyemo bose n’ibyameze ku butaka.

Satani afite ubukana n’uburiganya bukabije cyane, azi neza ko benshi abategera mu busambanyi barangiza bakanga no kwihana ngo batazabaseka cyangwa bakabambura ibyubahiro bari bafite.

Nyamara bibaye byaranakugwiririye ukagwa mu cyaha cy’ubusambanyi ibyiza ni uko wakwihana ukatuza akanwa kawe ukareka kubebera, ukareka kwihesha amahoro mu mutima kuko n’ubundi wayihesha wagira ute uracyari umusambanyi nyamara imbabazi z’Imana ziruta urubanza uramutse wemeye mu gihe gito waba umukiranutsi ugasezera ku kuba umusambanyi.

Biranashoboka ko waba warigeze kujya ugendera muri izo ngeso z’ubusambanyi, urabe maso ntushukwe n’ubwo buranga, kenshi umuntu akumbura ibyo yariye, akararikira ibyo yabayemo, nta cyabuza Satani kongera kukwereka ibibero by’inkumi niba uri umusore maze ugata umurongo, ubukumi bwawe buracyakenewe hagarara kigabo uteshe, usenge usabe Imana imbaraga zo kurimbura iyo kamere mbi y’ubusambanyi, ibuka aho watsindirwaga n’aho satani yagutegeraga maze uhirinde.

Wowe wirinze kuva cyera uri uwo gushimwa, nyamara Satani araguhigira ngo nawe agushyire mu rutonde rw’abasambanyi, ariko muvandimwe komera uhagarare kigabo, tumbira umusaraba uzagushoboza, ubusugi bwawe n’ubumanzi bwawe ni icyubahiro kuri wowe kandi ni n’ishimwe ku Mana, komeza ubwo butwari ntuzatatire igihango dore ko tutari n’abacu ngo twigenge kandi rwose humura uzanesha. Muhaguruke twifate, dufashe bagenzi bacu kwifata turwanye ubusambanyi twivuye inyuma, twigire ku mateka y’abatubereye akabarore maze twirengere.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .