00:00:00 IGIHE NETWORK KN KINYARWANDA EN ENGLISH FR FRANCAIS

Icyo ntekereza cyazamura ubuhanzi mu Rwanda

Yanditswe na Kwezi Jean
Kuya 14 Kanama 2021 saa 08:53
Yasuwe :
0 0

Umwizera umwe mu bya gikirisitu numvise avuga ko buri kibazo kiba gihetse igisubizo kandi ko inzira z’Imana zirenze igihumbi, bityo n’ibibazo bimwe biba bishobora kubonerwa ibisubizo birenze kimwe.

Mu myaka y’ubuto bwanjye nabonaga kandi numvaga ibihangano by’Abanyarwanda baba ababaga mu gihugu n’abandi bari barameneshejwe kuri gakondo yabo mu myaka ya 1959 n’indi yakurikiye.

Nakurikiraga ibihangano bimwe cyane cyane indirimbo zabaga zuje ubuhanga haba mu kuzishyira mu majwi ndetse n’ibicurangisho byabaga biziherekeje byose byari nta makemwa ariko ibyo ntibikuraho ko hari abahanzi bamwe bateshukaga bakaba bahanga ibyangiza sosiyete nka bamwe bifashishijwe gukora ubukangurambaga mu kwica abatutsi mu 1994.

Ibihangano byinshi kugeza ku bugeni na byo nabonaga ari byiza kugeza ku bantu bajyaga badushushanyiriza inkuru zo mu bitabo by’Ikinyarwanda twasomaga byose byaguteraga ubwuzu bwo gushaka gusoma ngo umenye ikirimo.

Ndumva bamwe bashobora kuba bibuka inkuru za Bakame na Mapyisi, Petero Nzukira na Joriji Baneti, Ngunda kugeza ku migani y’abana b’udushwiriri.

Sinema ntabwo twari twagasobanukirwa ibyayo ariko twarebaga filime z’ahandi iyo za Amerika, u Buhindi n’u Burayi ukazumva kandi utazi Icyongereza cyangwa Igihindi.

Wasangaga kenshi mu gihe cy’akaruhuko tuzisobanurirana byacitse dore ko hari ahantu henshi mu dusantere cyane cyane mu mijyi bazerekanaga aho twabaga twirebera filime nk’i Nyamirambo ahantu mu nzu runaka twirira bajiya, irindazi, amagi cyangwa ubunyobwa. Ibi bituma nibaza impamvu filime nyinshi z’Ikinyarwanda dukora umuntu atapfa kuyimenya ari umunyamahanga atabonye ibisobanuro (subtitles) ariko byose ikibazo ubanza ari cyo nshaka gukomozaho.

Tugarutse gato ku mateka yacu ubwo Jenoside yakorewe Abatutsi mu 1994 yabaga, ibintu byose byari byarasenyutse ari ugutangira bundi bushya bisobanuye ko n’ubuhanzi na bwo bwahuye n’ikibazo nk’izindi nzego zose cyane ko hari abahanzi bamwe bari bakomeye bishwe muri abandi bijandika mu bwicanyi abandi barahunga, bityo abakabaye urumuri rw’ababyiruka barabura.

Isesengura nakoze nasanze Abanyarwanda bazi kwishakira ibisubizo kuko hamwe n’ibyo byago byose igihugu cyanyuzemo Leta y’Ubumwe bw’Abanyarwanda iyobowe na Nyakubahwa Perezida Kagame Paul, bakoze ibishoboka byose habaho kugenda bubaka inzego z’ubuzima bw’igihugu kandi byakorwaga uko buri mwaka utashye ukabona ko hari inzego z’ubukungu bw’igihugu zigenda zubakwa zigakomera ari na byo byatumye u Rwanda rutangira kuba igihugu cyihagazeho mu karere, ku mugabane no ku isi muri rusange.

Vuba aha nagiye nkurikirana ibirimo gukorwa nsanga icyiciro cy’ubuhanzi ubu kigezweho muri zimwe mu nzego z’ubukungu zigomba gushyirwamo imbaraga.

Iki ni igihe cyiza rero ku bahanzi mu nzego zitandukanye gufatirana uwo mujyo bakabyaza umusaruro ayo mahirwe atangiye kuboneka. Kimwe mu byo bagomba kumva vuba kandi bagakora neza ni ukwishyira hamwe binyuze mu mahuriro yabo dore ko biri amahire ashyigikiwe na Leta.

Ikindi bagomba kwitaho ni ukuba abahanzi bahangira ibinyejana n’ibinyagihumbi, aha nkaba nshaka kuvuga ko bagomba kujya mu nganzo bagahanga ibyubaka sosiyete n’isi barimo kuko umuhanga umwe yaravuze ati “iyo isi iza kuba paradizo ubuhanzi ntibwari kubaho’’, bwabayeho kugira ngo buze bufashe abantu kubona urumuri ni yo mpamvu abamamaye muri urwo rwego babita inyenyeri (stars).

Mbona abahanzi bamwe birirwa bamaganwa n’ibihangano byabo ariko burya umuhanzi yakagombye kwibaza iki kibazo, “ndimo gukora igihangano kimurikira isi kuva mu kibi ikajya mu gukora icyiza ko ari cyo ubuhanzi bumaze kandi buvuze?’’

Iyo ushushanya, ugakora filime, ukandika ibitabo, amakinamico, indirimbo, ibisigo n’imivugo, ubutumwa burimo ni urumuri ku kibazo runaka cyugarije umuryango, sosiyete cyangwa isi muri rusange? Ni yo mpamvu hari abahanzi bahanga bagahanguka ntibazibukwe ukundi kuko ibihangano byabo ntacyo byamariye isi. Ni nde wakwibagirwa Bob Mariley, Lucky Dube n’abandi nk’abo muri muzika ? Wakwibagirwa Charlin Chapplin muri Sinema y’urwenya rwigisha yakoraga cyangwa umunyafurika Ousmane Sembene? Hari n’abandi bandikaga ibitabo, ibisigo, amakinamico, ubukorikori n’ubugeni na n’ubu basize umurage mu isi.

Ikindi nyamukuru nshaka kugarukaho mu byo abahanzi bakora ubundi bagasaba amaboko muri rwa rwego rwo kwishakira ibisubizo ni uguhuza imbaraga, ibitekerezo n’ubushobozi buke bafite bagatangiza ikigega kibafasha mu iterambere ryabo noneho nk’uko bisanzwe Leta yacu ikabona aho ihera na yo iduha amaboko cyane ko Leta n’ubundi ni abaturage bamwe muri bo bakaba abahanzi.

Tugarutse kuri Leta yacu ihora ireba icyagirira neza Abanyarwanda, ni byiza ko tubanza gushima burya umwana udashima bamwita ingayi kandi bigora umubyeyi kumwongera.

Kuba hari inzego z’abahanzi ni byiza, kuba abahanzi bahanga ni byiza ariko hakenewe uburyo bufasha abahanzi guhanga ibihangano byuje ireme n’ubuhanga mu ngeri zose. Filime nziza ikenera ubushobozi burimo n’amafaranga, indirimbo nziza cyangwa ubugeni runaka byose bikenera uburyo kenshi bushingiye ku mafaranga.

Kuri iyi ngingo y’ikigega cy’ubuhanzi, abahanzi na Leta bafatanya bakaba bashaka n’abandi bafatanyabikorwa mu by’ubuhanzi n’umuco ariko hari ahandi bashyira imbaraga cyane cyane ku bikorwa by’ubucuruzi bikorerwa mu gihugu cyangwa bije kuhakorera kubanza kumvikana na byo uburyo mu nyungu babona cyangwa mu buryo bw’imisoro itangwa n’ibyo bigo hajya havamo ijanisha runaka rikajya mu kigega cy’ubuhanzi.

Tuvuge nka sosiyete z’itumanaho nka MTN na Airtel-Tigo zikaba zifitanye na Leta bene ayo masezerano cyane ko abahanzi ni bamwe mu bakoresha itumanaho ry’ibyo bigo yaba mu gihe bamamaza ibikorwa byabo ku mbuga nkoranyambaga bagomba kuba baguze bundles za internet na unite zo guhamagara bityo iterambere ry’abahanzi ni ryo ry’ibyo bigo.

Hakwiye gutegurwa uburyo radio, televiziyoamahoteli, utubari na restaurant bigira icyo bishyira muri icyo kigega ku byo basora cyangwa bunguka kuko na bo bakoresha ibihangano by’abahanzi mu buryo buzwi cyangwa butazwi.

Iki kigega mu gihe cyaba kiriho cyajya gifasha abahanzi kwiteza imbere ndetse no kuba abishingizi babo mu bigega runaka bindi cyangwa ibigo by’imari runaka cyane ko benshi mu bahanzi baba bakizamuka nta ngwate y’imitungo bafite.

Mu gihe ubuhanzi bwashyirwamo imbaraga bugakorwa neza nta kabuza iki kiciro cyaba mugabwambere ku bijyanye n’umusaruro mbumbe w’igihugu na ryo ryaba irindi buye ry’agaciro twungutse. Umunyarwanda ni we wagize ati “Akeza karigura’’, bityo n’amasoko yaboneka.

Reka nsayuke nsaba abahanzi bagenzi banjye b’Abanyarwanda aho bari hose ku isi, kuba urumuri rumurika amahoro, ubumwe n’iterambere.

Duharanire kuba abahanzi babereye u Rwanda, Afurika n’Isi muri rusange.

Igitekerezo cya Kwezi Jean


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .