00:00:00 IGIHE NETWORK KN KINYARWANDA EN ENGLISH FR FRANCAIS

Dr. Kayumba Christopher, urugero rw’umugabo wikuye amata ku munwa

Yanditswe na Albert Rudatsimburwa
Kuya 12 Nzeri 2021 saa 11:31
Yasuwe :
0 0

Itangazo ry’Urwego rw’Igihugu rw’Ubugenzacyaha (RIB) ryatanzwe binyuze kuri Twitter ku wa Kane, tariki ya 9 Nzeri 2021, ryari rigufi ndetse rigusha ku ntego. RIB yatangaje ko yataye muri yombi Dr. Christopher Kayumba wahoze ari Umwarimu muri Kaminuza y’u Rwanda kugira ngo akorerweho iperereza ku byaha birimo byo gukoresha undi imibonano mpuzabitsina ku gahato n’ubwinjiracyaha kuri iki cyaha, ashinjwa n’abantu batandukanye.

Kuri ubu afungiye kuri Sitasiyo ya RIB ya Kicukiro mu gihe dosiye ye iri gutunganywa mbere yo gushyikirizwa Ubushinjacyaha nk’uko amategeko abiteganya.

Abazi neza Kayumba ntibatunguwe na gato n’ibiri kumubaho. Umwe mu bo bakoranye muri Kaminuza y’u Rwanda i Butare wifuje ko amazina ye agirwa ibanga yagize ati “Christopher yangiritse kera, amaze igihe yaratakaje icyerekezo cy’ubuzima bwe.’’

“Mu by’ukuri uramutse ugiye kuvuga ku nkuru z’abanyeshuri b’abagore Chris yafashe ku ngufu cyangwa abo yagerageje gufata ku ngufu, sintekereza ko tuzamenya ukuri kuzuye kw’ibyaha bye kuko benshi ntabwo bazatinyuka gutera iya mbere no kuvuga ibyabayeho.’’

Abandi bazi neza Kayumba mu buzima busanzwe butari ubwo kwigisha, bavuga ko ingeso ye yo kuganzwa na ka manyinya iri mu byamushoye mu bikorwa byo gufata ku ngufu yavuzwemo.

Umwe mu bari abaturanyi be i Remera mu Gihogere yavuze ko “Rimwe na rimwe Kayumba yashoboraga kugera mu rugo hafi mu gitondo kandi yabaye akazizi. Umunsi umwe, umukozi we wo mu rugo yasohotse mu nzu yiruka, avuza induru ko yashakaga kumusambanya ku ngufu.’’

Yakomeje ati “Ni bibi cyane, sintekereza ko umugore we yasabye gatanya kubera impamvu yoroheje.’’

Imico y’uyu mugabo wahoze ari umwarimu wa Kaminuza, yatumye arwanya abapolisi irazwi hose, ndetse hari amashusho yabaye ikimenyabose yakwirakwijwe kuri WhatsApp abigaragaza.

Umwe mu banyamakuru bazi neza iyo myitwarire ya Kayumba yakomeje ati “Abantu bazi gusa urwo rugero rw’ibyabaye kuko ari byo byafashwe ndetse bigasakazwa muri rubanda.’’

Yongeyeho ko ibyo abantu batazi ari byinshi, ndetse Kayumba yakunze gutombokera Polisi kubera ubusinzi.

Ati “Yanyuranyije n’itegeko ryo gutwara kandi yasinze ndetse yanga no kumvira amabwiriza y’abamusabye kuva mu modoka ye.’’

“Nibura hagati ya 2016 na 2017 yafunzwe nk’inshuro esheshatu, yahoraga asimburanya sitasiyo za Polisi muri Kigali kandi kubera umuco w’ubusinzi. Amande yaciwe yo abarirwa mu mamiliyoni y’amafaranga y’u Rwanda.’’

Inshuti n’umuryango wa Kayumba bamaze igihe kirekire baramukuyeho amaboko kubera imyitwarire ye.

Umwe mu bo bakoranye, yagize ati “Nubwo Chris yari afite umuco wo kwiyemera kandi ugoye kwihanganirwa, sosiyete Nyarwanda yari yiteguye kumwakira no kumuha amahirwe yose.’’

Yongeyeho ati “Ariko ubwo Chris yatangiraga kwinywera agacupa, ni ho urugendo rwo kunanirwa guha ubuzima bwe icyerekezo rwatangiriye. Ubu biragoye kumugenzura kuko iyo asomye agacupa kamwe, afatiraho. Uko asinda cyane ni ko arushaho gukora amahano.’’

Amakuru avuga ko iyo Kayumba yafashe ka manyinya akagahamya, arwanya buri wese kuva ku mumotari, indaya, abacunga umutekano mu tubari (bouncers) ndetse n’abapolisi.

Umwe mu nshuti ze wibuka ibyamubereyeho kuri MTN Center ubwo umu-bouncer yamukubitaga bikomeye nyuma yo kumuciraho, yagize ati “Ng’uko uko ubuzima bwe bwagannye habi. Bajyanye Chris kwa muganga ndetse baramupfuka kubera ibikomere.’’

Irorerwa rikuru gusumba andi ryashibutse mu businzi bwa Kayumba ryabereye ku Kibuga Mpuzamahanga cy’Indege cya Kigali i Kanombe mu Ukuboza 2019.

Icyo gihe, Kayumba yahageze yakererewe [indege yamusize] ariko agerageza kwinjira ku ngufu mu Biro by’Urwego rushinzwe Abinjira n’Abasohoka.

Abamubonye bavuga ko yari yasinze. Abapolisi bacunga umutekano ku Kibuga cy’Indege bagerageje kumuhagarika bamubwira ko bamufasha kugenda n’indi ndege ariko nta musaruro byatanze.

Bavuga ko Kayumba yatangiye gusakuza ashaka guteza umwuka mubi, ndetse avuga ko “Nimutandeka ngo ngende, ndafunga ikibuga cy’indege.’’

Ubushinjacyaha bwavuze ko ibi byari iterabwoba ku mutekano wa rubanda, ahantu ho kwitonderwa.

Ati “Ikibuga Mpuzamahanga cy’Indege cya Kigali ni amarembo yinjira mu Rwanda kandi iterabwoba Kayumba yakoze ryari riteye inkeke.’’

Icyo gihe hatangijwe iperereza ndetse Kayumba aza gutabwa muri yombi kugeza urukiko rumuhamije icyaha, afungwa umwaka umwe muri Gereza ya Mageragere.

Ubu nabwo ari guhangana n’amategeko nanone, nyuma y’igisa n’uruhererekane rw’agahinda yishoyemo mu myaka ishize.

Dr. Kayumba Christopher ari mu maboko y'Urwego rw’Igihugu rw’Ubugenzacyaha, RIB aho ​akurikiranyweho ibyaha birimo icyo gukoresha undi imibonano mpuzabitsina ku gahato n’ubwinjiracyaha kuri iki cyaha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .