00:00:00 IGIHE NETWORK KN KINYARWANDA EN ENGLISH FR FRANCAIS

Mbahe impanuro rubyiruko, dore impamvu mukwiye kwirinda ibiyobyabwenge

Yanditswe na Kwezi Jean
Kuya 22 Ukwakira 2021 saa 03:43
Yasuwe :
0 0

Kera najyaga numva abakuru baca umugani ugira uti “Ukize ubusore arabubagira’’ cyangwa bati “ubuto buroshya’’ maze babona ubwirwa ntiyumve bagaca undi mugani ugira uti “Nyamwanga kumva ntiyanze no kubona’’ .

Kuri iyi migano yose hari nubwo bongeragaho bati “agapfa kaburiwe ni impongo’’ bakanzura bagira bati “utumviye se na nyina yumvira ijeri’’.

Ubwo nari nicaye mvuye muri siporo ndimo kuruhuka, akanyoni bita ‘’umununi’’ kagira amabara ateye amabengeza kaje kihuta kahuranya kaba kagonze ikirahuri gahita kameneka umutwe kagwa aho. Narakarebye ndababara ariko ngatekerezaho cyane. Ikigaragara kaje kiruka karebye mu kirahuri kabona ari inzira nyabagendwa, ntikagira amakenga kuko ikirahuri cyaraboneranaga, ko rero kagize ngo ni inzira isanzwe.

Ibi byatumye ntekereza kuri bamwe mu rubyiruko babona ibishashagirana byose bakiroha bagira ngo ni zahabu, bakahatakariza ubuzima.

Mbere gato Covid 19 itarabaho, mu minsi isoza icyumweru guhera ku wa kane kugeza ku cyumweru mu bice bya Remera-Kisimenti nakundaga kuhanyura nkabona ukuntu abantu ingeri zitandukanye cyane abasore n’inkumi babaga basohotse barimo kwishimisha, ari byo bita kuryoshya banywa agasembuye na ka mushikaki rugeretse byiyongera ku miziki itandukanye.

Kimwe mu byanteraga kwibaza ni ukubona abasore n’inkumi babaga basinziriye mu ntebe cyangwa kuri comptoir y’akabari kubera isindwe. Abandi ugasanga barimo kugwatiriza imyenda cyangwa telefoni zabo kuko banyweye bagashirirwa bagahitamo kubigira ingwate ku neza cyangwa ku mbaraga.

Kunywa ukarenza urugero ubwabyo numva ari bibi kuko byangiza ubuzima. Muri make ubwo biba byabaye ikiyobyabwenge kuko kunywa ukageza ubwo winyarira, ukibagirwa aho utaha, ukagwatiriza ibyo ufite, uba utakibarizwa mu isi y’abantu batekereza neza.

Tukiri ku biyobyabwenge , ndibuka umusore umwe wansanze ahantu asaba agasembuye barakamuha, aricara aratuza atangira kujya amara akanya agasa n’usimbuka .Kera kabaye arandeba arambwira ati ‘ndumva ndimo kuva amaraso munsi y’ibirenge’, kandi mu by’ukuri njye ntayo nabonaga.

Nafashe umwanya ndamwitegereza kugira ngo mbanze nshyikire ubutumwa bwe mu bwonko bwanjye kuko sinabikururaga neza. Ntabwo icyari kimuteye ibyo byiyumviro n’intekerezo nk’izo ari iyo byeri yari anyweye, ahubwo naje gukurikirana nsanga ari umunywarumogi rwamaze kwangiza kugera ubwo arunywa rwamugera mu ngingo akumva yatobotse munsi y’ibirenge.

Ndibuka undi wampaye ubuhamya bwe ariko waretse kunywa ibiyobyabwenge, wambwiye ko iyo yamaraga kubinywa yabonaga ashagawe n’inkwavu nka Magana atanu zirimo kumwirukaho, zimutabariza ngo ‘muramufate muramufat’. Ngo yirukaga imisozi abatabizi bakagira ngo ari kwiruka ku kintu kandi ari inkwavu zirimo kumwirukankana.

Vuba aha nongeye kumva inkuru z’abasore n’inkumi bagiye kunywa, bananirwa kwishyura ibyo bafashe bigira inama y’uko umwe muri bo yagwatiriza telefoni ye bakajya gushaka ubwishyu.

Byatumye numva naburira urubyiruko rwacu kwirinda kwishora mu biyobyabwenge by’ubwoko bwose kuko byangiza ubuzima bwabo bakaba abantu bahorana isereri n’ikizungera mu bwonko bwabo, bakabaho batagira icyo bimarira ubwabo, igihugu cyangwa umuryango n’isi muri rusange.

Ibiyobyabwenge bitera igihombo kandi kuko na duke bafite dushirira muri ibyo cyane ko kenshi bamwe nta mikoro baba bafite, bikaba byabatera kwiba kugira ngo babone uko babigura.

Kimwe urubyiruko rwacu rugomba kwimakaza ni ukubaho bafite intego y’ubuzima kuva ku myaka batangiye kugimbuka, bakaba bafite ishusho ntasubirwaho y’icyo bifuza kuba cyo. Ibi rero bikagaruka bikaba inshingano z’ababyeyi n’umuryango muri rusange bikagera no mu burezi.

Hakwiriye kubaho umwanya wo kuganiriza umwana abazwa intego afite n’uko yumva azayigeraho bityo agashyigikirwa. Ibi ndabivuga mfite ingero zimwe zifatika, aho wegera umusore cyangwa inkumi y’imyaka 18 wamubaza icyo ashaka kuba cyo, ugerageje akakubwira ko ari Imana ibizi, uwabuze uko asubiza cyamugonze ati “Ndacyabitekerezaho”, uwamaramaje kubura igisubizo ati “ntacyo nzi”.

Akenshi uhita wibaza ukuntu umuntu yiga akarangiza amashuri yisumbuye yewe akajya no muri kaminuza atazi icyerekezo cye bikagushobera.

Urubyiruko numva narushishikariza kumva inama nanjye numvise ku mugabo umwe ufite channel ya Youtube anyuzaho ibiganiro by’igenamitekerereze (philosophy), aho yigeze kuvuga ati “Ni byiza kugendana n’abantu uzigiraho ubunyangamugayo, uzigiraho kuba umukire n’abo uzakuraho ubumenyi runaka bwagufasha gutera imbere”. Iyi niyo nama urubyiruko rwacu rugomba gukurikiza, bakava mu bigare byangiza ubuzima bwabo, bagahitamo kujya bagendana n’abafite urumuri rw’icyizere muri bo.

Ni byiza kubaho ufite intego kandi ugaharanira kuyigeraho uciye mu nzira nziza ziyubashye. Ni byiza kubaho wuzuye icyizere cy’uko imitekerereze yawe itayobowe n’ibiyobyabwenge . Ni ngombwa ko urubyiruko rumenya ko aribo ejo hazaza h’umuryango mwiza n’igihugu cyiza.

Rubyiruko rwacu aho muri hose ku isi, mureke twiyubake nk’abanyarwanda bazira ubusembwa bw’ibiyobyabwenge mu mazina yabyo byose. Ubumwe bwacu kuri buri ntego nibwo butsinzi bwacu, duharanire kugira ubuzima buzira umuze.

Nta terambere cyangwa ejo hazaza ku rubyiruko rwishoye mu biyobyabwenge

Igitekerezo cya Kwezi Jean


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .