Kuki ibibazo bya kera byabaye karande muri EAC?

Yanditswe na Gatete Nyiringabo Ruhumuliza
Kuya 15 Kanama 2019 saa 06:08
Yasuwe :
0 0

“Wayobora ingamiya ku mugezi ariko ntiwayitegeka kunywa amazi itabishaka.’’ Ukwihuza k’Umuryango wa Afurika y’Iburasirazuba kugereranyijwe na gari ya moshi, EAC yaba yubakiye bidashidikanywaho ku bushake bwa politiki, aho yajya ihagarara i Nairobi, i Dar es Salaam, i Kigali, Kampala, Juba na Bujumbura bijyanye n’ukwifuza kwa buri gihugu cy’umunyamuryango.

Nta gushidikanya ko yazahagera byanze bikunze. Abayobozi ba EAC bahinduka buri mwaka ariko umuvuduko wo kwihuza ugaruka ku mubano hagati y’ibihugu biyigize.

Mu bihe byiza, twihuza byihuse, mu bidasanzwe tugenda biguru ntege. Ibihe bigoye twahuye nabyo mu minsi ya vuba.

Ni impamo ko imikorere ihamye ya Perezida Kagame ituma abatuye muri EAC bitega byinshi ku buyobozi bwe yahawe muri uyu mwaka.

Perezida Kagame nta bitangaza yakora kuko urwego ayoboye rwubakira ku bushake bwa bagenzi be. Binyuze muri abo, ndavuga abandi bakuru b’ibihugu batanu bitabaye ibinyuze mu Bunyamabanga bwa EAC buri i Arusha cyangwa ibindi bigo bishamikiye kuri uwo muryango.

Nabonye hari abari guhuza umubano w’Umuyobozi wa EAC n’Umunyamabanga Mukuru wayo nk’impamvu y’ibibazo umuryango ufite.

Iryo gereranya ntirikwiye. Mu by’ukuri, ntihabaho ibibazo biteye bityo hagati y’umukoresha n’umukozi we.

Umunyamabanga Mukuru wa EAC akora bijyanye n’ubushake bw’Inteko rusange ihagararirwa n’Umuyobozi Mukuru uriho hatitawe ku gihugu aturukamo.

Nyamara mu gihe bari mu nshingano zabo, Umuyobozi n’Umunyamabanga Mukuru ba EAC baharanira inyungu z’abaturage miliyoni 174 bo mu bihugu bitandatu.

Ibisubizo ku bibazo biri muri EAC bikeneye kurebwaho binyuze mu bigo bitatu by’ingenzi bigize EAC birimo Inteko y’Abakuru b’Ibihugu, Inteko Ishinga Amategeko y’Umuryango w’Ibihugu bya Afurika y’Iburasirazuba (EALA) igizwe n’abadepite baturuka muri buri gihugu n’Ubunyamabanga bushinzwe ibikorwa bya buri munsi.

Dufashe urugero, si impanuka kuba ibihugu by’ibinyamuryango byatangiye kwinangira ku kwishyura umusanzu washyizweho nyuma y’igenzura ryagaragaje ko Ubunyamabanga bukoresha nabi amafaranga kandi nta cyakozwe kuri ibyo.

Icyo n’ibindi bibazo bishegesha Umuryango wa Afurika y’Iburasirazuba ni byo bituma abatuye EAC barushaho kuyitakariza icyizere.

Mu bifatika, Urukiko rw’Umuryango wa Afurika y’Iburasirazuba (EACJ) rwashyiriweho mu gukemura ibibazo by’abaturage bo mu bihugu by’ibinyamuryango, EALA irebera hafi amategeko yo kwihuza n’Ubunyamabanga bushinzwe guhuza ibikorwa no kwihutisha ukwihuza ndetse n’Inteko itangirwamo icyerekezo cy’imiyoborere n’ubushake bwa Politiki.

Buri rwego rufite ibibazo rwihariye mu kigo, bituma rukoresha ubutunzi bw’abaturage mu kubikemura buri gihe nyamara hari hakwiye kubaho urugendo rwo kwihuza.

Ni muri iyo migirire Perezida Kagame yaherewemo ubuyobozi bwa EAC ariko ntiyahawe ubushake bwa politiki n’ubufasha nk’ubwo yabonye ari ku ntebe y’Umuryango wa Afurika Yunze Ubumwe.

Niba yarashoboye gukora neza ku rwego rw’umugabane ni uko abayobozi bakoreraga hamwe bafite intego yo gushyigikira amavugurura n’imiyoborere ye.

Icyo ni cyo cyabuze ku rwego rw’akarere, guhuza ubushake bwa politiki; iyo igihugu kimwe cyiteguye gukora ikintu no gutera imbere, ikindi nta bushake kigaragaza.

Ibyo bigomba guhinduka. Mu misanzu ya miliyoni $8 itangwa buri mwaka, abaturage ba EAC bategereje ubunyangamugayo no gushikama mu gufata ibyemezo.

Mu gihe cyo kuvuga ku misanzu yatinze gutangwa n’ibihugu by’ibinyamuryango, umutwaro uri ku bigo bigize EAC wo kugaragaza ibiciye mu mucyo, ubutabera no guha agaciro amafaranga nkuko byahoze.

Ibikubiye muri iyi nkuru ni ibitekerezo bwite by’umwanditsi, Gatete Nyiringabo Ruhumuliza. Yabanje kunyura muri The New Times ihindurwa mu Kinyarwanda na IGIHE.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza