00:00:00 IGIHE NETWORK KN KINYARWANDA EN ENGLISH FR FRANCAIS

Ab’ubukwe n’imodoka nituve mu mikino byarahindutse - erega isuku igira isoko

Yanditswe na Kabagambe R. Ignatius
Kuya 10 Gicurasi 2021 saa 11:04
Yasuwe :
0 0

Mu nama ya Komite Nyobozi yaguye y’Umuryango FPR-Inkotanyi yabereye ku cyicaro cyawo i Rusororo mu Intare Arena, Chairman w’Umuryango akaba n’Umukuru w’Igihugu Paul Kagame yahavugiye byinshi byiza, harimo n’ibikomeye. Nifuje ko tugaruka ku ngingo y’imyitwarire yacu nk’Abanyarwanda muri rusange, ariko duhereye ku byo yavuze ku bageni bajyanywe muri stade.

Nyuma yo kwisegura ku baba barabangamiwe, ndetse n’aba bakibangamiwe n’ishyirwa mu bikorwa ry’ingamba zo kurwanya COVID-19, yagize ati ubonye ngo batubaze ukuntu dutinyuka gufata abageni, aho kwibaza ukuntu abageni batinyutse kwica amategeko! Ngaho rero mwe mwese abibwiraga maye ko n’Umukuru w’Igihugu atashyigikira ifatwa ry’abageni ubwo mwariyumviye.

Maze kubyumva nibajije ukuntu Umuvugizi wa Polisi CP Kabera John Bosco na bagenzi be bishimiye ririya jambo. Kuko bari barikeneye pe! Dukurikije ukuntu byavuzwe hanze aha batukwa na benshi, bazira ko ngo biriya byari agahomamunwa ku buryo buteje igihugu isoni, Polisi yari ikeneye ubuvugizi bukomeye buyirengera ku mugaragaro. Ni uko rero ubuvugizi mwarabubonye buhamye Polisi mwe, kandi twizere ko iryo joro mwiguriye kamwe. Maze byari binakwiye rwose.

Perezida Kagame ntari ku ruhande rw’abatubahiriza amategeko

Ahubwo nyuma ya ririya jambo sindumva imvugo nshya yakurikiyeho mu bibwiraga ko Umukuru w’Igihugu ari ku ruhande rwabo. Uruhande rwo gushyira mu bikorwa itegeko hakurikijwe imyambaririre, imyanya, imyato, n’ibindi nk’ibyo. Ntabwo muri kumwe, mwihangane. Erega igikuba cyari cyacitse! Ngo yewe abageni barajwe muri stade bavutswa umunezero wuzuye n’uburenganzira bagahawe n’umunsi umwe w’amateka mu buzima bwabo. Bati rwose buriya amafoto nk’ariya y’agatimba ko mu byicaro by’abafana ba ruhago bazajya bayasobanura bate, abandi ngo bazabwira iki abana babo? Ngo aho kuba bagiye mu ijoro rya buki, ahubwo barajwe rwantambi. Ngo twari tuzi ko abageni ari abadahangarwa. Ayinya!

N’uko abandi ndetse bakanavuga ko ngo Polisi yagiye cyera kubusa ariko noneho akayo gashobotse. Ngo rwose ntabwo biri bubahire. Abamaganaga igikorwa nubwo bataburagamo nk’umwe ubibutsa ko amategeko atarobanura, bene uwo baramubwiraga ngo rahira ko noneho ibukuru batari bubahitane babaziza ‘kuba ba ruharwa’.

Sinzi ngo iyo Polisi y’Igihugu iza kuba igira impuhwe n’umutima wa kimuntu ntiyagafashe abageni ngo ibaraze hanze mu mbeho ya stade bahanye intera, kandi ngo iryo joro ryakabaye iryabo rya mbere ryo kuryamana begeranye. Polisi yo si uko yabibonaga, muyibabarire. Covid-19 ntabwo irobanura ku butoni. Yo iraguterura ikakwesa, uwo waba uriwe wese. Ese ni kuki ibyo Abapolisi babizi kuturusha?

Ibyo bibazo bishingiye ku marangamutima byose Perezida Kagame yabisubirije hamwe ashyigikira Polisi y’Igihugu. Ati nimucishe make duhere aho twagahereye: ati mbere na mbere twibaze, ni iki cyatumye abageni batinyuka kwica amategeko? Ese ababatinyuye kuyarengaho, ubwo si bo ba mbere bagakozwe n’isoni? Harya ubu koko abantu tuzajya turenga ku mategeko n’amabwiriza nkana, hanyuma nidufatwa bidutangaze? Nyoni nyinshi we!

Gukosa kenshi tudahanwa bimaze kuturemaza!

Ngaho nimureke twibukiranye, ubwo wenda bishoboka ko kwibagirwa bibaho. Ariya mabwiza hari uyobewe ko ashyirwaho n’Inama y’Abaminisitiri, kandi akenshi iba iyobowe n’Umukuru w’Igihugu? Ese ubwo aberuraga bakavuga ko Perezida Kagame na we yaba ari mu bababajwe n’abageni bakosowe, aho ubwo koko ntibabaga biyibagije ko muri kamere ye hatabamo gufata imyanzuro itazashyirwa mu bikorwa? Abarokole bagira indirimbo igira iti: “Imvugo y’iwe n’ihame, tegereza umunsi n’isaha, ubwo ari Yesu wabivuze bizoshika.” Umuryango FPR-Inkotanyi na wo ugira iyawo mvugo. Igira iti: “Imvugo ni yo ngiro”.

Ubwo se koko harya tugiye kuzajya turenga ku mabwiriza (yashyiriweho gufasha twebwe ubwacu mbere na mbere) kenshi tudafatwa, maze rimwe nidufatwa twisararange twibaza impamvu n’iryo rimwe dufashwe? Cyera mu mategeko y’umuhanda habagamo guhanirwa icyaha cy’agasuzuguro. Ibi ndumva na byo byenda gusa n’ibyo, ku buryo uwaduhanira agasuzuguro yaba ataturenganyije. Ni gute twumva ko ubuyobozi bw’igihugu bwashyizeho amategeko cyangwa amabwiriza, yubahirizwa n’ubishatse gusa, ariko utabishatse ntayubahirize. Nkaho ari ntacyabaye ra?

Ese na we hari ukumenyera gukosa tudafatwa ngo duhanwe, tukanibagirwa ko iminsi 40 ibaho? Ubu imyumvire y’Abanyarwanda bamwe ni aho imaze kugera hababaje mbese? Aho bidutangaza tukanavuza induru, ngo karabaye nimudutabare Nyakubahwa Perezida wa Repubulika, dufatiwe mu makosa kandi ubusanzwe bitajyaga bibaho! Imbaraga z’Imana zitube hafi. Na ho ubundi tumerewe nabi kudahanwa biratwishe turaremaye birarangiye.

Naraye muri Stade bucya nishyura 10.000 Frw

Hari abo Perezida Kagame yavuze ko barusimbutse. Abo sinari mbarimo. Gusa nanjye hari aho narusimbutse, kuko ndi mubigeze gutaha ubukwe gatatu bwarimo umubare urenze uwemewe n’amabwiriza. No muri Stade ya Kicukiro narayemo nafatiwe kurenza amasaha ndi muri siporo. Nakomerejeho siporo aho muri stade naraye, biremewe. Mu gitondo nishyuye 10.000 Frw ndarekurwa. Sinzongera.

Gusa igitangaje ni uko mbere y’uko abageni bafatwa, abantu twari tumaze kuremarira mu makosa cyane. Twavaga mu bukwe twishimye ko twishe amategeko. Ayiwe. Wasangaga tuvuga ngo ‘disi we, uzi ko twagize ubukwe utashoboraga kumenya ko ari ubwo muri Covid-19! Mbese kurenga ku mabwiriza ya COVID-19 ntawe byari bigitera isoni. Nta n’uwari ukibitinya. Abato n’abakuru, n’abajenerali, twese wasangaga iby’amabwiriza, imibare n’amasaha, byose tubyitirira Umuvugizi wa Polisi. Ngo cyo nimuhaguruke dutahe dore amasaha ya Kabera arageze. Ararengana Komiseri w’abandi. Ese ni kuki tutayitirira Perezida Kagame, ko ari we uyobora Inama z’Abaminisitiri ziyashyiraho?

Dore ni nka biriya bya camera zo mu mihanda byaducishije ururondogoro. Erega ugasanga turabwirana, duhana amakuru ngo ahashya bayishinze. Polisi na yo iti tuzabashobora igihe tuzabakorera umuti wa Camera zimukanwa. Uwo muhigo barawesheje nimwiruhukire. Ni muze tumenyere kugenda gake, tubyuke kare, duhagurukire igihe, twirinde imivuduko itakabaye.

Tariki 21 Mata nari mu nzira njya i Huye mu kazi. Nari ntwawe n’umushoferi turi babiri gusa mu modoka. Sinari nigeze mubwira ngo wihute, usibye ko ntari nanamubwiye kugenda buhoro. Icyizere nari mufitiye nk’umuntu umenyereye izo nzira kandi witonda, cyari gihaje. Ni uko tumanutse ahagana ICK ya Kabgayi ahari urusengero rwa ADPR, tuvuye mu Mujyi wa Muhanga, camera iteramo. Twabimenye tugeze imbere irembo bohereje ubutumwa ngo: Traffic fine # 1021042157357; Speed: 66 km/h; Location: Gahogo: Amafaranga wishyura: 25,000; Italiki ntarengwa yo kwishyura: 24-04-2021. Murabizi ko nta mbabazi camera igira. Ubwo umushoferi namubwiye ibyo akoze arababara, ndetse aranigaya, ndamuhumuriza (hari ababyita igitero cya satani, kuba wari ubonye ka misiyo, kakazamo imungu uwo mwanya), nanjye ndatuza turakomeza tugerayo amahoro.

Aba polisi baduca amande mu mihanda basigaye babyihutisha

Ku munsi ukurikiye wa Kane 22-04-2021 tugaruka tugeze Kavumu, Inyanza, Traffic Police baraduhagarika. Ubwo ariko nari naregeje, agapfukamunwa namanuye. Iby’uko kutakambara, cyangwa kukambara nabi bihanwa n’amategeko, narabyumvaga gusa, ariko byari bitarambaho.

Umunsi wari wageze sinabimenya. Kandi nari nasenze (nari nasubijwe, Imana yambwiye kwitwararika amategeko sinabyumva). Umupolisi ati ko utambaye agapfukamunwa? Inti disi umbabarire nari narushye. Ati ndabiguhanira, mbanza kugirango arakina. Umushoferi abonye ko bikomeye ati rwose watubabariye ko n’ejo camera yari yadufashe. Umupolisi ati nimwigendere byarangiye. Nashimye nibura ko byihuse. Ariko amande ubwo yo aba ariyongere, 25.000 Frw. Igiteranyo ni 50.000 Frw. Igitero ni cya kindi cya satani kuri bamwe basenga bakanabibona gutyo. Nanjye ndasenga ariko si uko mbibona. Nararangaye. Amande nayishyuye ubukererwe butarinjiramo ngo ibihumbi makumyabiri byongerweho. Ngayo nguko.

Ab’ubukwe n’imodoka twisubireho birakomeye

Umva rero nimureke ab’ubukwe n’imodoka twisubireho, tuve mu mikino. Ntabwo twakwishimira ndetse tukanaterwa ishema no kuba dufite igihugu kigendera ku mategeko , ni byiza cyane, maze ngo twibagirwe ko ibyo tubikesha urwego rwa Polisi y’Igihugu itajenjeka, nk’abashinzwe iyubahirizwa ry’amategeko.

Ni mu nyungu zacu kugira Polisi ikanira, na yo kandi ubwayo irikanira, bigatuma irangwa n’ikinyabupfura. Wari uzi ko buri mwaka birukana mu Gipolisi abagera kuri 400, bazira imyitwarire idahwitse? Umva ukuri: Polisi n’iy’Igihugu cyawe nanjye.

Ubuyobozi bw’Igihugu budutoza kubahiriza amategeko tuba twarishyiriyeho ari byo bibereye u Rwanda. Ibyo rero ubwo byari bimaze gufata kandi bikaba binaryoshye, iki ni igihe cyo gukataza, si icyo kuregeza. Umva ukuri: Ntabwo Polisi ari iya CP Kabera John Bosco, yemwe nta n’ubwo ari iya IGP Dan Munyuza. Umwe ni Umuvugizi undi akaba Umuyobozi Mukuru, ba Polisi y’u Rwanda.

Burya abavuga ko ngo isuku igira isoko, n’amata agira gitereka, baba bavuga ko icyiza cyose kigira inkomoko nzima. Maze nidukunda u Rwanda tukarwizihirirwamo, mu mahoro, isuku, umutekano mu mihanda no mu makaritsiye, imbaraga turwanyisha Covid-19 n’ubudasa bundi buturanga, tujye tumenya inzego z’igihugu tubikesha. Rumwe muri zo ni Polisi y’Igihugu. Ubufatanye tubagomba n’ikinyabupfura ibihe byose. Byose ni mu nyungu zawe nanjye ku giti cyacu, mbere yo kuba iz’u Rwanda rwacu muri rusange.

Ni murambe.

Inkuru y'abageni bashyizwe muri Stade barenze ku mabwiriza yo kwirinda Covid-19 yavugishije abantu benshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .