Ibyiza 10 biboneka mu rushako

Yanditswe na Pastor Desire Habyarimana
Kuya 9 Gashyantare 2021 saa 05:48
Yasuwe :
0 0

Mu gihe cy’abasogokuru bacu kubaka urugo byari ishema kandi abari bakuru bari bafite uburyo bategura abasore n’abakobwa ku buryo umuntu azinjira mu rushako yarateguriwe kuzavamo umugabo cyangwa umugore ubereye umuryango.

Muri iki gihe bisa nk’aho biri guhinduka ku buryo isenyuka ry’ingo riteye ubwoba urubyiruko ku buryo hari abasigaye bagira ubwoba bwo kwinjira mu rushako.

Iyo uganiriye n’urubyiruko wumva rumeze nk’akanyoni karitse ku nzira kagira kati ‘niba nzabaho cyangwa nzapfa simbizi’. Ese ibi bavuga babishingira kuki?

Impamvu ni nyinshi, bamwe babaye impfubyi barirera nta cyitegererezo cyiza bafite mu kubaka urugo, abandi bakuriye mu miryango yuzuyemo amakimbirane adatuza, abandi barikunda ku buryo yumva ko kwinjiza undi muntu mu buzima bwe byamubuza ubwigenge bukabije cyangwa akamubuza ingeso yiberamo nk’ubusambanyi, ibiyobyabwenge, bikamusaba gukora kandi ari umunebwe n’ibindi.

Muri iyi nkuru nagerageje gukusanya ibintu 10 byiza biboneka mu rushako byatuma urugiyemo abaho mu buzima bwiza.

-  Kubona ukuzuza muzabana akaramata

Iyo utarashaka ntuba wuzuye. Ku bemera Bibiliya, Imana irangije kurema Adamu yabonye ko bitari byiza ko aba wenyine imushakira Eva. Uhereye aho wakwemeza ko Imana itibeshye kuko icyo yabonye ko ari cyiza kigomba kuba icy’umumaro mu buzima bw’umuntu.

-  Kubona uwo musangira amarangamutima

Iyo uganiriye na bamwe mu rubyiruko bakubwira ko biyumva neza iyo bari kumwe n’abo badahuje igitsina. Ufashe nk’akanya ugatemberera ahosohokera abantu benshi ubona ko ku kigero cyo hejuru, abakobwa n’abahungu ndetse n’abagabo n’abagore ari bo bakunda gusohokana.

Birumvikana ko iyo winjiye mu rushako uba ubonye uwo musangira amarangamutima, uba ubonye inshuti magara musangira ubuzima bwose.

-  Kwagura umuryango

Imana irema umuntu yaramubwiye ngo ‘nimwororoke mukwire Isi’. Kimwe mu byiza biboneka mu rushako ni ukubyara igisekuru ntikizime, umuryango ukaguka. Bamwe mu bashaka ari impfubyi iyo babyaye umuryango urushaho kwaguka.

Mu by’ukuri kimwe mu bintu bikomeretsa ni ugushaka ntubyare. Gusa muri iki gihe ibyo kubyara nabyo ntibikivugwaho rumwe aho umuntu atangira gupanga kuzabyara umwana umwe atazi niba azabyara cyangwa atabyara. Ikindi kibazo ni uko abavutse mu bana benshi bifuza kubyara bake, abavutse muri bake bifuza benshi bikaba byatera amakimbirane mu muryango.

-  Ubwigenge ku bintu byinshi kuko uba uri iwawe

Iyo umuntu yageze mu rushako aba yigenga, kuko hari n’igihe usanga aba yarakuriye ahantu hadatuma abona ubwisanzure, icyo wakwita ko kwigenga biba bibarirwa ku mashyi.

Kwigenga ariko ntibibuza kugandukirana kuko uwo mugiye gusangira ubuzima n’ubundi uzamumenyesha gahunda zawe muziganireho bizabafasha kubaka urugo rurimo umutuzo n’umutekano.

-  Kugira icyerekezo cyo kubaka ubuzima uko ubyifuza

Hari ubwo wumva ubuzima bwawe hari icyerekezo wabuha ukabangamirwa no kuba hari ibyo udashobora gukora.

Iyo ugeze iwawe uba ubasha kujya mu cyerekezo mwumvikanyeho n’uwo mubana bityo ejo hazaza hanyu hakabera umugisha abandi bazabona umusaruro mwiza w’icyerekezo cyanyu.

-  Kubaka amateka mashya

Iyo ushatse uba wubatse amateka n’ubwo wagera imbere ukananirwa ntuzongera kuba umukobwa cyangwa umuhungu biba byararangiye. Nubwo waba warakoze amakosa mu gihe cy’ubusore ni byiza kubaka amateka mashya umuryango mugari ntuzavuge ngo uri umugabo cyangwa umugore wananiranye

-  Imigisha ifatanyije iriyongera

Kimwe mu mpamvu ibuza abasore n’abakobwa gushaka ni ikibazo cy’amikoro. Nyamara iyo mubanye musangira ibitekerezo ndetse na duke mufite tukabyara umusaruro mwinshi bityo imigisha ikiyongera.

-  Kugira icyubahiro iwawe no guhabwa ijambo mu muryango mugari

Umuntu nubwo yaba ari umuhanga, afite ubukire ariko iyo ataragira umuryango ubona hari uko afatwa yewe n’iyo ahawe inshingano baba bamufitiye impungenge ariko iyo bazi ko uyoboye urugo rwe neza icyizere kirazamuka.

-  Bikurinda kujya mu byaha no kuba inzererezi

Hari ibyaha bikorwa n’urubyiruko mu by’ukuri umuntu wubatse atapfa kwijandikamo. Dufashe nk’urugero, nubwo waba usambana, iyo hari undi muntu winjiye mu buzima bwawe utinya kumuhemukira no kumukoza isoni kandi koko biteye isoni kubona umugabo cyangwa umugore ufata ibiyobyabwenge. Byibuze kubaka bizana ako kantu ko gutinya gusa rimwe na rimwe hari ababirengaho.

Nagira inama urubyiruko gutangira kwitwararika hakiri kare rudategereje kuzabanza kugira urugo.

-  Kugira inshingano no kwaguka mu bitekerezo

Iyo ugiye kubaka uba witeguye kubazwa buri kimwe kibera mu rugo rwawe, kubaka ni ukwiyemeza inshingano. Kimwe mu bigaragaza ko umuntu yakuze ni uko yiyemeza inshingano kandi akazishobora.

Ibibazo uhuriramo nabyo biragukuza mu bitekerezo ndetse uko utinda mu rugo ugenda ugira ubunararibonye bikaba byagufasha gukosora amakosa wakoraga, urugo rugakomera.

Nasoza ntinyura urubyiruko gushaka, birinda gutwarwa n’amarangamutima n’ibibi babona muri zimwe mu ngo z’iki gihe kuko uko hari imbi hari n’inziza.

Ntidukwiye kwigira ku bananiwe kubaka urugo ahubwo hari ababibashije bafite ingo nziza batubera icyitegererezo mu kwitegura kubaka umuryango wuzuye umunezero.

Ni byiza kwitoza guhinduka hakiri kare utarubaka umuryango bizagufasha kumenya uko wifata n’urugeramo. Buri wese aharanire kuzubaka urugo rwiza!

Ibikubiye muri iyi nyandiko ni ibitekerezo bwite bya Pasiteri Habyarimana Désire

Pasiteri Habyarimana Désire ni umuvugabutumwa ubarizwa mu Itorero rya ADEPR

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .