00:00:00 IGIHE NETWORK KN KINYARWANDA EN ENGLISH FR FRANCAIS

Igitutu cy’iterabwoba no guhimba ibinyoma mu gushaka gufunguza abakora ibikorwa by’iterabwoba ku Rwanda

Yanditswe na Karangwa Sewase
Kuya 9 Kamena 2021 saa 09:08
Yasuwe :
0 0

Umuyobozi w’umutwe w’iterabwoba yisanze mu Rwanda, ubwo yerekezaga mu Burundi, ubu akaba ari muri Gereza ya Nyarugenge i Mageragere. Yakomeje gukoresha uburyo bwose bushoboka kugira ngo akureho uburyo bwo gukurikiranwa n’Inzego z’ubutabera bw’u Rwanda.

Mu rubanza yazanyemo inzitizi nyinshi, ahabwa n’umwanya wo kuzisobanurira ubucamanza, agamije kutaburanishwa n’ubucamanza bw’u Rwanda, ndetse akanasaba ko ahita afungurwa kubera ko uko yageze mu Rwanda, akisanga mu maboko y’Ubutabera, abyita gushimutwa.

Izi ni zimwe mu nzitizi yumvaga ko zifite ingingo zitakwigobotorwa yazanye mu rubanza ariko biza kurangira zihanduwemo inenge yazo, ubucamanza bwanzura ko aburanishwa n’ubucamanza bw’u Rwanda kubera ko bubifitiye ububasha ntakuka.

Uwo muyobozi w’ibikorwa by’iterabwoba yaje kwikura mu rubanza, bamwe tubibona nko kwirinda kumwarira mu Rukiko imbere y’amahanga n’abo yayoboraga bigeze kumwubaha.

Iki kimwaro ntabwo yabashije kugisimbuka, urubanza rwarakomeje abatangabuhamya n’abo bafatanyije gukora ibyaha, bamushinja ku buryo buziguye n’ubutaziguye uruhare runini yagize mu bikorwa by’iterabwoba byahekuye u Rwanda, ubwo abari mu mutwe w’iterabwoba wa FLN, bateraga mu bice byo mu Majyepfo, mu Murenge wa Nyabimata, Akarere ka Nyaruguru no mu bice by’Akarere ka Nyamagabe ndetse no mu Karere ka Rusizi.

Iki ni igisebo gikomeye cyane ku muntu wigize, akanitirirwa ibikorwa by’ubutwari, akanabyambarira umudari, awambitswe na Perezida w’Igihugu gikomeye. Ni igisebo kandi kugaragara ko yabeshye amahanga, akabikora imyaka myinshi, yigaragaza nk’intungane yavamo umunyapolitiki mwiza wayobora u Rwanda.

Mu bo yabeshye hari ababyemeye bamutera inkunga. Hari abamuteye inkunga nka Fondasiyo yari igamije ibikorwa byiza, hari n’abamuteye inkunga bazi neza ko aje gukuraho Ubuyobozi bw’u Rwanda, yasebeje imyaka myinshi ashaka kubusiga icyasha ko ari ubuyobozi bw’igitugu.

Ukuri kwimuye ikinyoma

Uwitwaga Intwari yaje kuvamo icyihebe, umugome, umuhemu wahekuye igihugu cyamubyaye. Abanyarwanda benshi banabonye ko n’ibyo yitaga ko arwanira, atari byo ko ahubwo akomeje gukuza inda, ubwikanyize n’umururumba wo gutunga ibya Mirenge.

Abo bafatanyije muri ibi bikorwa by’iterabwoba harimo abagaragaje ububisha bwe no gukeza ba mpatsibihugu bagamije kurimbura Abanyafurika, bifashishe inkozi z’ibibi zishyira inyungu zazo imbere, nka ba mpemuke ndamuke. Uwo muyobozi w’ibikorwa by’iterabwoba ageze muri Gereza uwiyitaga umukobwa we, ariko bikaza kugaragara ko ari umutsindirano, yakomeje kuvugira uwo yita se w’intwari.

Abenshi bakamwereka ko nta ntwari igira imigambi yo kwica, kwihakana aho avuka no guhekura igihugu cyamubyaye. Uyu muterabwoba yakomeje gucuya no guta izina mu ruhando mpuzamahanga, abamwizeraga, bakamwizeza no kumufasha kumufunguza bakomeje kubona ko ari umubeshyi, atunzwe no guhimba ibinyoma bigamije kuzuza inda ye idahaga.

Bamwe mu Bunyamahanga bitabiriye urubanza rwe mu itangira, uko rwakomeje ntibahagarutse nk’ikimenyetso cyo kugaragaza ko batashyigikira inkozi z’ibibi. Bamwe mu banyapolitiki bo mu mahanaga bashatse kwivanga mu Butabera bw’u Rwanda, bakuyemo akarenge kabo, bamaze kubona ko gushyigikira Umuyobozi w’umutwe w’iterabwoba, byabasigira inenge n’igisebo.

Uburyo bushya bwuzuye ikinyoma bwo gushaka impamvu zafunguza umuterabwoba

Kubera ko hari abantu benshi baharanira ukuri kandi badashyigikira umuco wo kudahana, bongeye kugaragaza ko u Rwanda rubifitiye uburenganzira bwo gukurikirana imitwe y’iterabwoba nk’intego Isi isangiye. Wa muyobozi w’umutwe w’iterabwoba yahinduye umuvuno. Aho atangiye kugaragaza ko abayeho nabi, ko yamenyeshwejwe ko ashobora kwimwa uburyo bwo guhabwa ifunguro, akomeza abeshya ko adahabwa ibimufasha bihagije mu buzima bwe.

Yongeyeho ko arimo gufatwa nabi mu kwivuza aho avuga ko nk’umuntu usanzwe urwaye umutima, akaba yaranarokotse kanseri ko ashobora kuhaburira ubuzima. Urwego Rushinzwe Imfungwa n’Abagororwa mu Rwanda rwagaragaje ko rufata Abafungwa n’Abagororwa bose kimwe kandi neza. Ubuyobozi bwa Gereza ya Nyarugenge bwagaragaje ko ahabwa ifunguro ndetse agahabwa n’uko agera kwa Muganga.

Ibi ni ibinyoma birimo gucurwa kugira ngo barebe ko noneho hari icyo byamara ngo afungurwe. Ubwe yisabiye abana be kuvuza induru bamamaza ibi binyoma. Ibi kandi barabikoresha nk’iterabwoba bifashishije abanyamakuru b’ibinyamakuru mpuzamahanga, imiryango mpuzamahanga idafashije, Inganga z’Abavoka buzuye agasuzuguro gashingiye ku gutesha agaciro Abanyafurika no kutumva ko nta butabera buba mu bihugu bya Afurika.

Abazi uyu Muyobozi w’ibyihebe, bavuga ko ari umuntu ushobora guhimba ikinyoma cyose ariko akabaho, bakomeza bavuga ko ari umuntu wuzuye ubutiriganya, amafuti, uburyarya n’ubugome, akaba adatinya guhemuka no kwihekura. Kuri we yakora ibibi byose bishoboka ariko akabaho. Bavuga kandi ko azi kwibonekeza, kwivuga ibyiza no kwigira umunyabwenge agamije gusebya abandi no kubatesha agaciro. Inyungu rusange ntacyo zimubwiye, amahoro mu Rwanda ntacyo amubwiye mu gihe abona ko konti ze za banki, zidashishe amadolari amuhundagazaho indonke no kugwiza imitungo ivuye mu buhemu.

Uku kutagira umutima, guha icyicaro ububisha abihuriyeho n’abo yareze ndetse n’abamukomokaho, bashyize imbere guhimba ibinyoma byinshi bakwirakwiza hirya no hino ku Isi ibihuha, bagamije gukura icyaha cy’ubugome ku muyobozi w’ibikorwa by’iterabwoba, bakabyambika Leta y’u Rwanda.

Bize no gukoresha ikinyoma nk’iterabwoba bumva ko bazatera Ubuyobozi bw’u Rwanda bukaba bwakwivanga mu kazi k’ubutabera kugira ngo uyu muterabwoba afungurwe.

U Rwanda ruyobowe n’Abayobozi baharaniye uburenganzira bw’Abanyarwanda, harimo kuringaniza Abanyarwanda imbere y’amategeko. Nta gihangange imbere y’Amategeko y’u Rwanda. Bigaragara ko u Rwanda rwarakoze uko rushoboye ntirwivanga mu miburanishirize y’izi manza zirimo abibumbiye mu mitwe y’iterabwoba ihungabanya umutekano w’u Rwanda.

Ikigaragara kandi, Ubuyobozi bw’u Rwanda bwimye amatwi abashaka kurukoresha amakosa kugira ngo rwivange muri izi manza. Harimo ubwisanzure no kubahiriza uburenganzira bwa muntu imbere y’amategeko.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .