00:00:00 IGIHE NETWORK KN KINYARWANDA EN ENGLISH FR FRANCAIS

Itangazamakuru rikozwe neza ni irihe?

Yanditswe na Dufitumukiza Salathiel
Kuya 3 Gicurasi 2021 saa 10:46
Yasuwe :
0 0

Niba hari uwumva, akareba cyangwa agasoma amakuru buri uko abyutse n’uko agiye kuryama, ni uko azi neza akamaro kayo. Isi tugezemo yubakiye ku makuru ku buryo bisa n’aho twayagize kimwe mu byangombwa tugendana, utayafite [atazi ibigezweho] asa n’utari kumwe n’abandi cyangwa uhejwe.

Mbanje gushima ko asigaye atangwa byihuse hakoreshejwe uburyo bwose bushoboka. Ni intambwe ikomeye yatewe mu itangazamkuru ry’u Rwanda umuntu atarenza ingohe, ndetse n’ihame ryo kuvuga ukuri no kutabogama henshi bigaragara ko ryubahirizwa.

Ku rundi ruhande ariko mfite impungenge ku mujyo rikomeje kugenderamo, aho ibitagenda neza n’ibyafatwa nk’ibibazo ari byo bigarukwaho igihe kirekire, ibyagezweho byo gushimwa, ibyafasha rubanda gusobanukirwa ingingo iyi n’iyi ntibihabwe umwanya uhagije.

Mperutse kubyuka umunsi umwe ngiye gusoma nsanga inkuru z’akababaro ari zo zinyakirizwa gusa. Narahinduye njya ku rundi rubuga, eshatu za mbere nasanze ari iz’abiyahuye n’abakubitanye amacupa. Kuri Twitter ho naharebye ndi mu modoka nerekeza ku kazi, nsanga inkuru ibitangazamakuru byasangije (share) ababikurikira, ziragaruka ku bambuwe, abatawe muri yombi n’abayobozi bakubise abaturage.

Kuko byose ari amakuru kandi rubanda bakeneye kumenya, ushobora kumva ko bikwiye kuba bityo ariko hari n’ikindi gikwiye gutekerezwaho.

Mu buryo bumwe ni byiza kuvuga ibitagenda neza kuko mu mikorere y’itangazamakuru rigomba kuba ijwi rya rubanda, bityo abatuzuza inshingano zabo neza bakabibazwa n’abagomera aho inzego z’ubuyobozi zitabona rikabamenyekanisha.
Icyo ni ikintu cyiza kinasigaye hake ku buryo u Rwanda ruri mu bihugu bike bigikora, nubwo hagikenewe indi ntambwe.

Ariko se niba abateze amatwi radio, abareba televiziyo n’abasomyi babona ku bwinshi inkuru n’ibiganiro by’ibitagenda neza cyangwa ibibazo, iziteye ubwoba, n’izubakiye ku binyoma, ahari akamaro k’itangazamakuru kazagerwaho uko bikwiye?

Byanyanze mu nda negera abakuru bafite ubunararibonye muri uwo mwuga, mbabaza uko byagenda mu gihe byaba bikomeje uko.

Umunyamakuru wa RBA urimazemo imyaka 26 ndetse akaba n’Umuyobozi w’Urwego rw’Abanyamakuru Bigenzura (RMC), Barore Cléophas, yambwiye ko kwibanda ku bitagenda neza biba ikibazo iyo bivuzwe mu buryo budakwiye cyangwa bigashakishwa ku ngufu hagamijwe guhisha ko hari byinshi bihari bikorwa neza.

Kuba itangazamakuru ryahakana ibyiza byakozwe rikerekana ko nta bihari, abibonamo “kuyobya abarikurikira”, ariko ryerekanye ahari intege nke kugira ngo bikosorwe riba rigize akamaro.

Yagize ati “Ikibazo ni uguheza inguni ukarwara amaso ntiwemere ibigerwaho, buri gihe ugashaka kwerekana ko nta kigenda kandi ubizi ko hari byinshi bigenda neza. Guhora mu bitagenda [neza] gusa bituma abaturage batabona amakuru y’ibindi bikorwa byiza bagafatiyeho urugero, bakaba bagira ubwoba bakeka ko hari umutekano muke kandi atari byo.”

Muri 20 bo mu Mujyi wa Kigali nabajije, 15 bambwiye ko bahitamo gukurikira igitangazamakuru kibagezaho ibyo mu ngeri zose, bane bambwira ko bahitamo kumva ikivuga ibitagenda naho umwe abura uruhande ahereraho.

Abahitamo ikivuga ubuzima bwose babishingira ku kuba usibye kuhigira banahatara umunezero w’inkuru zibasetsa mu gihe hari icyabateye umunabi cyangwa akazi kabananije ndetse bikajyana no kumenya ibigezweho.

Banavuze ko bahamenyera ibyo abandi bigejejeho n’uko ubuzima bw’igihugu buhagaze bityo bakamenya aho bagana. Ibyo binagendana no kugira umurava bigira ku byiza baratiwe n’abandi.

Abagaragaje ko itangazamakuru rivuga ibitagenda neza kenshi ari ryo bahitamo, batanga impamvu ko hari ubwo rikora ubuvugizi byihuse mu gihe bukenewe cyane.

Uwifashe we yagize ati “Ubuvugizi turabukeneye, kwidagadura nabyo bikwiye kuza imbere abantu bakabona aho baruhukira kandi tukanigishwa duhabwa amakuru agezweho. Mpisemo nshobora guhitamo ikivanga ingeri zose, ariko n’ikivuga ibibazo gusa gifasha abarengana kurenganurwa vuba.”

Umuyobozi wa Radio Salus akaba n’umwarimu muri Kaminuza y’u Rwanda mu Ishami ry’Itangazamakuru, Paul Mbaraga, namubajije uko yumva impungenge zanjye, ambwira ko itangazamakuru riharira umwanya munini ibitagenda neza cyangwa ibyumvikana nk’ibibazo atari ryiza kandi “si iry’ukuri”.

Mbaraga afite ubunararibonye, yatangiye itangazamakuru mu 1977 aho yakoreye Radio Rwanda akomereza kuri Deutsche Welle na RFI y’Abafaransa.

Yakomeje ati “Hari nk’ibiba byaragezweho muri aka kagari byageragejwe bikananirana mu kandi. Iyo ugaragaje nk’ahantu byagenze neza, uba uhaye amakuru abo byananiye, bakabona icyitegererezo cyabafasha gukomeza gukora cyane ngo nabo babigereho.”

“Umuryango Nyarwanda ntabwo uganjemo ibibazo cyangwa ibitagenda neza gusa. Hari n’ibindi bibera impande n’impande byabagirira akamaro.”

Kwigisha, guha amakuru, kuvugira rubanda no kubafasha kwidagadura, byose biri ku bitugu by’itangazamakuru. Iyo kimwe gihawe umwanya munini ikindi kikaburizwamo, bituma icyizere rigirirwa kigabanyuka rubanda ntibabe bakiryiyumvamo.

Mu gihe itangazamakuru ridakoze neza inshingano zaryo, abayobozi bashobora gucika intege zo guha amakuru abaturage kuko “umunyamakuru agaragaza ko nta cyiza ashaka kubona.”

Itangazamakuru niribe umuhuza wa rubanda n’ubuyobozi ariko rye guteranya. Niribe umuvugizi ritarengereye, rirebere Leta ritarenganyije kandi ryubakire ku kuri kuko nicyo ryitezweho. Hakwiye kuzirikanwa ko abarikurikira bahora bakeneye ubumenyi, bakanifuza kwidagadura ariko bazi ibigezweho.

Ubwanditsi: Dufitumukiza Salathiel ni umunyamakuru w’umwuga, ibikubiye muri iyi nyandiko ni ibitekerezo bye bwite


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .