00:00:00 IGIHE NETWORK KN KINYARWANDA EN ENGLISH FR FRANCAIS

Impinduka zaba ku buzima bw’umukozi n’iterambere ry’ishoramari haramutse hagiyeho umushahara fatizo

Yanditswe na Me Ntaganda Christian
Kuya 11 Ugushyingo 2021 saa 09:18
Yasuwe :
0 0

Ku itariki 30 Kanama 2018, itegeko nimero 66/2018 rigenga umurimo mu Rwanda ryasohotse rikemura byinshi mu bijyanye n’uburenganzira bw’umukozi mu gihugu, ariko ntiryakemura ikibazo kijyanye n’ishyirwaho ry’umushahara fatizo ku mukozi kuko mu ngingo ya 68 y’iryo tegeko ry’umurimo, iteganya ko iteka rya Minisitiri ufite umurimo mu nshingano ze ari ryo rigena umushahara fatizo.

Kugeza magingo aya kuba nta tegeko rihari rikemura icyo kibazo bituma mu kugena umushahara fatizo hagenderwa cyane cyane ku cyemezo cyafashwe n’Urukiko rw’Ikirenga mu 2016.

Bishatse kuvuga ko 3000 Frw ku munsi ari yo ategekwa n’urukiko buri gihe iyo ikibazo cy’umushahara fatizo kigiweho impaka ariko wabihuza n’ukuntu ubuzima buhenze hanze aha ugasanga mu by’ukuri ari make cyane kuko adafasha umukozi.

Hagendewe ku ishusho y’uburyo ubuzima buhagaze mu gihugu mu by’ubukungu, ibiciro ku masoko, uburyo igihugu gikomeza kirushaho kwiyubaka bigendana no guhenda kwa buri kintu ndetse n’agaciro k’ifaranga usanga 90.000 Frw [3000 x30] ari make bikabije ku mukozi cyane ko icyo akazi kamaze cy’ibanze ari ugufasha ugakora kubaho neza.

Iterambere ry’umukozi ni iterambere ry’igihugu

Kuba umubare munini w’abakozi mu Rwanda ukora imirimo iciriritse kandi itanditse usanga ubuzima babayemo atari bwiza kuko umukoresha ari we akenshi ubagenera ayo ashaka cyane ko aba azi neza ko nta tegeko ryanditse rigena umushahara fatizo.

Bituma bimera nka ya masezerano y’umwenda hagati ya banki n’ugurizwa aba yateguwe n’uruhande rumwe ari rwo banki bigatuma ugurizwa kuko nta yandi mahitamo aba afite, icyo akora ari ukwemera ibyo banki iba yateguye.

Ni na ko bizakomeza kumera mu gihe cyose nta tegeko rihari rigena umushahara fatizo, umukoresha azakomeza kugena ayo ashatse.

Dusanga rero, ishyirwaho ry’iryo tegeko ryakemura ikibazo cy’imibereho y’abakozi kuko yahinduka kandi neza mu gihe yaba yongewe bijyana n’ibiciro ku masoko ndetse hakaba hagaragara kutongera kugenerwa umushahara n’abakoresha, abasezerewe mu buryo butandukanye n’amategeko na bo ubutabera bukabasha kubagenera indishyi zifatika mu gihe bagannye inkiko bitandukanye n’uko bimeze ubu kuko ayo bahabwa ari make cyane.

Ishoramari ryarushaho kwaguka

Nubwo mbere yo gushora imari mu bireberwaho ari uko mishahara ihagaze n’uko igenwa mu bihugu abashoramari bagiye gukoreramo, dusanga atari ikibazo mu gihe itegeko riteganya imishahara fatizo ryaba rihari kuko byaba inyungu ku bakozi ndetse no ku bakoresha kuko byagaragaza ko hari umurongo uhamye mu gihugu ku bijyanye n’uburenganzira bw’umukozi kuko icyo cyuho kiba kitariho.

Kuba n’ubusanzwe icyo leta ibanza kureba ari inyungu rusange mu gihe hashyizweho itegeko runaka, dusanga iryo teka rikemura ikibazo cy’umushahara fatizo ryajyaho nk’uko ingingo ya 68 ry’itegeko n° 66/2018 ryo ku wa 30/08/2018 rigenga umurimo mu Rwanda ibiteganya, maze uburenganzira bw’umukozi bugakomeza gusigasirwa.

Ibikubiye uri iyi nyandiko ni ibitekerezo bya Me Ntaganda Kabano Christian


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .