00:00:00 IGIHE NETWORK KN KINYARWANDA EN ENGLISH FR FRANCAIS

Amasomo Uganda ikwiriye kuzigira ku Rwanda ibihugu byombi byongeye kuba inshuti

Yanditswe na Kabagambe R. Ignatius
Kuya 21 Ukwakira 2021 saa 12:39
Yasuwe :
0 0

Guverinoma y’u Rwanda n’iya Uganda zimaze igihe zifitanye ubwumvikane buke mu buryo bweruye. U Rwanda rushinja Uganda gukorana n’imitwe yitwaje intwaro ishaka gukuraho ubutegetsi bwa Kigali. Ni mu gihe kandi ku rundi ruhande, Uganda nayo irushinja ibikorwa by’ubutasi bikorewe ku butaka bwayo.

Iyo bigeze ku buryo u Rwanda rubona amakuru ajyanye n’ubusugire bwarwo, Uganda ikubitwa inshuro. Ibi ubwabyo bitera Kampala umunabi. Mu gushaka kwirwanaho ihagarika ko hagira amakuru n’amwe ajya hanze, Kampala yisanga abantu bayo bakoze ibikorwa bibagusha ahubwo mu makosa akomeye.

Urwego rw’Ubutasi mu Gisirikare cya Uganda, nka rumwe mu nzego zishinzwe ibijyanye n’amakuru mu gisirikare, ruroha inshundura ariko rukisanga rwarobye inzirakarengane z’abanyarwanda bari mu gihugu cyarwo.

Mu mikorere yarwo, babona buri munyarwanda, yaba uri ku muhanda, mu murima, ku marembo y’ikibuga cy’indege n’ahandi hose nk’umuntu ukora ubutasi udakwiriye kujenjekerwa.

Ibi biremera Uganda ikibazo cya kabiri igirana n’u Rwanda, inyuma y’icyo gushyigikira imitwe yitwaje intwaro. Mu gihe u Rwanda rwakiriza yombi buri mugenzi uturutse muri Uganda cyangwa umuturage wayo nk’abandi bose baturutse ku Isi, muri Uganda ho ni ikinyuranyo, Abanyarwanda barebanwa urwikekwe.

Abantu bibaza uburyo u Rwanda rwitwara neza imbere y’Abanya-Uganda iyo barugezemo mu gihe hari umwuka mubi hagati y’ibihugu byombi, ariko Abanyarwanda bo bakwambuka umupaka, Uganda ikananirwa. Kuki Uganda yananiwe kubyakira?

Umusesenguzi wasubije iki kibazo yavuze ko Guverinoma ya Uganda imaze igihe kinini iba mu bwoba bukomeye. Uko gufata nabi Abanyarwanda ni ho gukomoka, ahanini ku mikorere mibi y’urwego rw’ubutasi mu gihugu.

Mu gihe mu mikorere ya Kigali harimo kugenzura amakuru yose abonetse mu kwirinda amakosa ashobora kubaho, Kampala yo birangira ibintu byayo byose bidasobanutse, ikisanga ifite amakuru adafite ishingiro ku bantu bagomba guhigwa.

Bashobora gukeka abantu benshi icyarimwe mu gihe umwe muri bo ari we wenda utizewe. Mu yandi magambo, ni uburyo ahari bwo kwirinda kwizera bose hanyuma ngo ireke wa muntu umwe yinjire, igahitamo buhumyi guhemukira abo bandi icyarimwe.

Hashize igihe Guverinoma ya Museveni isa n’aho yananiwe gushyira abantu 99 ku ruhande mu 100 ikekamo umwe. Icyo ni kimwe mu bigaragaza imikorere idahwitse inzego ze ziriho, ku buryo zigirira ubwoba n’icyo zitazi.

Icyo ni kimwe mu bitandukanya inzego z’imikorere y’izi nzego zombi - uburyo bwo kugera ku musaruro. Hanyuma rero, Kampala iyo ndwara ishobora gukizwa n’umukozi umwe n’ubundi usanzwe mu bo ihembera akazi kabi akora.

Himbara David, nibura rimwe, aramutse akoresheje ubumenyi yakuye kuri Perezida Kagame, umubano we na Museveni ushobora guhindura imikorere ye. Kuba yarakoreye i Kigali mu gihe cy’imyaka 7, Himbara agomba kuba azi impamvu u Rwanda rukora ibintu bigashoboka.

Kugenzura imikorere y’urwego rw’umutekano ihamye ni kimwe mu bintu Kampala izigira kuri Kigali mu gihe kiri imbere ubwo u Rwanda na Uganda bizaba byongeye kuba inshuti na none.

Guhuza ibikorwa na cyo ni ikindi. Urugero, Uganda izwiho kugira inzego z’umutekano zitandukanye zikora nk’aho zihanganye cyangwa se zitandukanye.

Uburyo bikora ni Polisi ya Uganda mu gitondo kimwe izata muri yombi abantu ikekaho ibyaha, hanyuma mu mugoroba CMI igende isabe ko bafungurwa.

Ibi ni byo byabaye ku bantu batandatu bo muri RUD - Urunana bari bafite inshingano zo gushakira abayoboke uyu mutwe, bafatiwe mu gace ka Kakumiro mu minsi itatu ishize.

Mu gihe Polisi ku wa mbere yari yakoze igikorwa cya nyacyo cyo kubafunga ku bw’uko bafatiwe mu bikorwa binyuranyije n’amategeko, CMI yarabafunguje ku munsi wakurikiyeho.

Polisi yari yakoze ibintu byiza ariko nyuma birangira ibwiwe ko ari ikosa yakoze kuko n’ubundi ifite inshingano z’uko yagiye ku ruhande rutari rwo ku kibazo cy’u Rwanda.

Na none kandi ku wa kabiri tariki 19 Ukwakira, Ndayishimiye Aimable na Kabahizi Mary, bombi ni abanyeshuri bakomoka mu Rwanda bigaga muri Kaminuza ya Bugema muri Uganda. Batawe muri yombi mu buryo bunyuranyije n’amategeko i Mbarara.

Umukozi ushinzwe urwego rw’iperereza yarabahagaritse bombi ubwo bari mu nzira igana mu Rwanda hanyuma bafungirwa mu kigo cya gisirikare cya Mankenke kiri i Mbarara.

Bombi bari bafite ibyangombwa by’inzira byemewe bahawe na Ambasade y’u Rwanda i Kampala. Nyuma uwo munsi, baje kurekurwa ariko bari babwiwe amagambo yo kubatoteza ku buryo bahungabanye. Urwego rw’umutekano muri Uganda rusa n’aho rwafashe icyicaro rukiyemeza kuba mu bifite imikorere itajyanye n’igihe.

Uko ni ugutsindwa mu mikorere. Mu minsi ishize, Isi yose yiboneye agatogo kabaye kandi mu mikorere y’inzego z’umutekano za Uganda. Dr. Muganga Lawrence uyobora Kaminuza ya Victoria iri i Kampala yatawe muri yombi nabi cyane mu gikorwa bivugwa ko cyari gihuriweho n’inzego. Bivugwa ko CMI, Polisi n’Igisirikare bose bari bakirimo.

Umurinzi w’uwo mugabo wagerageje kwitambika ko atabwa muri yombi, yahise afatwa na Polisi. Nta muntu n’umwe wigeze umumenyesha ko uwo ashinzwe kurinda agiye gutabwa muri yombi cyangwa se ngo amusabe imikoranire mu gihe cy’icyo gikorwa.

Byaje kurangira nabi bigaragara nka kimwe mu bikorwa bibi bya Guverinoma ya Uganda. Nyuma y’amasaha make, Perezida Museveni yakoze nk’Umugaba w’Ikirenga wa nyawe w’Ingabo ategeka ko Dr Muganga arekurwa. Gusa ikibazo kiriho ni ukwibaza: Ese mu nzego z’umutekano za Uganda, haba habaho kugishanya inama no kwemeranya ku kintu mbere yo kugira igikorwa?

Mu 2019, Inzego z'umutekano za Uganda zataye muri yombi abanyarwanda barenga 200 ku mpamvu zidafatika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .