00:00:00 IGIHE NETWORK KN KINYARWANDA EN ENGLISH FR FRANCAIS

Isomo dukwiriye kwigira ku ngabo z’u Rwanda

Yanditswe na Kwezi Jean
Kuya 1 Ukwakira 2021 saa 12:54
Yasuwe :
0 0

Umunyarwanda yarihoreye aritegereza, arangije aca umugani ugira uti "Uguhiga ubutwari muratabarana’’; undi na we ati “Na nyina w’undi abyara umuhungu’; njye nkongeraho ko na "nyina w’undi abyara intwari.’’

Ndaca iyi migani ngendeye cyane ku mateka nasomye cyangwa nabwiwe ashingiye ku kuba u Rwanda kuva na kera ku ngoma z’abami, rwaragiye rubyara intwari, byagera ku ngabo zarwo bikaba akarusho.

Nigeze gukurikirana ibyegeranyo by’urugamba Kigeli IV Rwabugiri yarwanye ikigamijwe ari ukwivuna umwanzi cyangwa akabikora ashaka kwagura igihugu biba umuco kugeza ku bandi bami n’ingabo zabo batakorwaga mu ijisho, ibyo bintera gutekereza ku ngabo z’igihugu z’uyu munsi na zo zitisukirwa.

Ibi nabitekerejeho igihe kirekire binsubiza mu mateka y’izi ngabo u Rwanda rufite ziyunze nyuma ya Jenoside yakorewe Abatutsi mu 1994, harimo izahoze muri FAR n’Inkotanyi zari zimaze kubohora Abanyarwanda no guhagarika Jenoside.

Izi ngabo nizo zishyize hamwe zirema igisirikare cy’umwuga kuva ubwo batangira ibikorwa byo kurinda Abanyarwanda n’ubusugire bw’igihugu.

Niba wari ufite imyaka iri hejuru y’irindwi wumvise cyangwa wibuka izi ngabo zijya gucyura Abanyarwanda bari baraheze ishyanga mu nkambi z’impunzi z’iyahoze yitwa Zaire, ubu ni Repubulika Iharanira Demokarasi ya Congo ahagana mu 1996.

Uribuka izi ngabo zifatanya n’Abanye-Congo bashakaga impinduka mu gihugu cyabo bikagerwaho kugeza n’ubu imikoranire myiza ku bihugu byombi ikaba yigaragaza tukaba tubanye neza mu bwubahane n’ubufatanye bihamye.

Burya amagambo aryoha asubiwemo, ndabizi ko wibuka izi ngabo uruhare zagize mu kugarura amahoro mu ntara ya Darfur muri Sudani yari yarayogojwe n’intambara z’urudaca n’ubwicanyi bw’abahatuye ariko ubu hakaba harabonetse ituze kandi ibigwi by’izi ngabo bikaba byivugira.

Mu myaka mike itambutse, izi ngabo zatabaye muri Repubulika ya Centrafrique zigizayo inyeshyamba zabuzaga amahwemo abaturage, ubu na ho urugamba rurakomeje ariko kandi intsinzi irigaragaza mu bice bagenda batsinsuramo ibyo byihebe.

Icyatumye nkorwa ku mutima nkandika, ni uruzinduko vuba aha guhera ku itariki ya 24 kugeza ku ya 25 Nzeri 2021, Nyakubahwa Perezida wa Repubulika Paul Kagame yakoreye muri Mozambique akaboneraho no gusura ingabo z’u Rwanda ziri muri icyo gihugu ku rugamba rwo kurwanya imitwe y’iterabwoba yari yarabujije amahwemo abaturage bo mu Ntara ya Cabo Delgado.

Nakozwe ku mutima n’indirimbo ingabo z’u Rwanda zaririmbaga mu Kinyarwanda zicinya akadiho zizihiwe. Uwambaye Ikirezi ntamenya ko cyera kuko biranezeza kugira igihugu gifite ingabo z’intarumikwa kandi z’abatarushwa ku rugamba.

Kimwe mu bigira igihugu igihangange kuva na kera na kare harimo kugira ingabo zikomeye kandi zubashywe.

Ibihugu nka Amerika, u Bushinwa, u Burusiya na bimwe mu bihugu by’u Burayi kimwe mu byo bafite gituma bitinyika kandi bitisukirwa harimo kugira igisirikare cy’umwuga kandi cyiyubashye muri byose.

Kera twajyaga twumva ko aho byananiranye hatabarwa n’ingabo za NATO, iz’Abanyamerika cyangwa Abarusiya ariko kuri uyu mugabane wacu ibi byatangiye kuba amateka kuko ingabo z’u Rwanda zagaragaje ko kwicungira umutekano nk’Abanyafurika bishoboka cyane.

Ikinyabupfura cy’ingabo z’u Rwanda mu butumwa bw’amahoro ni ntagererwanwa ukurikije uko ibindi bihugu twagiye twumva bitabara aho gukora inshingano zabajyanye bamwe bakishora mu bujura, gufata abagore ku ngufu, kurangarana abo bashinzwe kurinda n’ibindi nk’ibyo. Kuba nta raporo z’imiryango mpuzamahanga zicicikana zivuga nabi ingabo z’u Rwanda ni byo kwishimirwa kandi biteye ishema.

“Nta kabura imvano’’. Mu minsi ishize natashye bwije ndi kumwe na bagenzi banjye, twagendaga duseka, twishimye ariko ntitwari tuzi ko hafi aho tunyura hari ingabo zicunze umutekano muri ako karere, twabagezeho baratuganiriza batubaza iyo tuva n’iyo tujya turabasobanurira, n’akanyamuneza kenshi uwari abayoboye ati ‘mukomeze kandi mugire ijoro ryiza’ natwe tuti ‘namwe mugire ijoro ryiza.’

Ikigaragara ni uko mu ibanga ryabo ry’akazi bashobora kuba baraduherekeje tutabizi kuko twanyuraga ahantu mu cyaro hatagira amatara ku mihanda. Ibi binyibutsa undi munsi natashye bwije mvuye mu kazi nsanga aho nyura hahagaze umuntu yafunze inzira namwikanzemo bamwe bashikuza abantu telefoni cyangwa ibikapu, nsubira inyuma mpura n’abashinzwe umutekano ndababwira bahita bamperekeza bangeza imuhira ndinjira ndabasezera nabo bakomeza akazi kabo.

Kimwe nafashe nk’isomo kuri izi ngabo z’u Rwanda ni ubwitange, gukunda Abanyarwanda n’icyubahiro baha buri wese.

Nkunda bidasubirwaho ikinyabupfura kibaranga mu kazi kabo akaba ari yo mpamvu n’ibikorwa barimo usanga bigenda neza cyane bifite umurongo uhamye.

Kimwe dukwiriye kwigira kuri izi ngabo zacu ni ugukorana umurava, ubushake, ubutwari, ubunyangamugayo, ikinyabupfura, kubaha no kubahana buri wese icyo yaba akora kugeza no mu miryango tuvukamo.

Buri munyarwanda akwiriye gukora cyane ku ruhembe arwaniraho kugira ngo azibe icyuho cyasubiza igihugu inyuma, tujye tuzirikana ko buri wese hamwe n’icyo akora ari ku rugamba rw’iterambere ari byo bivamo kuzuzanya kuvamo iterambere ry’igihugu.

Kimwe Abanyarwanda dukwiriye kwiga no kwimakaza muri twe harimo kwiga gushima, burya iyo ushimye uguha serivisi arushaho gukora neza kuko bitera akanyabugabo gatuma akora ibirenze.

Birababaza gukora neza abo ukorera ntibanyurwe cyangwa ntibashime kandi ibyo gushimirwa bihari. Numva dukwiriye kwiga gushima aho bitagenda neza tugakebura ariko byose tubikora mu kinyabupfura tudahutaza kandi tudasenya.

Nshimiye ingabo z’u Rwanda mwese aho muri kuva ku bashoje akazi kabo namwe mwese mukiri mu nshingano. Nshimiye byimazeyo Umugaba w’Ikirenga w’Ingabo z’u Rwanda, Perezida wa Repubulika Paul Kagame, wateje igihugu imbere harimo no kubaka igisirikare kibereye kandi cyizewe.

Ndashishikariza Abanyarwanda kuba intwari zitwaranira kubaka igihugu cyiyubashye kandi kitavogerwa.

Abanyarwanda aho muri hose ku isi dushyire hamwe turusheho guhuza icyerekezo dukomeze twubake ubuhangange bwacu.

Ingabo z'u Rwanda ziri ku isonga mu kinyabupfura, umurava no gukora neza akazi zishinzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .