Icyo wamenya ku ihuriro ry’abanditsi n’abahanzi mu Rwanda

Yanditswe na Prof. Pacifique Malonga
Kuya 29 Nyakanga 2017 saa 06:26
Yasuwe :
0 0

Ihuriro ry’abanditsi(Rwanda Society of Authors:RSAU) ni sosiyete nyarwanda iharanira ikanakurikirana ibihangano, uburenganzira n’iterambere ry’abahanzi nyarwanda cyane cyane abari mu byiciro by’abanyamuzika, abanditsi abakora za Cinema n’abashushanya cyangwa abacora mu buryo bwose.

RSAU ishinzwe cyo kurinda ibihangano, kwishyuriza abahanzi no kurengera inyungu zabo mu mategeko no muri rusange.

Ubu mu Rwanda kuva ku wa 24kugeza 27 Nyakanga harabera Inama Mpuzamahanga y’ibihugu byose bigize umuryango witwa CISAC ugizwe n’imiryango irenze 400 ku migabane yose y’isi ariko iyi ikaba ari iy’umugabane w’ Afurika ihagarariwe n’ibihugu 37 harimo n’u Rwanda akaba ari nabwo bwa mbere iyo nama ibereye mu Rwanda i Kigali.

Iyi nama mpuzamahanga yatumiwemo abayobora ayo masosoyete nyafurika, abahanzi n’abakoresha ibihangano ari abanyamaradio, Abanyamahoteli n’impuguke mu by’ubuhanzi butandukanye.

Mbere y’uko iyo nama itangira habanje kuba amahugurwa y’umunsi umwe yabereye kuri Lemigo Hotel ihuza ibyo byiciro byose, yitabirwa n’abantu hafi 200, Minisitiri w’Inganda, Ubucuruzi n’umuryango w’ibihugu by’Afurika y’Iburasirazuba François Kanimba afungura iyo nama muri Convention Center yishimiye intambwe abahanzi mu Rwanda bateye mu kugana RSAU ashimira CISAC kuba yarahisemo gukorera iyo nama mpuzamahanga mu Rwanda.

Ibintu 5 bya ngombwa abahanzi n’abanyarwanda muri rusange bakwiye kumenya

- Iyi sosiyete yashyizweho n’itegeko kandi rireba ubuhanzi n’abahanzi bose bafite ibihangano bifatika bigomba kurindwa ngo birengerwa ku nyungu za ba nyirabwo n’imiryango yabo

- Iyo sosiyete ikurikirana, ikishyuriza abahanzi no kubagezaho amafaranga avuye mu bihangano byabo kugeza imyaka irenze 50

- Ni byiza kandi n’ingirakamaro ko umuhanzi uri muri biyo byiciro ufite ibihangano bye agana iyo sosiyete akishinganisha kugirango ibihangano bye bitavogerwa kandi bimuteze imbere.

- Nta gahato ko kugana RSAU ariko nubwo ari nk’umuhini mushya utera amabavu kubera kutayimenya ni byiza ko bose bayigana bakanayimenya neza no kuyimenyesha.

- Abantu bose bakoresha ibihangano nk’indirimbo, ibitabo, ibishushanyo, abakora cinema bose basobanukirwe ko nta busagihobe cyangwa ibya gusa bikibaho dore ko n’ubundi ibyagusa bitera ubwenge buke, bagomba rero kugira ibyo batanga mu kuriha no guteza imbere ubuhanzi n’ibihangano byabo.

Bityo igihangano cy’umuntu kikaba umushinga n’umurimo utunga nyirawo urubyaro n’umuryango we muri rusange n’igihe yaba atakiriho.

Aha amaradio, amahoteli, resitora, aho bidagadurira n’izindi nzego cyangwa ibigo bigomba gusobanukirwa neza no kwitabira iyo gahunda nk’uko iteganywa n’inzego za Leta zibishinzwe, RDB, MINEACOM, MINISPOC na RSAU ubwayo.

Intabaza irira ku miziro kandi ngo nyamwanga kumva ntiyanze no kubona; kurikiza amategeko kandi usobanukirwe neza ejo utazaririra mu myotsi warayobewe aho abandi bahahiye nka wa muhanzi.

Undi muhanzi LOTI Bizimana ati “Nta munoza ukunda iki ? Reka twe kuba ba nta munoza dukunde iby’iwacu n’abahanzi bacu n’igihugu cyacu u Rwanda rutere imbere.

Prof Pacifique MALONGA
Umwanditsi w’ibitabo n’Umunyamakuru wigenga


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza