Gutaramirwa n’urukerereza bidukundisha umurage w’u Rwanda

Yanditswe na Mutangana Steven
Kuya 21 Ukwakira 2017 saa 09:58
Yasuwe :
0 0

Umurage ndangamuco w’u Rwanda ufite ubukungu bwinshi; ugizwe n’umurage ufatika n’udafatika.

Mu cyiciro cy’umurage ndangamuco udafatika niho usanga indirimbo, ubuvanganzo, imbyino n’ibindi. Imbyino za kinyarwanda zikundwa na banyirazo ariko zikanakundwa n’abanyamahanga.

Itorero Ndangamuco ry’Igihugu “Urukerereza” ritegura ibitaramo mu Mujyi wa Kigali no mu Ntara z’u Rwanda, rikanaserukira igihugu hirya no hino ku isi, rikanagaragaza isura nziza y’u Rwanda.

Ubwo iri torero riherutse gutaramira muri Kaminuza y’u Rwanda ishami rya Huye, muri Werurwe 2017, abaturage n’abayobozi b’i Huye, by’umwihariko abanyeshuri baranezerewe, babona uko abagabo n’abagore b’Urukerereza baririmba, babyina, bacuranga, banyuzamo bakanagaragaza umukino shusho ushimangira gutarama kinyarwanda.

Abanyeshuri b’i Ruhande bageze aho barahimbarwa bajyanamo n’Urukerereza, barabyina biratinda, bakagaragaza ko bungukiye ubumenyi muri icyo gitaramo cya kinyarwanda, biyemeza ko nabo bagiye kujya babitegura muri kaminuza.

Mu mahanga imbyino za kinyarwanda zegukana imidari ya mbere

Ubwo Itorero Ndangamuco ry’Igihugu “Urukerereza” riherutse mu iserukiramuco ry’ubuhanzi n’umuco ku rwego rwa Afurika y’Iburasirazuba (JAMAFEST, East African Community Arts and Culture Festival) muri nzeri 2017, abaryitabiriye n’abaturage ba Uganda (aho iserukiramuco ryabereye) banejejwe n’imbyino za Kinyarwanda nk’uko ibitangazamakuru byabigaragaje.

Akenshi aho Urukerereza rugeze mu bihugu bitandukanye abakurikira imibyinire ya kinyarwanda bavuga ko ifite umwihariko, ko bashimishwa cyane n’imbyino z’abagore batuje b’u Rwanda, byagera ku muhamirizo w’intore n’umwambaro wazo bikaba akarusho.

Ni nayo mpamvu aho “Urukerereza” rwagiye ruseruka mu bihugu bitandukanye rwagiye rwegukana ibihembo bya mbere. Iyo byabaga byateguwe mu rwego rw’amarushanwa y’amatorero ndangamuco y’ibihugu.

Ibikombe byegukanywe n’Urukerereza mu mahanga, hari icyo rwakuye muri Espagne (Festival of Mallorca 1995), muri Isiraheli inshuro ebyiri (International Festival of Maataf 1996, 1997), mu Bushinwa (Excellent Performance Award in Shanghai World Expo 2010).

Urukerereza kandi rwagiye rujyana n’abahagarariye inzego zimenyekanisha ubukerarugendo bw’u Rwanda mu bihugu by’i Burayi, Aziya na Afurika mu bihe bitandukanye kandi u Rwanda rukahakura imidari ya mbere.

Perezida wa Misiri yanyujwe n’igitaramo nyarwanda

Iyo Urukerereza ruserutse mu minsi mikuru y’Igihugu no mu kwakira abashyitsi b’imena bagenderera u Rwanda, haba ku kibuga cy’indege, haba no mu gihe cyo gutaramira umushyitsi azimanirwa, abashyitsi bari mu rwego rw’abakuru b’ibihugu baranezerwa.

Kwizihirwa kw’intore byanejeje Perezida wa Misiri ubwo yari mu ruzinduko mu Rwanda muri Kanama 2017 maze Urukerereza rumaze gutaramira asaba ko ahabwa umwanya akabashimira abakora mu biganza.

Ibi ubibonye wese usanga avuga ati “Urukerereza rudukundisha umurage w’u Rwanda, imbyino za kinyarwanda ni nziza…”

Dukomeze dusigasire, tubungabunge, turinde, tunateze imbere umurage ndangamuco w’u Rwanda.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza