Ni nde utwara abana hagati y’umugabo n’umugore igihe habayeho ubutane ?

Yanditswe na Maurice Munyentwali
Kuya 18 Ukwakira 2017 saa 09:25
Yasuwe :
0 0

Itegeko Nº 32/2016 ryo ku wa 28/08/2016 rigenga Abantu n’Umuryango riteganya ko abana bahabwa umubyeyi watsindiye ubutane. Undi mubyeyi asigarana gusa uburenganzira bwo kubasura, kubavugisha cyangwa gusurwa na bo, bigakorwa mu buryo bugenwa n’umucamanza waciye urwo rubanza.

Ubusanzwe Itegeko rigenga Abantu n’Umuryango riteganya ko ubutane bw’abashyingiranywe bushobora gukorwa mu buryo bubiri. Uburyo bwa mbere ni igihe umwe mu bashyingiranwe atanze ikirego mu rukiko asaba ubutane ashingiye ku mpamvu umunani ziteganywa n’itegeko zirimo ubusambanyi, guta urugo nibura igihe cy’amezi 12 akurikirana, igihano cy’icyaha gisebeje, kwanga gutanga ibitunga urugo, guhoza undi ku nkeke, ihohoterwa rishingiye ku gitsina, kumara nibura imyaka ibiri batabana ku bushake bwabo no kutabana mu gihe kirenze amezi 12 akurikirana uhereye igihe habereye ishyingirwa nta mpamvu zifite ishingiro.

Muri ubu buryo bwa mbere, uwatanze ikirego gisaba ubutane akabutsindira (yaba umugabo cyangwa umugore) niwe utwara abana. Uwo baburanaga watsinzwe asigarana gusa uburenganzira bwo gusura abana, kubavugisha kuri telefone cyangwa se nabo bakaba bamusura ariko bigakorwa mu buryo bwagenwe n’umucamanza waciye urwo rubanza.

Uburyo bwa kabiri ubutane bw’abashyingiranywe bushobora gukorwamo ni mu gihe bombi (umugabo n’umugore) ari bo bisabiye ubutane ku bwumvikane bwabo (divorce by mutual consent).

Muri ubu buryo bwa kabiri, umugabo n’umugore nibo biyumvikanira bakagena uzatwara abana bakabikorera amasezerano bashyikiriza urukiko mu gihe basaba ubutane.

Inyungu z’abana zishobora gutuma umucamanza abigena ukundi

Nubwo mu buryo bwa mbere bw’ubutane twasobanuye hejuru twavuze ko uwatsinze urubanza ariwe utwara abana, urukiko rubyibwirije cyangwa rubisabwe n’umwe mu basaba ubutane cyangwa n’undi muntu wese ubifitemo inyungu, rushobora gutegeka ko umwana ahabwa umubyeyi utatsinze urubanza cyangwa se undi muntu wese, rushingiye ku byagirira abana akamaro.

Abana batarageza ku myaka itandatu y’amavuko, bagomba kubana na nyina keretse iyo bishobora kubangamira inyungu zabo. Urukiko rushobora kandi gutegeka ko abana bamwe barerwa n’umubyeyi umwe, abandi nabo bakarerwa n’undi mubyeyi mu gihe biri mu nyungu z’abana ariko cyakora ibyemezo urukiko rubifasheho bihora ari agateganyo, rushobora kubikuraho igihe icyo ari cyo cyose bisabwe n’ubifitemo inyungu mu buryo bw’ikirego gitanzwe n’umuburanyi umwe (unilateral petition).

Twanzura...

Mu kwanzura iyi nyandiko nakwibutsa ko hatitawe k’uwashinzwe kurera abana, ababyeyi babo bafite uburenganzira bwo kugenzura uko abana bafashwe n’uko barerwa. Bagomba kandi gutanga indezo hakurikijwe ubushobozi babifitiye.

Ikindi ni uko ubutane bw’ababyeyi ntacyo bwambura abana babakomokaho mu byo amategeko cyangwa amasezerano y’imicungire y’umutungo w’abashyingiranywe abahera uburenganzira.

Impuguke mu by’amategeko, Maurice Munyentwali

Byakusanyijwe na Maurice Munyentwali
[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza