Abunzi n’inkiko ntibakwiye kwakira ibirego by’izungura bitabanje kunyuzwa mu nama y’umuryango

Yanditswe na Maurice Munyentwali
Kuya 17 Mata 2018 saa 11:33
Yasuwe :
0 0

Mu miryango tuvukamo hirya no hino hakunze kuvuka amakimbirane aturuka ku izungura ry’imitungo yasizwe n’abapfuye. Ayo makimbirane hari ubwo afata indi ntera ku buryo biba ngombwa ko hiyambazwa inkiko cyangwa abunzi.

Nubwo abantu bihutira kujya mu nkiko, Itegeko ry’Izungura rivuga ko aya makimbirane agomba kubanza gukemurirwa mu nama y’umuryango mbere y’uko hitabazwa abunzi cyangwa inkiko.

Inama y’umuryango ni urwego rwashyizweho kandi ruhabwa ububasha n’itegeko ry’umuryango rya 2016. Muri iryo tegeko Inama y’umuryango isobanurwa nk’urwego rwo mu muryango rushinzwe kurengera inyungu z’abagize uwo muryango no gukemura ibibazo biwuvutsemo.

Inama y’umuryango iri mu itegeko itandukanye n’inama y’umuryango abantu benshi bazi mu buryo rusange cyangwa mu muco. Abantu benshi iyo bavuze guhamagaza inama y’umuryango bumva ko ari uguhamagaza abantu bakuru bo mu muryango, ba se wabo, ba sekuru, ba nyirasenge n’abandi b’inararibonye bo mu muryango bitabazwa mu gihe bashaka gukemura ikibazo runaka mu muryango.

Nyamara inama y’umuryango ivugwa mu itegeko ry’umuryango rya 2016 igizwe n’abantu bake kandi bagenwa bitewe n’ushaka gukemurirwa ikibazo. Bivuze ko atari inama ihoraho igizwe n’abantu runaka bazwi bahoraho.

Urugero: Niba umuntu witwa Yohani afite ikibazo kigomba gukemurwa n’inama y’umuryango, abagize inama y’umuryango wa Yohani ni aba bakurikira: Se na Nyina ba Yohani, abavandimwe ba Yohani bafite imyaka y’ubukure, abantu nibura babiri bafitanye isano ya bugufi na Yohani yaba kwa se cyangwa kwa nyina (nka babyara be, ba nyirasenge, …) ndetse n’abantu babiri bazwiho ubushishozi Yohani yihitiyemo. Iyo niyo nama y’umuryango wa Yohani.

Inshingano yihariye y’inama y’umuryango mu birebana n’izungura
Itegeko ry’izungura rya 2016 mu ngingo yaryo ya 84 riteganya ko Inama y’umuryango ari yo ishinzwe gukemura impaka cyangwa ibibazo byavutse mu muryango byerekeranye n’izungura mbere y’uko bishyikirizwa Komite y’Abunzi cyangwa urukiko rubifitiye ububasha.

Ibi bisobanuye ko nta rukiko cyangwa komite y’abunzi yemerewe kwakira ibibazo birebana n’izungura batabanje kureba niba urega yarabanje kwitabaza inama y’umuryango.

Ibi binasobanuye ko umwe mu baburanyi (uregwa) yemerewe gusaba urukiko kutakira ikirego kirebana n’izungura kuko cyaba cyatanzwe mu nzira zidakurikije amategeko mu gihe kitabanje kunyuzwa mu nama y’umuryango.

Twanzura…

Birakwiye ko abanyarwanda bamenya inshingano n’agaciro inama y’umuryango yahawe mu itegeko ry’izungura ndetse n’itegeko ry’umuryango. Ni ngombwa kandi ko inama y’umuryango yiyambazwa mu bibazo birebana n’umuryango mbere y’uko hitabazwa inkiko cyangwa komite z’abunzi.

By’umwihariko ku bibazo birebana n’izungura ho itegeko rirasobanutse. Komite z’abunzi n’inkiko bakwiye kujya basaba ababuranyi bakabanza kujya gukemurira ibabazo byabo mu nama z’umuryango byananirana bakabona kwitabaza izo nzego.

Nta kirego kirebana n’izungura cyakagombye kwakirwa mu rukiko cyangwa mu bunzi kitabanje kunyuzwa mu nama y’umuryango nk’uko biteganywa mu ngingo ya 84 y’itegeko ry’izungura.

Ibyo byubahirijwe, nta gushidikanya ko hari ibibazo bitari bike by’izungura byarangirira mu muryango bitiriwe bijya mu nkiko. Dukwiye no gutera indi ntambwe ntibibe ibibazo by’izungura gusa ahubwo bikaba ibibazo byose birebana n’umuryango, nk’ibirebana no gutanga indezo, ububasha bwa kibyeyi, ibirebana n’umutungo w’umuryango n’ibindi.

Cyakora nanone umuntu ntiyabura kuvuga ko hari ibibazo itegeko ritateganyirije ibisubizo birimo nko kugena ugomba gutumiza inama y’umuryango, kugena ugomba kuyobora inama y’umuryango igihe yateranye yiga ku bibazo yashyikirijwe, kugena ibisabwa cyangwa umubare w’abatabira inama y’umuryango kugira ngo iterane mu buryo bwemewe n’amategeko no kugena uko bigenda igihe inama y’umuryango yahamagajwe ariko abayigize bakanga kwitabira ubutumire.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza