Kwamamaza

Ikinyarwanda cyacu kiragana he?

Yanditswe kuya 1-11-2016 saa 14:00' na Umwali Zhuri


Birambangamira kuba ngenda muri hotel zigezweho hano i Kigali, uwakira abantu akanyakirana urugwiro avuga icyongereza, nagera no muri Restaurant iciriritse naho ngasanganizwa icyongereza aho abenshi baba batanakivuga neza. Ibi bintera kwibaza aho umuco wacu ugana niba aho cya kinyarwanda duha agaciro kitazakendera tukirebera.

Aho wakwinjira hose usanganizwa na ’Hi’ cyangwa ’ Hello’ na ’Welcome’ Abo bakwakira ntibaba bazi neza niba urwo rurimo urwumva, ibintu bituma nibaza icyo dukwiye kwimakaza mu gusigasira umuco wacu.

Ese mu bindi bihugu ho babayeho bate?

Mu bihugu nka Kenya, aho ugeze hose wakirwa mu giswahili, hanyuma waba utakizi akaba ari wowe ufata iya mbere ukavuga ururimi wumva ushaka gukoresha. Abanyarwanda bagiye gusura ibihugu by’amahanga, babanza kwiga amagambo y’ibanze akoreshwa aho bagiye nk’indamukanyo, uko bashobora gusaba ibintu runaka n’ibindi.

Usanga kandi hari n’imfashanyigisho zishobora gufasha umuntu runaka kumenya iby’ibanze biranga icyo gihugu ariko wakwibaza niba mu Rwanda bihari.

Tugarutse mu Rwanda, ni gute mwene wacu [umunyarwanda] anyakira mu rundi rurimi? Ha mbere aha, hari uwanyakiriye, yarabyumvaga ko abo twari kumwe twavugaga ikinyarwanda, turamubwira tuti ’twakire mu kinyarwanda, vuga ikinyarwanda’. Arabikora ariko nyuma agarutse na none aza avuga icyongereza.

Byatumye nibaza niba ya mahugurwa ya gahunda ya NaYombi yigeze gutangwa yaratanzwe mu cyongereza bakabwirwa kwibagirwa ikinyarwanda burundu.

Ubundi byahereye he?

Muri iki gihe ababyeyi benshi ntibacyishimira ko abana babo bavuga ikinyarwanda ahubwo babahatira kumenya indimi z’amahanga. Yego ni byiza ko bazimenya ariko birakwiye ko dukomera ku muco wacu, ururimo rwacu rugakomeza kuturanga.

Bisigaye bibaho ko hari abasaza n’abakecuru bananirwa kumvikana n’abuzukuru babo kubera ururimi ku buryo ushobora gutekereza ko umwe ari umunyamerika undi akaba umunyarwanda. Oya, aba bose bavukiye mu Rwanda ndetse nta n’umwe wigeze urenga imbibi zarwo ariko kumvikana birabagora. Ubu turagana he?

Kuba inyandiko zuzuzwa kwa muganga, muri banki n’ahandi ziri mu ndimi z’amahanga bigaragaza uko ikinyarwanda kiri gukendera n’ubwo nazo zemewe mu Rwanda.

Ujya gukoma urusyo akoma n’ingasire

Ubundi ni kuki nkwiye kumenya ikinyarwanda nkakivuga nshize amanga? Hari abahitamo kuvuga indimi z’amahanga zikaba umuco wabo kuko baba bavuga ko nta hantu na hamwe mu kazi kabo ka buri munsi bazahurira n’ikinyarwanda. Mu byo bakora bakoresha icyongereza, [raporo bazitanga mu cyongereza, inama bikaba uko, ababagana nabo babakira muri urwo rurimi]. Ibyo bituma arirwo bashyiramo ingufu n’abataruzi bakihatira kurumenya kuko arirwo rubahesha umugati.

Umunyapolitiki muri iki gihe avuga icyongereza, umwarimu bikaba uko, umucuruzi; ubu mu gihe muganga azaba nta kinyarwanda azi bizagenda gute kandi agomba kuganiriza umurwayi wo mu cyaro cya kure utazi na mwaramutse y’uruzungu? Ni ikibazo gikomeye kuko n’abanyamakuru byitwa ko bavuga cyangwa bandika mu kinyarwanda nabo cyaragiye basigaye bakoresha Kinya-Anglais.

Abatavuga icyongereza ni abaswa cyangwa abaturage

Ikibazo gikomeye usanga mu bantu cyane abize, muri iki gihe bumva ko abatavuga icyongereza ari abaswa cyangwa se abaturage baturutse kure iyo mu cyaro cya kure. Ni imyumvire imaze kwinjira muri benshi cyane ababyiruka. Ije nyuma y’aho abantu benshi mu gihe cyashize bihakanaga ko bavukiye mu Rwanda, bakavuga ko baturutse imahanga baza mu Rwanda kubera impamvu z’amateka.

Muri iki gihe ufite amahirwe menshi yo kubona akazi, ni uzi icyongereza neza. Ariko se, aho dukora tujya twibaza ko hari igihe twakenera ikinyarwanda, tuzakenera gukorana n’abakizi cyonyine?Twibuke kandi ko kuvuga Ikinyarwanda bitavuze kutamenya Icyongereza.

Ariko reka tujye dushima Imana kuko n’ejo bundi iyo Perezida Kagame atavuga ngo no muri Kaminuza ikinyarwanda cyigishwe mu mezi make cyari kuba cyabaye amateka.

Gusa uko byagenda kose hari ikigomba guhinduka ikinyarwanda cyacu kikongera kikaba ururimi ruduhuza aho kugira ngo umuntu uruvuga yitwe umuswa. Njye nafashe gahunda y’uko ntazigera nsubiza umuntu mu cyongereza mu gihe nzi neza ko azi ikinyarwanda kugira ngo kitazakendera abana bacu bakazavuka batazi icyatsi n’ururo.

Mbabazwa n’abasigaye bakivumira ku gahera nk’aho umwe ejo bundi aherutse kumbwira ngo kuva yavuka ntiyigeze yiga ikinyarwanda na rimwe (kandi yavukiye mu ntara yo mu Rwanda aranahakurira) ndetse yumva abangamiwe iyo asabwe kukivuga. Iyo hatabaho ya gahunda ica kuri radiyo y’igihugu ya ‘ntibavuga bavuga’ aba yarihinduye umunyamahanga burundu. Nk’abanyarwanda birakwiye ko duterwa ishema n’iby’iwacu, hanyuma iby’abandi bikaza aho bikenewe.

Byari bikwiye ko mu muco turatira abanyamahanga, ururimi rwacu (ikinyarwanda) rukwiye kuza ku isonga. Nka John Kerry uherutse kutugenderera akaba yaratashye azi amagambo nibura abiri y’ikinyarwanda. Wenda we ni umuntu ukomeye ariko n’abandi badusura mu ngo tukabigisha.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved