00:00:00 IGIHE NETWORK KN KINYARWANDA EN ENGLISH FR FRANCAIS

Urubyiruko; igitambo cy’ibisahiranda bitifuza ejo hazaza, amaraso yabo akaba ikiguzi cyo kwinezeza ku babashutse

Yanditswe na Karangwa Sewase
Kuya 6 Gicurasi 2021 saa 12:44
Yasuwe :
0 0

Ku isi hose, urubyiruko ni imbaraga z’Igihugu. Iyo rurezwe neza rugahabwa ubushobozi n’ubumenyi, rugira uruhare runini mu kuzamura iterambere ry’Igihugu ku buryo bwihuse. Iyo ruyobejwe rugahabwa amatiku asenya, ni mu gihe gito rukaba rusenye igihugu kigasigara ari umuyonga.

Niyo mpamvu ugiye kugira icyo akora cyose, urubyiruko nirwo ashyira imbere. Mu bashyize imbere politiki zidafatika, barushyira imbere ngo barwungukireho, bakarwinjiza mu ntambara z’urudaca, akenshi bakabikora barubeshya ko bashaka kuvanaho ubutegetsi ngo barwubakire ejo hazaza, byahe byo kajya!

Iyo urubyiruko rubyemeye nta gushishoza, akenshi rwiroha muri izo ntambara rutazi imvo n’imvano zayo. Abarushoyemo biruka muri bampatsibihugu basaba inkunga zo kugura intwaro n’ibindi bikenerwa mu ntambara.

Abenshi iyo bamaze kubona izo nkunga, amafaranga bakuyemo bayashora mu mishinga yabo bwite ibateza imbere, itagize aho ihuriye n’intambara yo gukuraho ubwo butegetsi bubi bise ubw’igitugu, maze rwa rubyiruko rugakomeza kubabarira mu mashyamba, mu mbeho nyinshi, ku izuba ry’igikatu, kurara mu myobo, kwambara ubusa, guhangayika, kudasinzira n’ibindi, nyamara ba bandi baboherejeyo babayeho neza, mu nzu nziza, bagenda mu modoka ahenze meza, bagenda mu ndege zabo bwite, barya neza, baryama neza, babona umwanya wo gutembera ku mazi.

Nsabimana Callixte wiyise ‘Sankara’ ni urugero rwiza. Mu rukiko aherutse kuvuga uburyo Kayumba Nyamwasa yabashutse, bakikokora bagatanga imisanzu ngo baje gufata ‘Kigali’, yarangiza akajya kwiguriramo za rukururana.

Uzasanga bene abo basaba urubyiruko kuva mu mashuri rukabasanga mu mashyamba, nyamara abana babo biga za Burayi, ntawe uzabona yazanyemo umwana we ngo abere abandi urugero.

Bikwiriye kuba isomo ku rubyiruko

Uhereye kera, abasokuruza bacu basigasiraga ukubyiruka kw’abato, bakabarinda ibyonnyi bibangisha Igihugu, bakabakundisha Igihugu, babaremamo ingabo nziza na bamutima w’urugo bazarema imiryango ikomeye yuje ubuntu n’ubunyarwanda.

Mu mwaka wa 1476, Umwami Ndahiro Cyamatare, amaze kubona bene se Juru na Bamara banze kumuyoboka ahubwo bashaka kumuhirika ku ngoma, bagashaka kumwicira umwana Ruganzu II Ndoli, yigiriye inama yo guhungisha Ruganzu kwa nyirasenge Nyabunyana, wari wararongowe kwa Karemera I Rwaka watwaraga Akaragwe k’Abahinda. Ibyakozwe na se wa Ruganza kwari ukwimana u Rwanda kugira ngo rutazabura umuvunyi.

Ruganzu II Ndoli yaje kubunduka (guhunguka k’umwami) araza akura Igihugu mu kaga, maze atangira umushinga wo kurwagura no kururemera, ahoza Abanyarwanda amarira bari baratewe n’ababisha.

Umuco wo kurengera u Rwanda wongeye kugaragara mu 1990, ubwo Inkotanyi zirimo Abanyarwanda bahunze u Rwanda mu 1959, ziyunze n’abari mu gihugu barwanyaga ubutegetsi bubi, bwubakiye ku macakubiri n’ingengabitekerezo ya Jenoside yageje kuri Jenoside yakorewe Abatutsi mu 1994.

Inshingano ikomeye ku babyeyi ni ukurinda ko urubyiruko rubura uburere, rukabura epfo na ruguru, rukabura Igihugu, rukabura umutima w’u Rwanda. Inshingano z’urubyiruko ni ugushaka ibyungura Igihugu, kukirengera, kucyubaka, kukirinda, kukimana, kukirwanira n’ibindi byakorwa kugira ngo igihugu gihorane ituze n’iterambere. Ibitari ibi ni uguha urwaho no gutiza umurindi ababisha.

None se, igihugu kitakubujije kwiga, ntikikubuze gucuruza, ntikikubuze kwisanzura, ushukwa ute ngo ujye kwifatanya n’abakirwanya?

Ntawihuta nk’uwayobye

Mu minsi ishize hagaragaraye urubyiruko rushorwa mu mitwe y’iterabwoba kugira ngo ihungabanye ituze ry’Abanyarwanda. Bamwe muri bo bagiye bashukwa kuzahabwa imyanya ikomeye muri Leta, mu gihe bafashe ubutegetsi. Basezeranyijwe guhabwa amafaranga, amamodoka n’amazu meza ndetse n’izindi ndonke.

Hari urubyiruko rwishoye mu mashyamba ya Congo, ikibabaje noneho bigakorwa na bamwe mu bize amashuri cyangwa abayarimo. Nyamara ababashuka ngo bajye mu mashyamba, bibereye mu bususuruke ku Mugabane w’u Burayi, uw’Amerika n’ibindi bihugu by’Afurika.

Mu buzima bubi abo bana babamo muri ayo mashyamba, abatishwe n’amasasu bicwa n’indwara z’imirire mibi, inzara n’ibindi. Kuri izi mpfu hiyongeraho kwicuza, kubyara agahinda gakabije, kwiheba no kwiyanga, aho bamwe biyahura, abarokotse ibi bakarasirwa mu ntambara nta bwirinzi kubera ko nta bikoresho by’intambara bafite kuko amafaranga yakabiguze yagiye gutunga imiryango y’ababashoye muri ayo mashyamba.

Muri uko kwifata neza kw’abana babo, usanga ya mafaranga yashakishijwe hejuru y’amaraso y’urubyiruko rwashutswe, abana ba bya bisahiranda aribo birirwa bayasesagura mu mahoteli ahenze cyane, bihata inzoga nyinshi n’ibiyobyabwenge nk’ikimenyetso cy’umurengwe, mu gihe indushyi zoherejwe ku rugamba ziri gupfa umusubizo nk’isazi.

Urubyiruko rukwiriye ibyiza

Ubu Leta y’u Rwanda yahaye ababyiruka icyubahiro gihebuje, guhera bakiri bato. Urugero Itegeko Nshinga rya Repubulika y’u Rwanda rya 2003 ryavuguruwe muri 2015, mu ngingo yaryo ya 139, rishyiraho Inama y’Igihugu y’Urubyiruko.

Uru ni urubuga rw’urubyiruko aho rusabanira, ruhana ibitekerezo, rukanakora ibikorwa byubaka u Rwanda. Byari byoroshye kwita ku bindi ariko yasanze nta cyakorwa urubyiruko rusigaye inyuma.

Leta y’u Rwanda kandi ikomeje kubaka ubumwe bw’urubyiruko biciye muri gahunda z’Itorero ry’Igihugu, aho abato batorezwa hamwe bitewe n’ibyiciro by’ibikorwa bakora, bakabaremamo ubunyarwanda. Ni ko havutse Itorero ry’Indangamirwa, Urungano, Inkomezamihigo, Inkomezabigwi n’andi aho abato batozwa kuba Intore zibereye u Rwanda, bubaka Igihugu badasobanya.

Leta kandi ntiyatereye iyo, abafite ibitekerezo n’imishinga y’iterambere bashyiriweho ikigega BDF, ngo bahabwe igishoro babashe gushyira itafari mu rugamba rwo kwiyubakira igihugu.

Umuhanzi Hakizimana Amani uzwi nka AMAG the Black aherutse kuvuga ati“Aho utinya uhatuma ikigoryi”. Urubyiruko rukwiye kuzibukira ababatuma mu rupfu, bagata imiryango yabo, nyamara abana b’ababatuma bibereyeho neza.

Urugamba utaraga uwo wabyaye, ntukarurage umwana w’abandi. Abato nibamenye ko ababashora mu makimbirane nta kiza babifuriza, urugamba batarwana ubwabo ngo babe barushoraho abo babyaye, ni nde wundi ukwiye kururwana? Ntawe.

Ibikubiye muri iyi nyandiko, ni ibitekerezo by’umwanditsi

Bamwe mu rubyiruko rwafatiwe mu bitero umutwe w'iterabwoba wa RUD Urunana wagabye mu karere ka Musanze mu 2019

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .