Hakorwa iki kugira ngo abakozi bakenewe bagire ubushobozi buhagije?

Yanditswe na Kanamugire Emmanuel
Kuya 7 Nzeri 2016 saa 11:46
Yasuwe :
0 0

Ibikubiye muri iyi nkuru ni ibitekerezo bwite bya Dr Gasana Sebastien,Umwarimu muri Kaminuza ya Kibungo (UNIK), aho agaragaza bimwe mu byakorwa ngo ikibazo cy’abakozi badafite ubushobozi bukwiye mu nzego zitandukanye gikemuke.

"Hashize igihe mu Rwanda havugwa ikibazo cy’abarangiza amashuri ariko bajya ku isoko ry’umurimo bikagaragara ko ubushobozi bafite budahagije. Ibyo bituma benshi mu bavuga kuri icyo kibazo batunga agatoki ireme ry’uburezi bakerekana ko ritaragera ku rwego rushimishije.

Muri iyi nyandiko ntabwo dushaka kuvuga ku birebana n’ireme ry’uburezi ubwaryo n’uburyo ryarushaho kugezwa ku rwego rwifuzwa, ahubwo twifuje kuvuga kuri icyo kibazo kiboneka ku barangiza amashuri ntibabone akazi kubera ubushobozi bucye berekana ku isoko ry’umurimo.

Ko ntawe uhakana ko ikibazo gihari, hakorwa iki mu kugerageza kugishakira igisubizo?

Mu rwego rwo kungurana ibitekerezo kandi dushingiye ku byo natwe ubwacu tugenda tubona kuri bamwe mu bari mu mashuri makuru, hari ibyakorwa kugira ngo abarangiza Kaminuza babe barushaho kugira amahirwe yo kubona akazi.

Ibyo tukavuga ko byakorwa binyuze mu mahugurwa, twashyira mu bice nka bitatu, abo bashaka akazi bakagombye kugenerwa.

Guhugurwa mu ndimi

Kumenya kuvuga no kwandika neza indimi zinyuranye ni kimwe mu bishobora kongera amahirwe yo kubona akazi.

Duhereye ku ndimi zikunze gukoreshwa mu Rwanda ndetse no mu karere igihugu cyacu giherereyemo, Abanyarwanda bajya ku isoko ry’umurimo bazi neza Ikinyarwanda, Icyongereza, Igifaransa, Igiswahili (bazizi neza zose cyangwa nyinshi muri izo) baba bafite amahirwe yo kubona akazi kurusha abatazizi neza.

Tuzi neza ko nk’uko bisanzwe bigenda, ibizamini by’akazi bikorwa abantu bandika cyangwa se babazwa mu magambo (interview). N’iyo rero umuntu yaba wenda yamenya cyangwa yashobora neza akazi asaba, iyo atabashije kwandika no gusobanura neza ibyo abajijwe, ndetse ntashobore kwisobanura neza mu mvugo, amahirwe yo kugira ngo ahabwe akazi aba ashaka, cyane cyane ko haba hari n’abandi na bo bagakeneye, arushaho kugenda aba make.

Amahugurwa mu gukoresha mudasobwa

Muri rusange, aho isi igeze ubu usanga imirimo myinshi ikorwa hifashishijwe mudasobwa nk’igikoresho cy’ibanze.

Ibi rero bikaba bivuze ko umuntu ugiye gushaka akazi azi neza gukoresha mudasobwa, byibuze muri porogaramu z’ibanze zikunze kwifashishwa cyane, aba yiyongereye amahirwe yo kukabona kurusha abatabizi. Twibuke ndetse ko ku mirimo imwe n’imwe usanga kumenya gukoresha mudasobwa biba biri mu bizamini abashaka akazi basabwa gukora.

Amahugurwa yihariye

Kubera ko [nk’uko bikunze kuvugwa], ku barangiza Kaminuza mu Rwanda, nta bumenyingiro cyangwa se ubushobozi bwihariye (bujyanye n’akazi bashaka) baba bafite, ni ngombwa ko buri cyiciro cy’ubukungu (economic sector) gishakwamo imirimo kigira amahugurwa yihariye kigenera abo gishaka guha akazi.

Kugira ngo icyo dushaka kuvuga aha kirusheho kumvikana neza, reka dutange urugero.Abakora ibyerekeranye n’amahoteli n’ubukerarugendo, amabanki n’ubwishingizi, gutwara abantu n’ibindi bari bakwiye gushyiraho ibigo byabo byihariye kugira ngo umukozi wese bashatse guha akazi, ariko bagasanga hari ibituzuye mu byo bamwifuzaho, abe yabona ubushobozi ngombwa bwose bashaka binyuze mu mahugurwa.

Kugira ngo ibyo byose bibashe gukorwa turumva ari Leta ndetse n’Urwego rw’abikorera ku giti cyabo (Private Sector Federation) bafatanya kugira ngo ibyo bigo by’amahugurwa yihariye bishobore kujyaho no gukora neza.

Muri make rero, ikibazo cy’ubushobozi budahagije kimaze iminsi kivugwa ku bashaka akazi mu Rwanda twavuga ko kigomba gushakirwa umuti urambye hitabwa ku kuzamura ireme ry’uburezi.

Hagati aho ariko abarangije amashuri, ku nzego zinyuranye, bakaba bagomba gufashwa, binyuze mu mahugurwa, kugira ngo bongere ubushobozi bwabo ndetse n’amahirwe yo kubona akazi."


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza