00:00:00 IGIHE NETWORK KN KINYARWANDA EN ENGLISH FR FRANCAIS

Gutanga igihugu mu maboko y’ababisha ni ukwirahuriraho umuriro

Yanditswe na Karangwa Sewase
Kuya 24 Gicurasi 2021 saa 12:00
Yasuwe :
0 0

Kuva kera buri Munyarwanda yatozwaga kwimana igihugu mu maboko y’ababisha, kurengera igihugu n’abagituye, agaharanira ko u Rwanda rugira ijambo, rugasumbya icyubahiro n’ishema ibindi bihugu. Abanyarwanda batozwaga kubaha no gusigasira indangagaciro, bakimika umuco wa kirazira.

Abanyarwanda batozwaga kandi no kubumbatira ubumwe, bakarengera ubusugire bw’umuryango wo shingiro ryo kuramuka kw’igihugu.

Uwahemukiraga umuryango yahamagazwaga muri gacaca, agakubitwa icyuhagiro kugira ngo asubire mu muryango agarukanye umutima w’Igihugu, uwinangiraga umutima, yafatwaga nk’umubisha, ntahabwe ijambo na gato, ntagere mu gitaramo cy’abahizi. Guhezwa mu gitaramo cyari igihano gikomeye kubera ko byarakugoraga kuzagabana nk’abandi.

U Rwanda rwubatswe kandi rwagurwa n’ubutwari, aho buri wese yaharaniraga kutagaragarwaho n’ubugwari. Ingabo ku rugamba zaharaniraga kudatanga igihugu mu maboko y’ababisha.

Mu 1924, abakoloni bakuyeho Itorero ry’Igihugu ryari irerero ryatozaga imico myiza n’imyifatire myiza mu bantu. Gusenya ibikorwa by’Itorero byatumye Abanyarwanda bacika igikuba, maze uburere n’ikinyabupfura bikomwa mu nkokora n’imigirire mburamumaro y’imico mibi mvamahanga. Abakoloni bakuyemo Abanyarwanda umutima w’Igihugu bityo bareka ubuntu n’Ubunyarwanda bupfunditse ku bumwe bwabo.

Muri iki gihe hari abacurira u Rwanda urwango

Hari abamaze kugurana urukundo rw’Igihugu indamu n’inda nini, ubugome no kubura ubupfura, bashyira imbere inabi ngo imunge ineza. Ibyari ukurengera inyungu z’igihugu, ba mpemuke ndamuke bamaze kubigurana kurusebya mu mahanga ngo bihungabanye umubano mwiza u Rwanda rufitanye n’inshuti z’amahanga. Aho bageze kwifuza ko u Rwanda rwakomanyirizwa n’amahanga, ngo ubuhahirane n’ubufatanye mu bikorwa by’iterambere bicube.

Iyi myitwarire ikomeje kugaragara ku bacumuye ku Rwanda, bakabura umutima wo gusaba imbabazi. Harimo abasize boretse u Rwanda, bagize uruhare muri Jenoside yakorewe Abatutsi mu 1994, inshuti zabo n’ababakomokaho bayobotse umurongo mubi wo gushaka kurimbura u Rwanda. Hari n’abanyamahanga batifuriza u Rwanda ineza kubera urwango barufitiye. Harimo abashinjwa ibyaha bitandukanye, harimo no kumunga umutungo w’igihugu. Aba bose bakurikiranwa n’ubutabera bw’u Rwanda. Ntibifuriza u Rwanda n’Abanyarwanda ituze n’iterambere.

Bakoresha imbuga nkoranyambanga aho bahimba ibinyoma no gukabya inkuru, bagamije gushyira icyasha ku Rwanda. Bagaragaza ko u Rwanda rutubahiriza amahame y’uburenganzira bwa muntu, aho bafata abakoze ibyaha bakabandikaho inkuru nziza zigamije kubambika ibyera, bagamije kwerekana ko u Rwanda rubarenganya, nyamara barakoze ibyaha ku manywa y’ihangu.

Ibi byongeye kugaragara cyane, ubwo u Rwanda rwitegura kwakira Inama y’Ibihugu bihuriye mu Muryango wa “Commonwealth”, hagaragaye bamwe mu Banyarwanda bavuga ko batavuga rumwe n’ubutegetsi bw’u Rwanda, basabaga u Bwongereza buyobora iyi nama ku rwego, kutemera ko iyi nama yabera mu Rwanda.

Ubusanzwe iyi nama ikaba igomba gusiga Ubunyamabanga Bukuru bwa “Common Wealth” bukorera mu Rwanda, muri manda y’imyaka ibiri. U Rwanda rukaba rwiteguye gukuramo amahirwe aganisha igihugu mu iterambere rusange Abanyarwanda bakarushaho kunguka uburyo bwo gukora ibikorwa by’ishoramari muri uyu muryango.

Harimo kumenyekanisha u Rwanda mu ruhando rw’amahanga ku buryo abashoramari bashora imari mu Rwanda, Abanyarwanda bakabona imirimo, bakaronka amafaranga azamura iterambere ry’imiryango yabo n’igihugu.

Hagaragaye abiyita abanyapolitiki n’abanyamakuru, bishimira ko iyi nama isubitswe, bamwe bakavuga ko nta kazi bazaba bafitemo, ko kandi nta n’inshuti cyangwa bene wabo bafitemo akazi. Ibi bigaragaza ko aba biyitirira kutavuga rumwe n’ubutegetsi bw’u Rwanda, ari abanzi b’u Rwanda, batarwifuriza iterambere n’ituze.

Ni icyaha cy’ubugome gutanga igihugu mu maboko y’ababisha

Iyo uvutse mu gihugu uba uhanye igihango na cyo, kukigambanira aba ari ugutatira igihango. Ni ubugwari kwifatira ku gahanga igihugu cyakubyaye. Kuva u Rwanda rwabaho, cyari icyaha gutanga igihugu mu maboko y’ababisha no gukora igikorwa cyashyira igihugu mu kaga.

Itegeko Ngenga ryo ku wa 14 Kamena 2012, mu ngingo zaryo 461 kugeza ku ngingo ya 469, by’umwihariko muri iyi ngingo ya 461, risobanura iby’icyaha cyo kugirira nabi ubutegetsi buriho cyangwa Perezida wa Repubulika, rigateganya n’ibihano byacyo.

Rigira riti “ukora icyaha cyo kugirira nabi ubutegetsi buriho cyangwa cyo kubuhirika akoresheje intambara cyangwa izindi mbaraga zose; ukora, muri iyo migambi ivugwa mu gaka ka 1º k’iki gika, icyaha kigamije kugirira nabi Perezida wa Repubulika; ahanishwa igifungo cya burundu”.

Aha twibutse kandi ko aba ahemukiye Abanyarwanda kubera ko ubutegetsi ari ubwabo nk’uko biteganywa n’Itegeko Nshinga mu ngingo yaryo ya mbere: “Ubutegetsi bwose bukomoka ku Banyarwanda kandi bugakoreshwa hakurikijwe ibiteganywa n’iri Tegeko Nshinga”.

Uyu ni umurage dukomora ku bakurambere bitanze bagahanga u Rwanda. Kirazira kugaba igihugu mu maboko y’ababisha.

Abanyarwanda dukwiye kuba umwe mu kurengera ubusugire bw’u Rwanda. Ku Ngoma y’Umwami Cyilima II Rujugira, watwaye u Rwanda guhera mu 1675 kugeza 1708, rubanda rwarengeye u Rwanda bikomeye, ubwo u Burundi, u Bugesera, i Gisaka n’i Ndorwa, bagambiriraga kugiria nabi u Rwanda. Kubera icyo gikorwa yafatanyije na rubanda rwamwumviye bagahigika ibihugu bine bikomeye, ni bwo hadutse imvugo igira iti “U Rwanda ruratera, ntiruterwa”.

Abashaka kwirenza igihugu baca muri rubanda, kandi akaba ari na rwo rugerwaho n’ingaruka kurusha abarushoye mu mwiryane, dore ko bo baba barinzwe kandi bafite n’uburyo bwo guhunga ako kaga bashoje.

Kudatanga igihugu mu maboko y’ababisha, ni ukutemera ko kijyaho icyasha, ukakirwanira ishyaka mu Rwanda no mu mahanga. Abakoresha inzira ya politiki n’itangazamakuru basebya u Rwanda, bamenye ko barimo gutatira igihango, bateranya rubanda n’igihugu, dore ko abenshi bakora politiki n’itangazamakuru binyuranye n’amategeko. Igihango kizabasama.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .