00:00:00 IGIHE NETWORK KN KINYARWANDA EN ENGLISH FR FRANCAIS

Imvugo y’urucantege abantu biharaje batazi ko ihatse ikibi

Yanditswe na Kwezi Jean
Kuya 7 Kanama 2021 saa 10:11
Yasuwe :
0 0

Umunyarwanda ni we wicaye atuje areba ubuzima bw’isi uko bugenda, yitegereje abantu bose mu ngeri zose asanga bavuka igihe cyagera bagapfa, arangije aca umugani ugira uti "nta kurama kudapfa’’ undi na we ati ‘’hapfa uwavutse’’. Ariko se nubwo bimeze bityo ni byo koko kuvuga ko nta myaka ijana?

Muri iyi minsi usanga abantu bamwe cyane cyane urubyiruko biharaje imvugo yadutse ngo “n’ubundi nta myaka ijana, reka twibereho gutya... ’’.

Naragenzuye nsanga abenshi bakoresha iyi mvugo batayikoresha mu bukangurambaga bwuje icyiza ahubwo ari ikibi.

Hari ubwo nari ahantu mpasanga abasore n’inkumi bari mu kigero cy’imyaka 25-30 bariho banywa basangira ibisindisha bahamije, nyuma barandeba bati ’ko wowe udashaka kuba nkatwe kandi n’ubundi nta myaka ijana?’

Nabasubije ko njye imyaka ijana ihari, barankwena baranseka bati ‘urabeshya rwose kuko byanga byakunda uzapfa’. Aba basore n’inkumi nasanze bahuje na bamwe imyumvire yo kudasobanukirwa icyo twita ubuzima n’imibereho irambye.

Ni byo koko abantu baravuka bakabaho mu gihe runaka bagapfa kandi urupfu rwa runaka si rwo rwa kanaka, yemwe n’imyaka y’uburame bw’umubiri ntabwo ari imwe kuko hari abapfa bakivuka, abandi bagapfa mu bwana, abandi bagapfa basoretse, abandi bagapfa ari ibikwerere n’amajigija. Hari abapfa ari abasaza, abakecuru n’abakambwe, bose ikibatwara ni urupfu.

Kuri iyi ngingo narasesenguye nsanga umubiri upfa ariko intekerezo n’ibikorwa by’umuntu ntibipfa cyane cyane iyo bishingiye ku gukora icyiza mu isi y’abazima.

Ingero ni nyinshi z’abantu bakoze ibikorwa byiza imibiri yabo igapfa ariko ibikorwa byabo bikaba bikomeje kubera isi urumuri.

Muri Bibiliya numvise inkuru z’abagabo babaye inyangamugayo mu bikorwa byabo bapfa ku mubiri ariko baracyariho mu ntekerezo.

Ntabwo Aburahamu sekuru w’abizera yapfuye; Musa wavanye ubwoko bw’Imana mu maboko ya Farawo ntabwo yapfuye. Yozefu wari inyangamugayo mu gukiranuka no kwizera ntabwo yapfuye. Umukobwa Mariya wari umukiranutsi wabyaye Yesu ntabwo yapfuye. Intumwa za Yesu ntabwo zapfuye kuko ziracyamurikiye isi y’abemeramana.

Ku bemera mu idini ya Islam, Intumwa y’Imana Muhamadi (Imana imuhe amahoro n’imigisha) ntabwo yapfuye kimwe n’abandi nka bo mu kwemera gutandukanye.

Muri Afurika hari abagabo numvise nkurikirana ibyabo batapfuye kubera imigirire yabo myiza y’ubutwari. Baracyamuritse kubera intekerezo zabo. Mutara III Rudahigwa ntabwo yapfuye, Fred Gisa Rwigema ntabwo yapfuye, izindi ntwari twabwiwe z’u Rwanda zirimo abana bato bigaga i Nyange banze kwitandukanya banga amacakubiri intekerezo zabo ziracyamuritse. Patrice Lumumba ,Thomas Sankara, Nelson Mandela n’abandi babaye indashyikirwa kuri uyu mugabane ntibapfuye.

Ese mu Rwanda rw’ubu ho ntidufite abantu b’ibyitegererezo byo kurama no kuramba?

Mu minsi ya none turimo mu Rwanda na ho dufite abantu baba urugero rwo kubaka intekerezo n’ibikorwa birambye kandi bakiriho. Urugero rwa hafi ni Perezida Kagame Paul wiyubatsemo intekerezo zo kuba umutabazi aho rukomeye hose haba mu Rwanda n’ahandi, aharanira uburenganzira bwa muntu.

Uyu mugabo iteka njye mwita intwari kuko afata ibyemezo bikakaye kandi bikwiriye mu gihe gikwiriye. Amaze kugera ku ntego yo guhagarika jenoside yakorerwaga Abatutsi no kubohora Abanyarwanda mu 1994 ntiyagarukiye aho, yarakomeje ayobora urugamba rw’iterambere nubwo wenda hakiri bimwe byo gukomeza kunoza kuko kubaka ari urugendo ariko ibikorwa bye n’intekerezo bye ntabwo bizasaza ahubwo bizarama bikomeze bibe urumuri ku binyejana biri imbere.

Hari n’abandi banyarwanda bakwiriye gufatirwaho ingero zo kuramba bitewe n’intekerezo n’ibikorwa byabo by’ubutwari bakomeje umujyo n’intekerezo zubaka kandi zirambye mu isi ya muntu.

Numvise uburyo Jenerali James Kabarebe yarwanye urugamba rwo kubohora u Rwanda kugeza ubwo ayobora urundi rubohora abaturanyi bacu b’abanye-Congo. Kugeza ubu imwe muri operasiyo ya gisirikari yayoboye ubu yigishwa muri Kaminuza nyinshi mu isi (Operation Kitona).

Kuri njye uku ni ko kurama kandi hari n’abandi bagenda bubaka amateka nk’ayo mu ngeri zose kugeza ku bagore b’abanyarwandakazi bubaka isi nka Jeannete Kagame washinze umuryango Imbuto Foundation ifitiye urubyiruko akamaro, Louise Mushikiwabo ukomeje kubaka ibigwi mu isi aho ayoboye umuryango ukomeye w’abavuga ururimi rw’Igifaransa.

Natanze ingero zifatika wenda za bamwe mu bakoze ibihambaye ariko uzumva umuntu akubwiye ati ’untegerereze kwa Rubangura mu Mujyi wa Kigali’; undi ati ’duhurire kwa Makuza’; undi ati ’ntuye hafi yo kwa Mushimire Kimironko’; undi ati ’unsige kuri Nyirangarama’; undi ati ’ngeze hafi yo kwa Karangara i Rwamagana’.

Undi ati ’wumvise indirimbo ya Meddy ,The Ben, Karasira na Knowless?’ Undi ati ’wabonye filime ya Papa Sava?’ Undi ati ’ni gute naba ukora filime zikomeye nka Joel Karekezi na Kivu Ruhorahoza?’ Aba bose iyo bakora bene ibi bikorwa baba barema kurama mu ntekerezo zubaka isi.

Birashoboka rero ko mu buryo bw’umubiri umuntu apfa ariko mu buryo bw’umwuka, ibikorwa n’intekerezo umuntu ararama bitewe n’umusanzu yahaye umuryango abarizwamo, igihugu abarizwamo, umugabane atuyeho n’isi muri rusange . Ubundi twaremewe kuba ab’umumaro mu isi tuvukiramo.

Ndasayuka rero nkebura kandi ntanga inama ku bakoresha imvugo igira iti "nta myaka ijana’’ ko abayikoresha baba biremamo ubugwari butuma biroha mu bibi nk’ibiyobyabwenge, ubusambanyi n’ubundi bugizi bwa nabi kuko baba biciriyeho iteka ko nta kurama bafite.

Umuntu ufite intego n’intumbero yagutse ntabwo yakoresha iyi mvugo. Uwo nyumvanye mubona nk’umuntu utazi iyo agana adafite icyerekezo kirambye.

Ndifuriza Abanyarwanda bose aho bari mu isi kubaka intekerezo zubakiye ku cyiza kandi zirambye ku nyungu rusange zaba iza none ndetse n’igihe kizaza ibinyejana ku bindi. Naho wamara umunsi umwe mu isi ariko ukaba uw’umumaro ku bw’intekerezo nziza n’ibikorwa byiza.

Wowe Munyarwanda usomye inkuru yanjye uzasiga nkuru ki imusozi isi izakwibukiraho?

Urubyiruko rukwiriye kwirinda imvugo n'imigirire idatuma baguka mu ntekerezo

Igitekerezo cya Kwezi Jean


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .