00:00:00 IGIHE NETWORK KN KINYARWANDA EN ENGLISH FR FRANCAIS

Abagwingiye muri politiki mu nkundura yo kudindiza abayibyirukiramo babakamuramo gukunda Igihugu

Yanditswe na Karangwa Sewase
Kuya 9 Kanama 2021 saa 09:50
Yasuwe :
0 0

Mbere y’uko Igihugu kiba ubutaka, amazi cyangwa ikirere gitwikiriye icyicaro cyacyo, abantu ni bo bagiha ubuzima kikabaho. Ni yo mpamvu abakurambere bakidusigiye nk’umurage tugomba gusigasira uko wagiye uhereza undi kurema Igihugu.

Umwenegihugu usobanukiwe neza inshingano ze n’igisobanuro cy’isanomuzi asangiye n’Igihugu, arakimana, akakibera umurengezi aho ari hose, akakivuga imyato, akakirata ibigwi, akagihanga ubugiri, akifuriza kugwiza no kuramba.

Umukoroni yakamuyemo bamwe mu Banyafurika umuco wo gukunda ibihugu byabo, bimura ibihugu byabyo mu mitima yabo, bimika ibihugu by’Abakoloni. Yabatwaye umutima, abacurika ubwenge, abomora ku isano bahuza n’Igihugu. Abo batannye aho kurengera no guharanira ko ibihugu byabo byatera imbere, babyigumuyeho, babishora mu kaga.

Uvuze Igihugu cyamubyaye neza yitwa umucinyankoro

Bamwe mu batwajwe igitugu n’intekerezo z’umukoloni zo gutesha agaciro ibihugu bibabyara, abenshi usanga bigira abaharanira uburenganzira n’ubwisanzure bwa muntu, usanga basuzugura ibihugu bakomokamo, bakabitesha agaciro, bakumva ko ibigomba gukorwa muri ibyo bihugu byabo ko hagomba kubamo ukuboko kw’abantu bo mu Burengerazuba bw’Isi, aho bumva ko ibikozwe n’Umunyafurika bidatungana. Kugeza aho ibyago bya Afurika babyita ingaruka z’ubuyobozi bubi, maze ibyago by’Iburengerazuba bw’Isi bikitwa impanuka.

Uvuze neza Igihugu kimubyara agirwa igicibwa, umucinyankoro, ko ahakirizwa. Nyamara ukivuze nabi, atuka Abayobozi bakiyobora akitwa intwari, impirimbanyi ya demokarasi, iharanira impinduka no kurengera Igihugu. Ubu ni ubuyobe bwubakwa na gashakabuhake kugira ngo Abanyafurika bakamukemo umutima urengera inyungu z’ibihugu byabo, babe ingaruzwakinyoma n’intekerezo ziyobya, zubaka umwiryane mu Banyafurika, zibereka ko ari abanyantege nke kandi ko Abayobozi babo bo bari hasi yabo ko ntacyo babamarira.

Abakora ibi, babicisha mu itangazamakuru ry’ingeri zose kuko bazi neza ko abaturage bemera icyo umunyamakuru avuze. Abenshi mu banyamakuru nabo bakoreshwa mu kwamamaza intekerezo zitesha agaciro ibihugu byabo n’ubuyobozi bwabo, bayobya abaturage ngo bave mu murongo ibihugu byashyizeho mu kubaka iterambere.

Aha ni ho usanga amakimbirane ahabwa intebe maze rubanda rukabura amajyo rugahora ruzerezwa mu myigaragambyo n’akaduruvayo kadashira, Igihugu kikaba indiri y’ubuhone no kwimakaza imico mibi ya bangamwabo. Abandi bakoreshwa, ni abagwingiye muri politiki, bamize badasesenguye amwe mu mahame ya politiki yo mu Burengerazuba bw’Isi, ishobora kuba ibereye ibyo bihugu bimaze gutera imbere, nyamara nta cyo yafasha Abanyafurika, bakirwana no gukira indwara yo gukandamizwa na politiki za ba mpatsibihugu.

Ibihugu bya Afurika bikomeje kujegezwa n’imungu ya politiki yiyitirira demokarasi

Hari abibwira ko demokarasi ari ugutora n’ushakwa na ba mpatsibihugu. Hari n’abakeka ko demokarasi ari ukwifatira ku gahanga Abayobozi, bateshwa agaciro. Hari n’abigishijwe ko demokarasi ari ibyitwa ubwisanzure burangwa no kwigomeka, busanza uburenganzira bwa muntu, aho umuntu avuga ibiteranya abantu agahabwa ijambo akagirwa imboni ya rubanda.

Hari n’abayobejwe ko demokarasi ari ukwirirwa mu mihanda, abantu bafunze ingendo, barwana na polisi, basenya ibikorwaremezo n’amazu y’abantu, batwika amapine, batikiza ubuzima bw’abaturage. Abagerageje gutera imbere mu kumva icyo demokarasi ari cyo, bakiyumvisha ko demokarasi ari ugutora Abayobozi bashya buri manda n’iyo ntacyo byaba biri bufashe mu kuzamura imibereho y’abaturage.

Hashize ibyumweru bibiri, ishyaka rya UDPR rikorera mu Rwanda, ryemeje ko rizashyigikira Nyakubahwa Paul Kagame, Perezida wa Repubulika y’u Rwanda, niyiyamamariza kuba Perezida muri 2024, ubu ni uburenganzira ntakumirwa bw’Abanyepolitiki bo muri ishyaka, ibi kandi bigaragaza ubwisanzure bafite muri politiki, aho bahitamo ibibakwiriye muri demokarasi, iyo ni demokarasi isesuye.

Abagwingiye muri politiki, babyise gucinya inkoro, bene abo, nibamenye ko demokarasi ari amahitamo y’abenegihugu, bishyiriraho uburyo bayoborwa, bagashyiraho n’ugomba kubayobora. Muri demokarasi, abenegihugu baba bafite ubushobozi bwo gukuraho ubayobora cyangwa bakamugumisha ku buyobozi, mu gihe na we mu bwisanzure bwe abyemera, atabihatirwa.

Nk’uko mu gihe adashobora kubyemera, ashobora kubisabwa, yabyemera, agakomeza akayobora mu gihe aharanira inyungu rusange z’Igihugu zubakiye ku busugire bwacyo, biha amahirwe ku baturage yo kwiteza imbere no gukora baharanira imibereho myiza yabo.

Ibyonnyi by’ubukoloni bikomeje kuzengereza intekerezo z’Abanyafurika aho zisakaza uburozi bumunga urukundo Abanyafurika bakwiye kugirira Ibihugu byabo, aho usanga bamwe mu Banyafurika batwarwa n’indonke bahabwa n’abatera inkunga ubuhone no kugumura Abanyafurika.

Mu Rwanda, imbuga nkoranyambaga zikomeje kwifashishwa mu kwamamaza ubuyobe bwiyorobeka mu isura yo kwiyerekana nk’abaharanira uburenganzira bwa muntu. Kwitwaza ubwisanzure bigakoreshwa nk’umutaka bikingamo amategeko abahana nk’abagumura rubanda, bagamije gukora mu nkokora imigambi y’iterambere ry’u Rwanda.

Aho bamwe mu bakoresha za Youtube zamamaza izo mvugo n’intekerezo zigumura abaturage zibakura mu murongo, batumira abitwikira ukutavuga rumwe na Leta nyamara bagamije inyungu zishingiye kuba bashaka ubutegetsi biciye mu guteranya Abanyarwanda, bababibamo umwiryane kugira ngo bateranye ubutegetsi buriho n’abaturage. Ugerageje kwamagana iyo migambi mibisha wese agirwa inkomamashyi n’ucinya inkoro kuri Leta n’Abayobozi.

Uwumva ko agomba gucura ibirwanya Leta mu gihe Leta ikorera neza abaturage, igamije iterambere, usibye kuba ari umwanzi w’Igihugu, uwo aba yaragwingiye muri Politiki no mu mitekerereze. Aho usanga ahimbahimba, asaba Leta gukora ibirengeje ubushobozi bwayo, akagaragaza ko kuba itabikora, idakunda abaturage, nyamara we umuhaye ubuyobozi, nta na kimwe yakwishoborera, usibye gusubiza Igihugu mu icuraburindi.

Ba gashakabuhake ntibakunda na gato Abayobozi bateza ibihugu byabo imbere, bafite gahunda y’iterambere ihamye, bafite Ubuyobozi bumurikira, bukanakorera abaturage mu nyungu zabo, bashaka kubona Abanyafurika baryana, barwana, bicana, bahora mu gihirahiro. Bashaka buri teka bamwe mu Banyafurika bagira intwari, nyamara ari ibigwari bishishikajwe no gutanga Ibihugu byabo mu maboko y’ababisha. Ibi bikorwa na ba gashakabuhake n’ibyo bihoza Ibihugu bya Afurika mu gushaka irengero n’igisobanuro cy’iterambere.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .